Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 524 Hüküm no: 630 Orijinal metin no: [109b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha bt. Mehmed ve kızının menzillerini Hacı Salih b. Süleyman’a satması Mahmiye-i İstanbul’da Hoca Üveys mahallesinde sâkine Sâliha bt. Mehmed ve kızı Râbia bt. Hüseyin nâm hâtunlar tarafından husûs-ı âti’l-beyâna vekîl olduğu zâtları ma‘rifet-i şer‘iyye ile ârifân Ali Beşe b. Mehmed ve diğer Ali Beşe b. Muharrem şehâdetleriyle şer‘an sâbit olan mezbûre Râbia’nın zevci Hasan b. Süleyman meclis-i şer‘-i şerîf-i enverde işbu bâ‘isü’l-kitâb el-Hâc Sâlih b. Süleyman mahzarında bi’l-vekâle ikrâr ve takrîr-i kelâm edip müvekkiletân-ı mezbûretân Sâliha ve Râbia yedlerinde iştirâken mülk ve hakları olup mahmiye-i mezbûrede Elvanzâde mahallesinde vâki‘ iki tarafından merkūm el-Hâc Sâlih mülkü ve bir tarafdan tarîk-i hâs ve bir tarafdan tarîk-i âm ile mahdûd fevkānî bir bâb oda ve bir sofa ve bi’r-i mâ ve tahtapûş ve bir kenîfi müştemil mülk menzillerini bi cümleti’t-tevâbi‘ ve’l-levâhık ve kâffeti’l-hukūk ve’l-merâfık bey‘-i bâtt-ı kat‘î ile mezbûr el-Hâc Sâlih’e iki yüz altmış beş guruşa bey‘ ve teslîm ve temlîk ol dahi iştirâ ve kabûl ve tesellüm ettiğinden sonra semeni olan meblağ-ı mezbûr iki yüz altmış beş guruşu bana edâ ve teslîm ben dahi müvekkiletân-ı mezbûretân için yedinden tamâmen ahz u kabz eyledim ba‘de’l-yevm menzil-i mezbûr cümle müştemilâtıyla merkūm el-Hâc Sâlih’in mülk-i müşterâsı ve hakk-ı sırfı olmuşdur müvekkiletân-ı mezbûretân menzil-i mezbûrda bir vechile alâka ve medhalleri kalmamışdır müşterî-i merkūm keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: El-Hâc Ebûbekir el-Müezzin, Ali Çelebi b. Yusuf, el-Hâc Abdullah b. Ali, Süleyman Çelebi b. Hüseyin.