İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 156 Hüküm no: 89 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa b. Hüseyin’den mirasçılarına kalan iki oturakçı dükkânının Mustafa Efendi b. Hâfız Yusuf’a satılması Oturakçı dükkânı mübâya‘ası Galata’da 15000 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen medîne-i Hazret-i Ebâ Eyüb el-Ensârî radiye anhü Rabbühü’l-bârî mahallâtından Baba Haydar mahallesinde sâkin iken bundan mukaddem vefât eden liman çavuşlarından Ömer Ağa b. Hüseyin b. Abdullah’ın verâseti zevce-i menkûha-i metrûkesi Emine Hanım bt. Süleyman ile sulbiye sagīre kızı Fâtıma Raife ve li-ebeveyn kız karındaşı Rukiye Hanım’a münhasıra olduğu lede’ş-şer‘i’l-enver zâhir ve mütehakkık oldukdan sonra sagīre-i mezbûre Fâtıma Raife’nin vâlidesi ve tesviye-i umûruna kıbel-i şer‘den mansûbe vasîsi zâtı ta‘rîf-i şer‘î ile mu‘arrefe olan mezbûre Emine Hanım uht-i mezbûre Rukiye Hanım’ın sadrî kebîr oğlu ve tarafından husûs-ı âti’l-beyânda vekîl olduğu zâtını ârifân Muhzır Servet Ağa b. Mehmed Arif ve Mekteb-i Harbiye-i Şâhâne kâtib-i sânîsi Mehmed Efendi b. Ebubekir şehâdetleriyle ber-nehc-i şer‘î sâbit olan tütüncü esnâfından Ahmed Ağa b. Mehmed hâzır olduğu hâlde meclis-i şer‘-i münîrde cennet-mekân firdevs-âşiyân merhûm ve mağfiret-nişân Sultan Bayezid-i Velî Hân aleyhi sicâlü’l-gufrân hazretlerinin muvakkıthânesi muvakkıtı bâ‘isü’l-kitâb Mustafa Efendi b. Hâfız Yusuf mahzarında mahrûse-i Galata’da vâki‘ oturakçı esnâfının kethüdâsı İdris Ağa b. Veliyyüddin tarafından mürsel vekîli mezbûr Servet Ağa hâzır olduğu hâlde bi’l-asâle ve bi’l-vesâye ikrâr-ı tâm ve takrîr-i kelâm edip mahrûse-i Galata’da Câmi’-i Kebîr mahallesinde Bât pazarı nâm mahalde münâdîlere mahsûs dükkân sırasında vâki‘ iki tarafdan es-Seyyid Mehmed b. es-Seyyid Hasan ve zevcesi Şerife Meryem Hatun bt. Veliyyüddin dükkânları ve bir tarafdan Mehmed Efendi dükkânı ve taraf-ı râbi‘i tarîk-i âm ile mahdûd merhûm Kadı Hüsameddin Vakfı müsakkafâtından Âişe Hanım bt. el-Hâc Mehmed Tahir’in bi’l-icâreteyn taht-ı tasarrufunda olan şehriye elli para kirâlı bir kemer tahtında birbirine muttasıl beynehümâları tahta perde ile fâsılalı iki bâb oturakçı dükkânları derûnlarında mevcûde beyne’l-esnâf gedik ta‘bîr olunur âlât-ı lâzime-i ma‘lûmeleri yedimde olup bin iki yüz kırk yedi senesi Cumâdelâhiresi’nin on sekizinci günü ve sene-i merkūme Recebi’l-ferdinin yirmi beşinci günleri târihleriyle müverrahalar ve ol târihde mahrûse-i mezkûre kādısı olan Uncuzâde Hafız Mustafa Efendi merhûmun imzâ ve hatmlarıyla mahtûme ik kıt‘a mübâya‘a hücceti ve bin iki yüz yetmiş dört senesi Saferi’l-hayrının yirmi altıncı günü târihiyle müverraha ve ol târihde medîne-i Üsküdar nâibi olan müderrisîn-i kirâmdan mekremetlü es-Seyyid Ahmed Hilmi Efendi’nin imzâ ve hatemini hâviye bir kıt‘a mübâya‘a hücceti ve kethüdâ-yı mezbûrun takdîm eylediği bir kıt‘a ilmühaber mantûklarınca zevcim müteveffâ-yı mezbûr Ömer Ağa’nın hayâtında ile’l-vefât müstakillen yedinde mülkü ve ba‘de vefâtihî benimle vasîsi olduğum sagīre-i mezbûre Fâtıma Raife ve müvekkile-i mezbûre Rukiye Hanım’a mevrûs olmağla ben bi’l-asâle ve bi’l-vesâye ve vekîl-i hâzır-ı mezbûr Ahmed Ağa dahi müvekkilesi mezbûre Rukiye Hanım’a izâfetle bi’l-vekâle ber-minvâl-i muharrer mâlik olduğumuz âlât-ı gedik-i mezkûru medîne-i Eyüb mahkemesinden vurûd eden bir kıt‘a ilmühaber mantûkunca münâdî Galatalı Ahmed Ağa nidâsıyla sûk-ı sultânî ve mecma‘-ı nâs olan mahallerde lede’l-müzâyede ve gıbbe inkıtâ‘ı’r-rağbe el-yevm semen-i misli idüğü cerîdede mazbûtü’l-esâmî müsliminin alâ tarîki’ş-şehâde ihbârlarıyla zâhir ve mütehakkık olan on beş bin guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Mustafa Efendi’ye bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on beş bin guruşu tamâmen bize def‘ u teslîm biz dahi yedinden bi’l-asâle ve bi’l-vesâye ve bi’l-vekâle tamâmen ahz u kabz ve müteveffâ-yı mezbûrun defter-i kassâmına idhâl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ancak bi’l-asâle ve izâfetle bi’l-vekâle ibrâ vü ıskāt eyledik ba‘de’l-yevm âlât-ı gedik-i mezkûrlarda benimle sagīre-i mezbûre Fâtıma Raife ve müvekkile-i mezbûre Rukiye Hanım’ın aslâ ve kat‘â alâka ve medhalimiz kalmayıp mezbûr Mustafa Efendi’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 13 Zilka‘de sene 1278 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. Muhzır Şakir Ağa b.( ), Muhzır Feyzullah Ağa b. ( ), ve gayruhum