Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 524 Hüküm no: 631 Orijinal metin no: [109b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Efendi b. Hasan’ın menzilini Safiye bt. Mustafa Ağa’ya satması Husûs-ı âti’l-beyânı mahallinde ketb u tahrîri iltimâs olunmağın savb-ı şer‘den irsâl olunan Mevlânâ Ahmed Efendi b. Yusuf mahmiye-i İstanbul’da Şehzâde kurbunda Emin Nureddin mahallesinde sâkin fahrü’l-müderrisîn Mahmud Efendi b. Hasan nâm kimesnenin menziline varıp zeyl-i kitâbda mastûrü’l-esâmî müslimîn huzûrlarında akd-i meclis-i şer‘-i şerîf eyledikde mahmiye-i mezbûrede Hoca Kasım Gönanî mahallesi sâkinlerinden mefharü’l-kuzât Sâlih Efendi b. eş-Şeyh Ahmed meclis-i ma‘kūd-ı mezbûrda işbu sâhibetü’l-kitâb Safiye Hanım ibnetü’l-merhûm Mustafa Ağa nâm hâtun tarafından husûs-ı âti’l-beyâna vekîl olup zâtını ma‘rifet-i şer‘iyye ârifân olan mûmâ-ileyh Mahmud Efendi ve el-Hâc Mehmed b. İbrahim nâm kimesneler şehâdetleriyle vekâleti sâbite olan el-Hâc Süleyman b. Hasan nâm kimesne mahzarında ikrâr-ı tâm ve takrîr-i kelâm edip akd-i âtî sudûruna değin silk-i mülkümde münselik emlâkimden olup mârrü’z-zikr Hoca Kasım Gönanî mahallesinde vâki‘ bir tarafdan Havva Hâtun mülkü ve bir tarafdan Yusuf nâm kimesne mülkü ve bir tarafdan mahalle-i mezbûre müezzinine meşrûta olan vakıf menzil ve bir tarafdan ba‘zan İbrahim Çelebi mülkü ve ba‘zan Receb Ağa mülkü ve bir tarafdan tarîk-i âm ile mahdûd hâriciyyesinde iki bâb fevkānî odayı ve muhavvatayı ve kenîfi müştemil ve dâhiliyyesinde iki bâb odayı ve iki sofa ve tahtapûş ve bir matbah ve bir kiler ve tahtânî ocak ve fırını ve ahırı ve iki bi’r-i mâyı ve eşcâr-ı müsmire ve gayr-ı müsmireli bahçeyi ve kenîfi müştemil mülk menzilimi cemî‘ tevâbi‘ ve levâhıkı ile müvekkile-i mûmâ-ileyhâ tarafeynden îcâb ve kabûlü hâvî altı yüz esedî guruşa bey‘-i bâtt-ı sahîh-i şer‘î ile bey‘ ve teslîm ol dahi vech-i meşrûh üzre iştirâ [110a] ve kabûl eyledikden sonra semeni olan meblağ-ı mezbûr altı yüz esedî guruşu vekîl-i mezbûr yedinden bi’t-tamâm ve’l-kemâl kabz eyledim ba‘de’l-yevm zikr olunan menzil-i mahdûd mûmâ-ileyhânın mülk-i müşterâsıdır keyfe mâ yeşâ ve yahtâr mutasarrıfe olsun dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde ketb ü tahrîr ba‘dehû ma‘an ba‘s olunan İsmail b. Ali ile meclis-i şerîfe gelip alâ vukū‘ihî haber verdiklerinde mâ hüve’l-vâki‘ bi’t-taleb ketb olundu. Fi’l-yevmi’l-âşir min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İsmail Efendi b. Oruc, Ali Efendi b. Mustafa, Molla Sâbit? b. Mustafa, el-Hâc Ahmed b. Mehmed ve gayruhüm mine’l-huzzâr.