İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 164 Hüküm no: 94 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayriye tüccârından Haleblizâde Ahmed Efendi’nin Zekiye Hanım’dan aldığı borç karşılığında yanmış değirmen ve ekmek fırınındaki hisselerinin bir kısmını rehin vermesi İdâne an mâlı Zekiye Hanım 20000 guruş Mahmiye-i İstanbul’da Sarıgez kurbünde İskender Paşa mahallesinde sâkin Hayriye tüccârından Haleblizâde Ahmed Efendi b. Süleyman meclis-i şer‘-i şerîf-i enverde mahmiye-i mezkûrede Kadı Çeşmesi kurbünde Yarhisâr Mustafa Muslihiddin mahallesinde sâkine bâ‘isetü’l-kitâb Zekiye Hanım bt. Mehmed bin Abdullah’ın zevci ve tarafından husûs-ı âti’l-beyânda vekîl olduğu zâtını ârifân Divân-ı De‘âvî çavuşlarından Kadı Çeşmeli Hasan Ağa b. Halil ve ekmekçi esnâfı saçcılarından Topal İbrahim Edhem Ağa b. Mustafa şehâdetleriyle ber-nehc -i şer‘î sâbit olan Divân-ı De‘âvî çavuşânı Kılavuz Hâmid Ahmed Ağa b. el-Hâc Mehmed mahzarında esnâf-ı merkūme kethüdâsı İbrahim Ağa b. Ahmed ile cerîdede mazbûtü’l-esâmî nizâm ustaları taraflarından mürsel vekîlleri Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip mahmiye-i mezkûrede Langa Yenikapısı dâhilinde Kâtib Kasım mahallesinde Dörtyolağzı nâm mahalde köşe başında vâki‘ bir tarafdan Kasâb Mehmed Ağa’nın kasâb dükkânı ve bir tarafdan Bakkal Yuvan’ın bakkal dükkânı ve tarafeyni tarîk-i âm ile mahdûd merhûme Haseki Sultan Vakfı musakkafâtından benimle gāib ani’l-meclis Muslizâde Mehmed Efendi b. İsmail’in bi’l-icâreteyn taht-ı tasarrufumuzda olan şehriye otuz dokuz guruş kirâlı bir bâb habbâz fırını ve ona merbût beş horoslu ekmekçi ve bir horoslu uncu ki cem‘an altı horoslu bir bâb mühterik değirmen derûnunda müstahlas ve mevcûde beyne’l-esnâf gedik ta‘bîr olunur yirmi re’s bârgir ekmekçi ve dört re’s bârgir uncu ki cem‘an yirmi dört re’s bârgir ve onlara tâbi‘ sâir âlât-ı lâzime-i ma‘lûmenin on iki re’s bârgir ve onlara isâbet eden âlât-ı sâiresi gāib-i mezbûr Mehmed Efendi’nin yedinde mülkü olup mâ‘adâ âhar on iki re’s bârgir ve onlara îcâb eden âlât-ı sâiresi yedimde olup bin iki yüz yetmiş dört senesi Zilka‘deti’ş-şerîfesinin on dokuzuncu günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan semâhatlü Mustafa Âsım Efendi hazretlerinin imzâ ve hatemlerini hâviye işbu bir kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber nâtık olduğu üzere yedimde mülk ve hakkım olmağla ben müvekkile-i mezbûre Zekiye Hanım’ın mâlından vekîl-i mezbûr Ahmed Ağa yedinden zikr-i âti istidâne ve iştirâ ile zimmetime ta‘alluk edecek meblağ mukābelesinde ber-minvâl-i muharrer mâlik olduğum on iki re’s bârgir ve onlara îcâb eden âlât-ı sâirenin dokuz re’s bârgir ve onlara iktizâ eden âlât-ı sâiresini yedimde bi’l-ibkā mâ‘adâ üç re’s bârgir ve onlara iktizâ eden âlât-ı sâiresini gāib-i mezbûr Mehmed Efendi’nin izniyle rehn vaz‘ ve vekîl-i mezbûr Ahmed Ağa’ya teslîm eylediğimde ol dahi ber-vech-i muharrer bi’l-vekâle irtihân ve kabz u kabûl etdikden sonra vekîl-i mezbûr Ahmed Ağa müvekkilesi mezbûre Zekiye Hanım’ın mâlından bana bi’l-vekâle yirmi bin guruş işbu meclis-i şer‘de ikrâz ve teslîm ben dahi yedinden iktirâz ve kabz ve umûruma sarfla istihlâk edip meblağ-ı merkūm ile semeni işbu târih-i kitâbdan bir sene tamâmına değin müeccel ve mev‘ûduna müvekkilesi mezbûre Zekiye Hanım’ın mâlından vekîl-i mezbûr Ahmed Ağa yedinden bi-safkatin vâhidetin iştirâ ve kabz eylediğim iki aded hilâlî koyun sâ‘ati semeninden dahi üç bin guruş ki cem‘an yirmi üç bin guruş zimmetimde müvekkile-i mezbûre Zekiye Hanım’a vâcibü’l-edâ ve lâzimü’l-kazâ sahîhan deynimdir dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 3 Safer sene 1279 Şuhûdü’l-hâl: Muhzır İsmail Ağa b. ( ), Muhzır Şakir Ağa b. ( ), Muhzır el-Hâc Yusuf Ağa b. ( ), Muhzır Feyzullah Ağa b. ( ), ve gayruhum