İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 108 Hüküm no: 52 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Margarita bt. Agya’nın ölen kocası Agop v. Avakim’den kendisine miras kalan uncu değirmeni hisselerini diğer mirasçılardan oğlu Nişan’a satması Değirmen mübâya‘ası 1000 guruş. İhrâc şüd fî 19 Zilhicce sene [12]83 Kezâlik vilâyet-i Anadolu’da Eğin sancağına tâbi‘ İliç karyesinde sâkin iken bundan mukaddem fevt olan teba‘a-i Devlet-i aliyye’nin Ermeni milletinden ve uncu esnâfından Agop v. Avakim v. Adam’ın verâseti her biri teba‘a-i Devlet-i aliyye’den zevce-i metrûkesi karye-i mezkûrede sâkine Margarita bt. Agya v. Adam ile sulbî kebîr oğlu Nişan ve sulbiye-i kebîre kızı Haropsima’ya münhasıran ve tashîh-i mes’ele-i mîrasları yirmi dört sehimden olup sihâm-ı mezkûreden üç sehmi zevce-i merkūme Margarita’ya ve on dört sehmi merkūm Nişan’a ve yedi sehmi dahi merkūme Haropsima’ya isâbeti tahakkukundan sonra zevce-i merkūme Margarita tarafından husûs-ı âti’l-beyânda bâ-hüccet-i şer‘iyye vekîl olduğu şahsını bilirler her biri teba‘a-i Devlet-i aliyye’den ve mahrûse-i Galata’ya muzâfe kasaba-i Tophane’de Kapıiçi nâm mahalde vâki‘ ekmekçi fırınında ekmekçi olan Eskioğlu Kigork v. Haçador ve medîne-i Üsküdar’a muzâfe Yoros nâhiyesine tâbi‘ Anadolukavağı karyesinde vâki‘ ekmekçi fırınında destgâhdârı Baloğlu Avakim v. İsteban şehâdetleriyle ber-nehc -i şer‘î sâbit olan teba‘a-i Devlet-i aliyye’nin Ermeni milletinden ve uncu esnâfından Davit v. el-merkūm Avakim meclis-i şer‘-i şerîf-i hatîrde bâ‘isü’r-rakīm merkūm Nişan tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’nin Ermeni milletinden ve ekmekçi esnâfından Ohannes v. Anderyas muvâcehesinde Âsitâne-i aliyye ve bilâd-ı selâsede vâki‘ ekmekçi ve uncu ve françalacı esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri yiğitbaşı İsmail Efendi b. es-Seyyid Mehmed Emin hâzır oldukları hâlde bi’l-vekâle ikrâr-ı tâm ve takrîr-i kelâm edip Havâss-ı Ref‘‘a kazasına muzâfe kasaba-i Hasköy iskelesi başında Karakolhâne karşısında vâki‘ bir tarafdan Nikola değirmeni ve bir tarafdan Tuhafçı Oramacı Yahudi menzili ve bir tarafdan Kasâb Vasil dükkânı ve taraf-ı râbi‘i tarîk-i âm ile mahdûd ve Kapudan-ı esbak merhûm Sinan Paşa Vakfı müsakkafâtından nısf hisse-i şâyi‘ası benim ve âhar nısf hisse-i şâyi‘ası karındaşım merkūm Agop’un fevtiyle intikālinden merkūmân Nişan ve Haropsima’nın bi’l-icâreteyn taht-ı tasarrufumuzda olan şehriye on guruş kirâlı iki horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur sekiz re’s bârgir ve onlara tâbi‘ sâir âlât-ı lâzime-i ma‘lûmenin dört re’s bârgir ve onlara isâbet eden âlât-ı sâiresi benim yedimde mülküm olup mâ‘adâ dört re’s bârgir ve onlara îcâb eden âlât-ı sâiresi dahi müteveffâ-yı merkūm Agop’un hayâtında ilel-fevt yedinde olup bin iki yüz elli beş senesi Zilka‘deti’ş-şerîfesinin altıncı günü târihiyle müverraha ve ol târihde Dârü’l-hilâfeti’l-aliyye kādısı olan Ömer Ağazâde Mehmed Tevfik Beyefendi merhûmun imzâ ve hatemini hâviye işbu bir kıt‘a hüccet-i şer‘iyye ve kethüdâ-yı mezbûrun takdîm eylediği bir kıt‘a ilmühaber mantûklarınca yedinde mülkü ve ba‘de fevtihî sâlifü’l-beyân dört re’s bârgir ve onlara îcâb eden âlât-ı sâiresi ber-tashîh-i merkūm müvekkilem merkūme Margarita ile müvekkil-i merkūm Nişan ve merkūme Haropsima’ya mevrûs olmağla ben müvekkilem merkūme Margarita’nın sâlifü’l-beyân dört re’s bârgir ve onlara îcâb eden âlât-ı sâireden ber-tashîh-i merkūm ber-minvâl-i muharrer mâlike olduğu üç sehm hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan [ârî] bey‘-i bâtt-ı sahîh-işer‘î safka-i vâhide ile bâ-izn-i şerîke-i merkūme bin guruş semen-i makbûza müvekkil-i merkūm Nişan’a bi’l-vekâle bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî bi’l-asâle ve bi’l-vekâle ibrâ vü ıskāt eyledik ba‘de’l-yevm sâlifü’l-beyân dört re’s bârgir ve onlara îcâb eden âlât-ı sâirenin ber tashîh-i merkūm üç sehm hisse-i şâyi‘a-i mezkûresinde müvekkilem merkūme Margarita’nın aslâ ve kat‘â alâka ve medhali kalmayıp zikr olunan dört re’s bârgir ve onlara îcâb eden âlât-ı sâirenin on dört sehm hisse-i şâyi‘ası mukaddemâ ve üç sehm hisse-i şâyi‘ası hâlâ şirâen ki cem‘an on yedi sehm hisse-i şâyi‘ası müvekkil-i merkūm Nişan’ın mülk-i mahzı ve hakk-ı sırfı olmuşdur dedikde gıbbe. Fî 27 Zilhicce sene 1278 Şuhûdü’l-hâl: Muhzır Süleyman Ağa b. ( ), Muhzır Şakir Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum