İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 116 Hüküm no: 58 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadolu’da Kızılbel kazasında sâkin Mehmed Ağa b. Ahmed’in turşucu dükkânını satması Turşucu mübâya‘ası 5000 guruş Kezâlik vilâyet-i Anadolu’da Kızılbel kazasına tâbi‘ Karaağaç Divânı kurâsından Yortan karyesinde sâkin Mehmed Ağa b. Ahmed b. Abdulbâki tarafından sene-i sâbıka yani bin iki yüz yetmiş sekiz senesi Zilhicceti’ş-şerîfesinin on yedinci günü târihiyle müverraha ve ol târihde Viranşehir ve Kızılbel ve Kurukavak kazaları nâ‘ibi olan es-Seyyid Mustafa Hulusi Efendi’nin mührü mutâbık ve me’âli vekâlet-i mezkûreyi beyândan ibâret idüğü cânib-i fetvâhâneden hâmişine tasdîk ve temhîr kılınan işbu bir kıt‘a hüccet-i şer‘iyye mantûkunca husûs-ı âti’l-beyânda vekîl olduğu karye-i mezkûre ahâlisinden olup bu def‘a Âsitâne-i aliyyeye gelen Molla Feyzullah bin Salih ve Mehmed bin İbrahim şehâdetleriyle ber-nehc -i şer‘î sâbit olan Divân-ı mezkûr kurâsından Kıztab karyesi ahâlisinden Mustafa Ağa b. Salih meclis-i şer‘-i şerîf-i enverde turşucu esnâfından bâ‘isü’l-kitâb Osman Ağa b. Ebubekir mahzarında esnâf-ı merkūme kethüdâsı Ahmed Ağa b. İbrahim ve yiğitbaşısı İbrahim Ağa b. Veliyyüddin ve esnâfından Kaliçeciler köşklü İbrahim Ağa b. Ali ve Çukurçeşmeli Mehmed Ağa b. Ahmed ve Lankalı Mehmed Ağa b. Ahmed ve Fenarlı Mustafa Ağa b. Hüseyin ve Kıztaşlı Mustafa Ağa b. Hüseyin ve Beşiktaşlı Hasan Ağa b. Mustafa ve Salmatomruklu es-Seyyid Mehmed Ağa b. Hasan hâzır oldukları hâlde ikrâr-ı tâm ve takrîr-i kelâm edip mahmiye-i İstanbul’da Çarşamba pazarı civârından Derviş Ali mahallesinde Mehmed Ağa Câmi’-i şerîfi kurbünde vâki‘ bir tarafdan el-Hâc Raşid Ağa’nın berber dükkânı arsası ve bir tarafdan Nalıncı İsmail Ağa’nın mu‘attal kasâb dükkânı arsası ve bir tarafdan Mehmed Ağa hamamı ve taraf-ı râbi‘i tarîk-i âm ile mahdûd merhûm-ı mûmâ-ileyh Mehmed Ağa Vakfı müsakkafâtından Hüseyin Ağa b. el-Hâc Mehmed’in bi’l-icâreteyn taht-ı tasarrufunda olan senevî kırk sekiz guruş kirâlı fevkinde bir bâb odayı müştemil üç kepenk bir bâb turşucu dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme bin iki yüz kırk beş senesi Muharremü’l-harâmının beşinci günü târihiyle müverraha ve ol târihde İstanbul Bâb mahkemesinde nâibü’ş-şer‘ olan Mustafa Latif Efendi merhûmun imzâ ve hatemini hâviye işbu bir kıt‘a mübâya‘a hücceti nâtıka olduğu üzere Halil Beyoğlu Mustafa Ağa b. İslam’ın yedinde müstakillen mülkü iken mezbûr Mustafa Ağa ber-minvâl-i muharrer mâlik olduğu âlât-ı gedik-i mezkûrun bin iki yüz altmış dokuz senesi Muharremü’l-harâmının üçüncü günü târihiyle müverraha ve ol târihde kazâ-i mezkûr nâibi olan es-Seyyid İbrahim Zühdü Efendi’nin mührü mutâbık ve meâli mukırr-ı mezbûrun takrîr-i meşrûhunu beyândan ibâret idüğü cânib-i fetvâhâne-i celîleden hâmişine tahrîr ve temhîr kılınan bir kıt‘a hâmiş-i hüccet nâtıka olduğu üzere semen-i ma‘lûm ve makbûza müvekkilim mezbûr Mehmed Ağa’ya bey‘ ve temlîk ve teslîm eylediğinde ol dahi ber-vech-i muharrer iştirâ ve temellük ve tesellüm ve kabz u kabûl etmekle ol-vechile âlât-ı gedik-i mezkûr akd-i âti’z-zikrin sudûruna değin ber mûceb-i hâmiş-i hüccet-i mezkûre ve kethüdâ-yı hâzır-ı mezbûrun takdîm eylediği bir kıt‘a ilmühaber mantûklarınca müvekkilim mezbûr Mehmed Ağa’nın yedinde müstakillen mülk ve hakkı olmağla ben âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile beş bin guruşa mezbûr Osman Ağa’ya bi’l-vekâle bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr beş bin guruşu tamâmen bana def‘ u teslîm ben dahi yedinden bi’l-vekâle tamâmen ahz u kabz eyledim ba‘de’l-yevm âlât-ı gedik-i mezkûr merkūm Osman Ağa’nın mülk-i müşterâsı ve hakk-ı sırfı olup müvekkilim mezbûr Mehmed Ağa’nın aslâ ve kat‘â alâka ve medhali kalmamağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî bi’l-asâle ve izâfetle bi’l-vekâle ibrâ vü ıskāt eyledik dedikde gıbbe. Fî 19 Muharrem sene 1279 Şuhûdü’l-hâl: Muhzır Şakir Ağa b. ( ), Muhzır Mustafa Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum