İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 139 Hüküm no: 77 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Angeliko bt. Anaştaş’ın ölen eşinden miras kalan şerbethâne hisseleri için hüccet talebi Çorabçı hânında şerbethâne ihbârı, 6 kıt‘a hüccet Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin mustakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen vilâyet-i Anadolu’da Bereketli nâm-ı diğer Çamardı kazâsına tâbi‘ Fertek karyesinde sâkin iken bundan mukaddem fevt olan teba‘a-i Devlet-i aliyye’nin Rum milletinden ve şerbethâneci esnâfından Filibos v. Pretamos v. Dimyat’ın verâseti her biri teba‘a-i Devlet-i aliyye’den karye-i mezkûrede sâkinler zevce-i metrûkesi Angeliko bt. Anaştaş ile sulbî sagīr oğlu Nikola ve sulbiye kebîre kızları Anaştaşya ve Marya ve Sara ve Eftimye’ye münhasıra ve tashîh-i mesele-i mirâsları kırk sekiz sehimden olup sihâm-ı mezkûreden altı sehmi zevce-i merkūme Angeliko’ya ve on dört sehmi sagīr-i merkūm Nikola’ya ve yedişer sehimden yirmi sekiz sehmi merkūmât Anaştaşya ve Marya ve Sara ve Eftimye’ye isâbeti lede’ş-şer‘i’l-enver zâhir ve mütehakkık oldukdan sonra bâ‘isetü’r-rakīm merkūme Angeliko tarafından husûs-ı âti’l-beyânda vekîl-i şer‘îsi teba‘a-i Devlet-i aliyye’nin Rum milletinden ve şerbethâneci esnâfından Avraham v. Pretamos meclis-i şer‘-i şerîf-i hatîrde her biri teba‘a-i Devlet-i aliyye’den ve esnâf-ı merkūmenin Beyoğlu kolu ustabaşısı Dülbendcioğlu Andon v. Ohannes ve esnâfından Sa‘lebçi Hanı şerbethânesi ustası Yovakim v. İstefan ve Bakla Hanı şerbethânesi ustası Avraham v. Kiryako ve Çavuş Bodos v. Kostandi hâzır oldukları hâlde bi’l-vekâle takrîr-i kelâm ve ta‘bîr ani’l-merâm edip mahmiye-i İstanbul’da Sultan hamamı kurbünde Kazgancılar civârında vâki‘ Kapudan-ı esbak merhûm Piyale Paşa Vakfı müsakkafâtından Çorabçı Hanı demekle ma‘rûf olan bir bâb hân derûnunda süflâ-yı zemînde kâin merhûm-ı müşârun-ileyh Piyâle Paşa Vakfı musakkafâtından gāib ani’l-beled Kurdoğlu Bünyad v. Pretamos’un bi’l-icâreteyn taht-ı tasarrufunda olan şehriye on guruş kirâlı peykeyi hâvî bir bâb şerbethane derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla sekiz buçuk sehm yarım ve südüs pul hisse-i şâyi‘ası bin iki yüz elli senesi şehr-i Rebî‘ülevveli’nin on beşinci günü târihiyle müverrah ve ol târihde Mukāta‘a-i rüsûm-i zecriye muhassılı olan es-Seyyid İbrahim Edhem Efendi’nin mührüyle memhûr bir kıt‘a ve altı sehmi bir sülüs pul hisse-i şâyi‘ası şehr-i mezkûrun yirmi yedinci günü târihiyle müverrah ve muhassıl-ı mûmâ-ileyh es-Seyyid İbrahim Edhem Efendi’nin mührüyle memhûr bir kıt‘a ve beş sehm bir buçuk pul nısf sümün an-rub‘ pul hisse-i şâyi‘asını dahi bin iki yüz elli yedi senesi Zilhicceti’ş-şerîfesinin yirmi yedincigünü târihiyle müverrah ve ol târihde Mukata‘a-i rüsûm-i zecriye muhassılı olan Mehmed Nuri Beyefendi’nin mührüyle memhûr bir kıt‘a ki cem‘an üç kıt‘a sûret ve hâlâ zecriye nâzırı izzetlü Hüseyin Efendi’nin i‘tâ eylediği bir kıt‘a ilmühaber mantûklarınca müteveffâ-yı merkūm Filibos’un hayâtında ile’l-fevt yedinde mülkü ve ba‘de fevtihî âlât-ı gedik-i mezkûrun hises-i merkūmesi ber tashîh-i merkūm müvekkilem merkūme Angeliko ve sagīr-i merkūm Nikola ve merkūmât Anaştaşya ve Marya ve Sara ve Eftimye’ye mevrûs olup lâkin âlât-ı gedik-i mezkûrun hises-i merkūmesinin ber tashîh-i mezkûr altı sehm hisse-i şâyi‘ası ber-minvâl-i muharrer müvekkilem merkūme Angeliko’nun mülkü olduğunu nâtık yedinde sened-i şer‘î olmamağla hakīkat-i hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile kıbel-i şer‘den âlât-ı gedik-i mezkûrun hises-i merkūmesinin ber tashîh-i mezkûr altı sehm hisse-i şâyi‘ası ber-vech-i meşrûh müvekkilem merkūme Angeliko’nun mülkü olduğunu nâtıka yedine bir kıt‘a hüccet-i şer‘iyye i‘tâ buyurulmak murâdımdır deyu bi’l-vekâle istid‘â etdikde hâl vekîl-i merkūm Avraham’ın bâlâda bast ve beyân eylediği minvâl üzere olduğu husûs-ı mezkûre vukūf-ı tâmları olan esnâf-ı hâzirûn-ı merkūmûndan her biri alâ tarîki’ş-şehâde haber vermeleriyle vâki‘i hâl hıfzan li’l-makāl işbu vesîka-i enîka ketb ü imlâ olundu. Fî 24 Zilhicce sene 1278 Şuhûdü’l-hâl: Muhzır Süleyman Ağa b. ( ), Muhzır İsmail Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), ve gayruhum