İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 140 Hüküm no: 78 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sara’nın babası Filibos v. Pretamos’tan kendisine miras kalan şerbethâne hisseleri için hüccet talebi İhbâr Kezâlik vilâyet-i Anadolu’da Bereketli nâm-ı diğer Çamardı kazâsına tâbi‘ Fertek karyesinde sâkin iken bundan mukaddem fevt olan teba‘a-i Devlet-i aliyye’nin Rum milletinden ve şerbethâneci esnâfından Filibos v. Pretamos v. Dimyat’ın verâseti her biri teba‘a-i Devlet-i aliyye’den karye-i mezkûrede sâkinler zevce-i metrûkesi Angeliko bt. Anaştaş ile sulbî sagīr oğlu Nikola ve sulbiye kebîre kızları Anaştaşya ve Marya ve Sara ve Eftimye’ye münhasıra ve tashîh-i mesele-i mirâsları kırık sekiz sehimden olup sihâm-ı mezkûreden altı sehmi zevce-i merkūme Angeliko’ya ve on dört sehmi sagīr-i merkūm Nikola’ya ve yedişer sehimden yirmi sekiz sehmi merkūmât Anaştaşya ve Marya ve Sara ve Eftimye’ye isâbeti lede’ş-şer‘i’l-enver zâhir ve mütehakkık oldukdan sonra bâ‘isetü’r-rakīm merkūme Sara tarafından husûs-ı âti’l-beyânda vekîl-i şer‘îsi teba‘a-i Devlet-i aliyye’nin Rum milletinden ve şerbethâneci esnâfından Avraham v. Pretamos meclis-i şer‘-i şerîf-i hatîrde her biri teba‘a-i Devlet-i aliyye’den esnâf-ı merkūmenin Beyoğlu kolu ustabaşısı Dülbendcioğlu Andon v. Ohannes ve esnâfından Sa‘lebçi Hanı şerbethânesi ustası Yovakim v. İstefan ve Bakla Hanı şerbethânesi ustası Avraham v. Kiryako ve Çavuş Bodos v. Kostandi hâzır oldukları hâlde bi’l-vekâle takrîr-i kelâm ve ta‘bîr ani’l-merâm edip mahmiye-i İstanbul’da Sultan hamamı kurbünde Kazgancılar civârında vâki‘ Kapudan-ı esbak merhûm Piyale Paşa Vakfı müsakkafâtından Çorabçı Hânı demekle arîf bir bâb hân derûnunda süflâ-yı zemînde kâin merhûm-ı müşârün-ileyh Piyale Paşa Vakfı müsakkafâtından gāib ani’l-beled Kurdoğlu Bünyad v. Pretamos’un bi’l-icâreteyn taht-ı tasarrufunda olan şehriye on guruş kirâlı peykeyi hâvî bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla sekiz buçuk sehm yarım ve südüs pul hisse-i şâyi‘ası bin iki yüz elli senesi şehr-i Rebî‘ülevveli’nin on beşinci günü târihiyle müverrah ve ol târihde Mukata‘a-i rüsûm-i zecriye muhassılı olan es-Seyyid İbrahim Edhem Efendi’nin mührüyle memhûr bir kıt‘a ve altı sehmi bir sülüs pul hisse-i şâyi‘ası şehr-i mezkûrun yirmi birinci günü târihiyle müverrah muhassıl-ı mûmâ-ileyh es-Seyyid İbrahim Edhem Efendi’nin mührüyle memhûr bir kıt‘a ve beş sehm bir buçuk pul nısf sümün an-rub‘ pul hisse-i şâyi‘ası dahi bin iki yüz elli yedi senesi Zilhicceti’ş-şerîfesinin yirmi yedinci günü târihiyle müverrah ve ol târihde Mukāta‘a-i rüsûm-i zecriye muhassılı olan Mehmed Nuri Beyefendi’nin mührüyle memhûr bir kıt‘a ki cem‘an üç kıt‘a sûret ve hâlâ zecriye nâzırı izzetlü Hüseyin Efendi’nin i‘tâ eylediği bir kıt‘a ilmühaber mantûklarınca müteveffâ-yı merkūm Filibos’un hayâtında ile’l-fevt yedinde mülkü ve ba‘de fevtihî âlât-ı gedik-i mezkûrun hises-i merkūmesi ber tashîh-i mezkûr merkūme Angeliko ve sagīr-i merkūm Nikola ve müvekkilem merkūme Sara’ya ve merkūmât Anaştaşya ve Marya ve Eftimye’ye mevrûs olup lakin âlât-ı gedik-i mezkûrun hises-i merkūmesinin ber tashîh-i mezkûr yedi sehm hisse-i şâyi‘ası ber-minvâl-i muharrer müvekkilem merkūme Sara’nın mülkü olduğunu nâtık yedinde sened-i şer‘î olmamağla hakīkat-i hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile kıbel-i şer‘den âlât-ı gedik-i mezkûrun hises-i merkūmesinin ber tashîh-i mezkûr yedi sehm hisse-i şâyi‘ası ber-vech-i meşrûh müvekkilem merkūme Sara’nın mülkü olduğunu nâtıka yedine bir kıt‘a hüccet-i şer‘iyye i‘tâ buyurulmak murâdımdır deyu bi’l-vekâle istid‘â etdikde hâl vekîl-i merkūm Avraham’ın bâlâda bast ve beyân eylediği minvâl üzere olduğunu husûs-ı mezkûre vukūf-ı tâmları olan esnâf-ı hâzırûn-ı merkūmûndan her biri alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu. Fî 24 Zilhicce sene 1278 Şuhûdü’l-hâl: Eş-şahidune’s-sabıkūn