İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 111 Hüküm no: 54 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kabril v. Isador’un şerbethâne hisselerini ortaklarından Praşkova v. Mihal’e satması Hasköy’de şerbethâne mübâya‘ası 2500 guruş Kezâlik teba‘a-i Devlet-i aliyye’nin Ermeni milletinden ve şerbethâneci esnâfından Kabril v. Isador meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan esnâf-ı merkūmeden bâ‘isü’r-rakīm Praşkova v. Mihal muvâcehesinde her biri teba‘a-i Devlet-i aliyye’den esnâf-ı merkūmenin Beyoğlu kolu ustabaşısı Andon v. Ohannes ve Çarşı kolu ustabaşısı Abraham v. Kiryako ve Tarabya karyesi kolu ustabaşısı Vasil v. Nikola hâzır oldukları hâlde ikrâr-ı tâm ve takrîr-i kelâm edip Havâss-ı Refî‘a kazâsına muzâfe kasaba-i Hasköy’de Abdüsselam mahallesinde Çıksalın nâm mahalde vâki‘ bir tarafdan Haçik v. Kirkor menzili ve bir tarafdan Hacı Agop v. Artin menzili ve bir tarafdan Elmas bt. Adam menzili bahçesi ve ba‘zen Takohi bt. Kirkor menzili ve taraf-ı râbi‘i tarîk-i âm ile mahdûd cennet-mekân merhûm ve mağfiret-nişân Sultan Bayezid-i Velî Hân aleyhi-sicâlü’l-gufrân hazretlerinin evkāf-ı celîleleri müsakkafâtından benimle merkūm Praşkova ve gāibûn ani’l-meclis Manas ve Kilhar ve Losik ve Talika’nın bi’l-icâreteyn taht-ı tasarrufumuzda olan şehriye otuz guruş kirâlı Tosun şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla kırk sehm hisse-i şâyi‘ası âharların ve altmış sehm hisse-i şâyi‘ası merkūm Praşkova’nın yedlerinde mülkleri olup mâ‘adâ yirmi sehm hisse-i şâyi‘ası dahi akd-i âti’z-zikrin sudûruna değin yedimde olup bin iki yüz altmış dört senesi Zilka‘deti’ş-şerîfesinin on sekizinci günü ve bin iki yüz altmış beş senesi Cumâdelâhiresinin selhi târihleriyle müverrahler ve ol târihlerde rüsûm-i zecriye muhassılı olan sa‘âdetlü es-Seyyid Yakub Paşa’nın mühürleriyle memhûrlar işbu iki kıt‘a sûret hâlâ Zecriye Nâzırı izzetlü Hüseyin Efendi’nin işbu bir kıt‘a ilmühaberi mantûklarınca yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum yirmi sehm hisse-i şâyi‘a-i mezkûreyi tarafeynden îcâb ve kabûl[ü] hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ iki bin beş yüz guruşa merkūm Praşkova’ya bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr iki bin beş yüz guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz eyledim fîmâ-ba’d yirmi sehm hisse-i şâyi‘a-i âlât-ı gedik-i mezkûrda benim aslâ ve kat‘â alâka ve medhalim kalmayıp cem‘an seksen sehm hisse-i şâyi‘a-i âlât-ı gedik-i mezkûr merkūm Praşkova’nın mülk-i mahzı ve hakk-ı sırfı olmağla mebî‘-i mezkûr tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik dedikde gıbbe. Fî 21 Zilka‘de sene 1278 Şuhûdü’l-hâl: Muhzır Süleyman Ağa b. ( ), Muhzır Şakir Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), ve gayruhum