İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 114 Hüküm no: 57 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabsunlu Sarafim v. Yorgi’nin havyarcı ve balık tuzlayıcı dükkânındaki hisselerinin bir kısmını Karyağdıoğlu Lazari ve Tekeoğlu Angeli’ye satması Havyarcı mübâya‘ası, nüshateyn Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen teba‘a-i Devlet-i aliyye’nin Rum milletinden ve havyarcı bakkalı esnâfından Arabsunlu Sarafim v. Yorgi meclis-i şer‘-i şerîf-i hatîrde her biri teba‘a-i Devlet-i aliyye’nin Rum milletinden olduğu bâ-ilmühaber mütehakkık olan esnâf-ı merkūmeden bâ‘iseyi’r-rakīm Karyağdıoğlu Lazari v. Anaştaş ve Tekeoğlu Angeli v. Dimitri muvâcehelerinde esnâf-ı merkūme kahyâsı Yuvan v. İlya hâzır olduğu hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından Kapan-ı Dakîk kapısı hâricinde kâin bir tarafdan Havyarcı Dimitri dükkânı ve bir tarafdan Boyacı Todori dükkânı ve bir tarafdan hısn-ı mezkûr ve taraf-ı râbi‘i tarîk-i âm ile mahdûd mahmiye-i mezkûrede vâki‘ Ayasofya-i Kebîr Câmi’-i şerîfi Evkâfı müsakkafâtından Başkalfa Mehmed Ağa ve Fâtıma Hanım ve Dimitri’nin bâ-temessük-i mütevelli bi’l-icâreteyn taht-ı tasarruflarında olan senevî iki yüz yetmiş altı guruş kirâ-yı kadîmelü İbrahim Ağa dükkânı demekle arîf havyarcı ve balık tuzlayıcı bir bâb bakkal dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla yüz sehm hisse-i şâyi‘ası ber-vech-i vakfiyyet âharın bâ-temessükât-ı mütevelli taht-ı tasarruflarında olup mâ‘adâ yirmi sehm hisse-i şâyi‘ası dahi yedimde olup bin iki yüz kırk yedi senesi Muharremü’l-harâmının on dördüncü günü tarihiyle müverraha ve ol târihde Dârü’l-hilâfeti’l-aliyye kādısı olan Mollacıkzâde Mehmed Servet Efendi merhûmun işbu bir kıt‘a mübâya‘a hücceti mantûkunca yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum yirmi sehm hisse-i şâyi‘a-i mezkûrenin on beş sehm hisse-i şâyi‘asını yedimde bi’l-ibkā mâ‘adâ beş sehm hisse-i şâyi‘asını bundan mukaddemce gāib ani’l-meclis diğer Sarafim v. Nikola’ya semen-i ma‘lûm ve makbûza bâ-hüccet-i şer‘iyye bey‘ ve teslîm etmemle mâ‘adâ ber-vech-i muharrer yedimde ibkā eylediğim on beş sehm hisse-i şâyi‘a-i âlât-ı gedik-i mezkûrun on sehm hisse-i şâyi‘asını yine yedimde bi’l-ibkā mâ‘adâ beş sehm hisse-i şâyi‘a-i âlât-ı gedik-i mezkûrun on sehm hisse-i şâyi‘asını yine yedimde bi’l-ibkā mâ‘adâ beş sehm hisse-i şâyi‘asının iki buçuk sehm hisse-i şâyi‘asını merkūm Lazari’ye be-safka-i vâhide dört bin guruşa ve âhar iki buçuk sehm hisse-i şâyi‘asını dahi kezâlik be-safka-i vâhide merkūm Angeli’ye dört bin guruşa tarafeynden îcâb ve ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bâ-izn-i şürekâ ve bâ-ilmühaber bey‘ ve temlîk ve vech-i lâyıkıyla teslîm eylediğimde onlar dahi ber-vech-i muharrer iştirâ ve temellük ve tesellüm ve kabz u kabûl eylediklerinden sonra semenleri olan cem‘an sekiz bin guruşu tamâmen bana def‘ u teslîm ben dahi yedlerinden bi’t-tamâm ve’l-kemâl ahz u kabz eyledim, fîmâ-ba’d âlât-ı gedik-i mezkûrun beş sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp iki buçuk sehm hisse-i şâyi‘ası merkūm Lazari’nin ve âhar iki buçuk hisse-i şâyi‘asını dahi merkūm Angeli’nin ber-vech-i meşrûh mülk-i müşterâları ve hakk-ı sırfları olmağla mebî‘-i mezkûrların tağrîr ve gabnlarına müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 25 Muharrem sene 1279 Şuhûdü’l-hâl: Muhzır Mehmed Ağa b. ( ), Muhzır Mustafa b. ( ), Muhzır Şakir Ağa b. ( ), Muhzır Feyzullah Ağa b. ( ), ve gayruhum