İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 110 Hüküm no: 53 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Şakir Molla b. Hüseyin’in imâmeci dükkânını Hacı Salih Ağa b. Mustafa’ya satması İmâmeci mübâya‘ası 15000 guruş Kezâlik imâmeci esnâfından Mehmed Şakir Molla b. Hüseyin meclis-i şer‘-i şerîf-i enverde esnâf-ı merkūmeden bâ‘isü’l-kitâb el-Hâc Salih Ağa b. Mustafa mahzarında esnâf-ı merkūme kethüdâsı el-Hâc Mehmed Efendi b. el-Hâc Hasan tarafından mürsel vekîli yiğitbaşısı Mehmed Efendi b. Ali ve kâtibi diğer Mehmed Efendi b. Mustafa ve esnâfından el-Hâc Mustafa Ağa b. Hasan ve Mustafa Ağa b. İbrahim hâzır oldukları hâlde ikrâr-ı tâm ve takrîr-i kelâm edip mahmiye-i İstanbul’da Uzun Çarşı nâm mahalde vâki‘ bir tarafdan el-Hâc Naim Efendi’nin imâmeci dükkânı ve bir tarafdan Şehid Ali Paşa Hanı ve bir tarafdan mukaddemâ es-Seyyid Mehmed Ağa ve el-yevm mezbûr el-Hâc Salih Ağa’nın dükkânı ve taraf-ı râbi‘i tarîk-i âm ile mahdûd müşârün-ileyh Şehid Ali Paşa Vakfı müsakkafâtından mezbûr el-Hâc Salih Ağa ve gāib ani’l-meclis Emin Efendi’nin bi’l-icâreteyn taht-ı tasarrufunda olan şehriye üç guruş kirâlı mukayyed bir bâb imâmeci dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme akd-i âti’z-zikrin sudûruna değin yedimde olup bin iki yüz elli üç senesi Recebü’l-ferdinin sekizinci günü tarihiyle müverrah ve ol târihde askerî kassâmı olan Ahmed Efendi’nin mührüyle memhûr işbu bir kıt‘a i‘lâm-ı şer‘î ve kethüdâ-yı mezbûrun takdîm eylediği bir kıt‘a ilmühaber mantûklarınca yedimde müstakillen mülk ve hakkım olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr el-Hâc Salih Ağa’ya on beş bin guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr on beş bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz eyledim, fîmâ-ba’d âlât-ı gedik-i mezkûrde benim aslâ ve kat‘an alâka ve medhalim kalmayıp mezbûr el-Hâc Salih Ağa’nın mülk-i müşterâsı ve hakk-ı sırfı olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik dedikde gıbbe. Fî 15 Muharrem sene 1279 Şuhûdü’l-hâl: Muhzır İsmail Ağa b. ( ), Muhzır Mustafa Ağa b. ( ), Muhzır Mehmed Ağa b. ( ), Muhzır Feyzullah Ağa b. ( ), ve gayruhum