İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 165 Hüküm no: 95 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çakıroğlu Hacı Abdurrahman Ağa b. İsmail’den miras kalan çilingir dükkânı hisselerine dair mirasçılarının hüccet talebi Çilingir ihbârı Galata Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahrûse-i Galata’ya muzâfe kasaba-i Tophane mahallâtından el-Hâc Memi mahallesinde sâkin iken bundan mukaddem vefât eden çilingir esnâfından Çakıroğlu el-Hâc Abdurrahman Ağa b. İsmail b. Süleyman’ın verâseti zevce-i menkûha-i metrûkesi Hâce Saliha Hanım bt. Osman ile li-ebeveyn er karındaşı Ali Ağa’ya münhasıra ve tashîh-i mesele-i mirâsları dört sehimden olup sihâm-ı mezkûreden bir sehmi zevce-i mezbûre Hâce Saliha Hanım’a ve üç sehmi dahi mezbûr Ali Ağa’ya isâbeti lede’ş-şer‘i’l-enver zâhir ve mütehakkık oldukdan sonra bâ‘isetü’l-kitâb nefsinden asîl ve zevce-i mezbûre Hâce Saliha Hanım tarafından husûs-ı âti’l-beyânda vekîl-i şer‘îsi mezbûr Ali Ağa meclis-i şer‘-i şerîf-i enverde esnâf-ı merkūme kethüdâsı Ali Ağa b. el-Hâc Ahmed ve yiğitbaşısı Ömer Ağa b. İsmail ve esnâfından İbrahim Efendi b. Hüseyin ve sandıkçı esnâfı çavuşu Ahmed Ağa b. Abdullah ve esnâfından Ömer Efendi b. Hüseyin ve Mahmud Ağa b. el-Hâc Mustafa hâzır oldukları hâlde bi’l-verâse takrîr-i kelâm ve ta‘bîr ani’l-merâm edip mahrûse-i merkūmede Kemankeş Kara Mustafa Paşa mahallesinde Sandıkçılarbaşı nâm mahalde vâki‘ bir tarafdan mukaddemâ Sofu Mustafa ve el-yevm sandıkçı Mehmed Ağa’nın sandıkçı dükkânı ve bir tarafdan mukaddemâ el-Hâc Hasan’ın ve el-yevm sandıkçı esnâfı kethüdâsı el-Hâc İsmail Ağa’nın sandıkçı dükkânı ve bir tarafdan Arab Abdullah Ağa menzili ve taraf-ı râbi‘i tarîk-i âm ile mahdûd merhûm Tercümân Yunus Bey Vakfı müsakkafâtından nısf hisse-i şâyi‘ası müteveffâ-yı mezbûr el-Hâc Abdurrahman Ağa bilâ veled vefâtıyla mahlûlünden cânib-i vakf-ı mezkûrun ve rub‘ hisse-i şâyi‘ası gāibe ani’l-meclis Ümmügülsüm Hanım bt. Mustafa’nın ve diğer rub‘ hisse-i şâyi‘ası kezâlik gāib ani’l-meclis el-Hâc Mehmed Ağa b. Emir Osman’ın taht-ı tasarruflarında olan şehriye üç guruş kirâlı bir bâb çilingir dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin nısf hisse-i şâyi‘ası ber-vech-i vakfiyyet hâzır-ı mezbûr İbrahim Efendi ile gāib-i mezbûr el-Hâc Mehmed Ağa’nın bi’l-icâreteyn taht-ı tasarruflarında olup mâ‘adâ âhar nısf hisse-i şâyi‘ası dahi yedimde olup bin iki yüz otuz beş senesi Muharremü’l-haramının onuncu günü târihiyle müverraha mahrûse-i merkūme mahkemesi sicill-i mahfûzundan muhrece işbu bir kıt‘a hüccet-i şer‘iyye mantûkunca karındaşım müteveffâ-yı mezbûr el-Hâc Abdurrahman Ağa’nın hayâtında ile’l-vefât yedinde mülkü ve ba‘de vefâtihî benimle müvekkilem mezbûre Hace Saliha Hanım’a ber tashîh-i mezkûr mevrûs olup lakin nısf hisse-i şâyi‘a-i âlât-ı gedik-i mezkûr ber-minvâl-i muharrer benimle müvekkilem mezbûrenin el-yevm mülkümüz olduğunu nâtık yedimizde sened-i şer‘î olmamağla hakīkat-ı hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile kıbel-i şer‘den nısf hisse-i şâyi‘a-i âlât-ı gedik-i mezkûr ber-minvâl-i muharrer benimle müvekkilem mezbûre Hâce Saliha Hanım’ın el-yevm mülkümüz olduğunu nâtıka yedimize bir kıt‘a hüccet-i şer‘iyye i‘tâ buyurulmak murâdımızdır deyu mazmûnu takrîr-i meşrûhuna mutâbık zikr olunan Kemankeş Kara Mustafa Paşa mahallesi imâm ve muhtârânı ve kethüdâ-yı hâzır-ı mezbûr Ali Ağa’nın mühürleriyle memhûr bir kıt‘a ilmühaber ibrâz ile bi’l-asâle ve bi’l-vekâle istid‘â etdikde hâl asîl ve vekîl-i merkūm Ali Ağa’nın bâlâda bast ve beyân eylediği minvâl üzere olduğunu husûs-ı mezkûre vukūf-ı tâmları olan hâzirûn-ı mezbûrûn ile sâir cerîdede mazbûtü’l-esâmî müslimînden her biri alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu. Fî 23 Safer sene 1279 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. ( ), Muhzır Mehmed Ağa b. ( ), Muhzır Ahmed Ağa b. ( ), Muhzır Feyzullah Ağa b. ( ), ve gayruhum