İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 112 Hüküm no: 55 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop v. Evakim’in ölümünden sonra kendilerine miras kalan uncu değirmeni hisselerinin mülkleri olduğuna dair Mirasçılarının hüccet talebi Uncu değirmeni ihbârı. İhrâc şüd fî 19 Zilhicce sene [1]283 Kezâlik vilâyet-i Anadolu’da Eğin kazasına tâbi‘ İliç karyesinde sâkin iken bundan mukaddem fevt olan teba‘a-i Devlet-i aliyye’nin Ermeni milletinden ve uncu esnâfından Agop v. Avakim v. Adam’ın verâseti her biri teba‘a-i Devlet-i aliyye’den zevce-i metrûkesi karye-i merkūmede sâkine Margarita bt. Agya v. Adam ile sulbî kebîr oğlu Nişan ve sulbiye-i kebîre kızı Haropsima’ya münhasıra ve tashîh-i mes’ele-i mirâsları yirmi dört sehimden olup sihâm-ı mezkûreden üç sehmi zevce-i merkūme Margarita’ya ve on dört sehmi merkūm Nişan’a ve yedi sehmi dahi merkūme Haropsima’ya isâbeti tahakkukundan sonra merkūmûn Margarita ve Nişan ve Haropsima taraflarından husûs-ı âti’l-beyânda vekîl-i şer‘îleri teba‘a-i Devlet-i aliyye’nin Ermeni milletinden ve esnâf-ı merkūmeden Davit v. el-merkūm Avakim meclis-i şer‘-i şerîf-i hatîrde Âsitâne-i aliyye ve bilâd-ı selâsede vâki‘ ekmekçi ve uncu ve françala esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri yiğitbaşı es-Seyyid İsmail Efendi b. es-Seyyid Mehmed Emin ve esnâf-ı merkūme salıcılarından el-Hâc Ahmed Ağa b. Mehmed ve Topal İbrahim Edhem Ağa b. Ali hâzır oldukları hâlde bi’l-vekâle takrîr-i kelâm ve ta‘bîr ani’l-merâm edip Havâss-ı Refî‘a kazasına muzâfe kasaba-i Hasköy iskelesi başında Karakolhâne karşısında vâki‘ bir tarafdan Nikola değirmeni ve bir tarafdan Tuhafçı Oramacı Yahudi menzili ve bir tarafdan Kasâb Vasil dükkânı ve taraf-ı râbi‘i tarîk-i âm ile mahdûd Kapudan-ı esbak merhûm Sinan Paşa Vakfı müsakkafâtından nısf hisse-i şâyi‘ası benim ve âhar nısf hisse-i şâyi‘ası karındaşım merkūm Agop’un fevtiyle intikālinden müvekkillerim merkūmân Nişan ve Haropsima’nın bi’l-icâreteyn taht-ı tasarrufumuzda olan şehriye on guruş kirâlı iki horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur sekiz re’s bârgir ve onlara tâbi‘ sâir âlât-ı lâzime-i ma‘lûmenin dört re’s bârgir ve onlara isâbet eden âlât-ı sâiresi benim yedimde mülküm olup mâ‘adâ dört re’s bârgir ve onlara isâbet eden âlât-ı sâiresi dahi karındaşım müteveffâ-yı merkūm Agop’un hayâtında ile’l-fevt yedinde olup bin iki yüz elli beş senesi Zilka‘deti’ş-şerîfesinin altıncı günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Ömer Ağazâde Mehmed Tevfik Beyefendi merhûmun imzâ ve hatemiyle mahtûme işbu bir kıt‘a hüccet-işer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedinde mülkü ve ba‘de fevtihî sâlifü’l-beyân dört re’s bârgir ve onlara isâbet eden âlât-ı sâiresi ber-tashîh-i merkūm müvekkillerim merkūmûn Margarita ve Nişan ve Haropsima’ya mevrûs olup lâkin sâlifü’l-beyân dört re’s bârgir ve onlara îcâb eden âlât-ı sâire ber-vech-i meşrûh müvekkillerim merkūmûn Margarita ve Nişan ve Haropsima’nın mülkleri olduğunu nâtık yedlerinde sened-i şer‘î olmamağla hakīkat-ı hâl husûs-ı mezkûra vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile kıbel-i şer‘den sâlifü’l-beyân dört re’s bârgir ve onlara îcâb eden âlât-ı sâire ber-minvâl-i muharrer müvekkillerim merkūmûn Margarita ve Nişan ve Haropsima’nın mülkleri olduğunu nâtıka yedlerine bir kıt‘a hüccet-i şer‘iyye i‘tâ buyurulmak murâdımdır deyu bi’l-vekâle istid‘â etdikde hâl vekîl-i merkūm Davit’in bâlâda bast ve beyân eylediği minvâl üzere olduğu husûs-ı mezkûre vukūf-ı tâmları olan esnâf-ı hâzırûn-ı merkūmûndan her biri alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu. Fî 26 Zilhicce sene 1278 Şuhûdü’l-hâl: Muhzır İsmail Ağa b. ( ), Muhzır Mehmed Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), ve gayruhum