İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 154 Hüküm no: 88 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Takohi bt. Dülbendçi Güllaboğlu Artin’nin sahip olduğu şerbethânenin yarısını kızı Drohi’ye satması Şerbethâne mübâya‘ası Beyoğlu’nda 18385,5 guruş Kezâlik tahakkuk-ı özr-i şer‘îye binâen husûs-ı âti’lbeyânın mahallinde ketb ü tahrîri için savb-ı şer‘-i enverden bi’l-iltimâs irsâl olunan Kâtib es-Seyyid el-Hâc Ahmed Aziz Efendi mahrûse-i Galata’ya muzâfe Bebek nâm-ı diğer Hümâyûnabâd karyesinde vâki‘ teba‘a-i Devlet-i aliyye’nin Ermeni milleti nisvânından müteveffâ Tüysüzoğlu Kuyumcu İstepan zevcesi Takohi bt. Dülbendçi Güllaboğlu Artin’in müste’cireten sâkine olduğu menzile varıp zeyl-i rakîmde muharrerü’l-esâmî kimesneler huzûrlarında akd-i meclis-i şer‘-i âlî etdikde şahsı kesân-ı merkūmun ta‘rîfleriyle mu‘arrefe olan merkūme Takohi meclis-i ma‘kūd-ı mezkûrde sadriye kebîre kızı teba‘a-i Devlet-i aliyye’nin Ermeni milleti nisvânından bâ‘isetü’r-rakīm Drohi bt. el-merkūm İstepan’ın zevci ve tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’nin Ermeni milletinden ve Avrupa tüccârından Kolonoğlu Avadis v. Mikail muvâcehesinde şerbethâneci esnâfının Beyoğlu kolu ustabaşısı teba‘a-i Devlet-i aliyye’nin Ermeni milletinden Andon v. Ohannes hâzır olduğu hâlde ikrâr-ı tâm ve takrîr-i kelâm edip mahrûse-i merkūme hâricinde Beyoğlu civârında Balıkçılariçi nâm mahalde vâki‘ bir tarafdan hâlâ Ticaret Nazırı atûfetlü Safvet Efendi hazretlerinin menzili ve bir tarafdan Molla Ali’nin sığır kasâbı dükkânı ve bir tarafdan Françesko v. Fırıncı Cuvanni menzili ve taraf-ı râbi‘i tarîk-i âm ile mahdûd Bezzâz el-Hâc Ahmed Ağa Vakfı müsakkafâtından bâ-temessük-i mütevelli taht-ı tasarrufumda olan şehriye altmış guruş kirâlı iki yüz yirmi beş numaralı Çarhişi şerbethâne demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme akd-i âti’z-zikrin sudûruna değin yedimde olup bin iki yüz altmış dokuz senesi Zilhicceti’ş-şerîfesinin beşinci günü târihiyle müverrah Muhassıllık-ı Rusûm-ı Zecriyenin bir kıt‘a sûreti ve hâlâ zecriye nâzırı izzetlü Hüseyin Efendi’nin işbu bir kıt‘a ilmühaberi mantûklarınca müstakilleten yedimde mülk ve hakkım olmağla ben ber-minvâl-i muharrer mâlike olduğum âlât-ı gedik-i mezkûrun nısf hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile kızım ve müvekkile-i merkūme Drohi’ye bir yük on sekiz bin üç yüz seksen beş buçuk guruşa bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm bir yük on sekiz bin üç yüz seksen beş buçuk guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt her birimiz ber-vech-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrun âhar nısf hisse-i şâyi‘a-i merkūmesinde benim aslâ ve kat‘â alâka ve medhalim kalmayıp müvekkile-i merkūme Drohi’nin mülk-i müşterâsı ve hakk-ı sırfı olmuşdur gıbbe’t-tasdîki’ş-şer‘î vâki‘ hâli kâtib-i mûmâ-iley mahallinde ketb ve tahrîr ma‘ân meb‘ûs ümenâ-i şer‘le. Ahirihî. Fî 16 Muharrem sene 1279 Şuhûdü’l-hâl: Muhzır Süleyman Ağa b. ( ), Çukadâr İbrahim Ağa b. ( ), Müezzin es-Seyyid el-Hâc Mehmed Efendi b. Zeynelabidin Muhtâr-ı evvel es-Seyyid Mehmed Ağa b. Mehmed Said karye-i merkūme imâmı İsmail Hakkı Efendi b. el-Hâc Ali karye-i mezkûre kahyâsı Nikot v. Andon Sarraf mübâya‘acı Manuk v. Abraham mübâya‘a-i merkūmenin sadrî kebîr oğlu Artinve gayruhum