İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 168 Hüküm no: 97 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şamlı Hacı Esad Ağa’nın tütüncü dükkânını Enderûn-ı hümâyûn hocası Ulvizâde Hacı Hasan Efendi’ye satması Tütüncü mübâya‘ası 18000 guruş Kezâlik Hayriye tüccârından Şamî el-Hâc Esad Ağa b. Mehmed Edib meclis-i şer‘-i şerîf-i enverde mevâlî-i izâmdan Enderûn-ı hümâyûn hocası bâ‘isü’l-kitâb Ulvizâde fazîletlü el-Hâc Hasan Efendi b. es-Seyyid Ahmed mahzarında tütüncü esnâfının kethüdâsı es-Seyyid el-Hâc Mehmed Latif Efendi b. İsmail hâzır olduğu hâlde ikrâr-ı tâm ve takrîr-i kelâm edip mahmiye-i İstanbul’da Süleymaniye Câmi‘-i şerîf-i civârında Tiryaki Çarşısı nâm mahalde kâin bir tarafdan Berber Ahmed Ağa’nın berber dükkânı ve bir tarafdan medrese ve bir tarafdan Artin’in berber dükkânı ve taraf-ı râbi‘i tarîk-i âm ile mahdûd cennet-mekân adn-i âşiyân merhûm ve mağfiret-nişân Sultan Süleyman Hân aleyhi sicâlü’l-gufrân hazretlerinin evkāf-ı celîleleri müsakkafâtından ketebeden Nuri Efendi’nin bi’l-icâreteyn taht-ı tasarrufunda olan şehriye üç guruş kirâlı bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yedimde olup bin iki yüz yetmiş iki senesi Zilka‘deti’ş-şerîfesinin onuncu günü tarihiyle müverraha ve ol târihde Dârü’l-hilâfeti’l-aliyye kādısı olan Osman Efendizâde Mehmed Emin Efendi merhûmun imzâ ve hatemini hâviye işbu bir kıt‘a hüccet-i şer‘iyye ve kethüdâ-yı hâzır-ı mûmâ-ileyhin takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedimde müstakillen mülk ve hakkım olmağla ben âlât-ı lâzime-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bi-safkatin vâhide on sekiz bin guruşa mûmâ-ileyh el-Hâc Hasan Efendi’ye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on sekiz bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz eyledim ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp mûmâ-ileyh el-Hâc Hasan Efendi’nin mülk-i müşterâsı ve hakk-ı sırfı olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, dedikde gıbbe. Fî 5 Rebî‘ülevvel sene 1279 Şuhûdü’l-hâl: Muhzır İsmail Ağa b. ( ), Muhzır Şakir Ağa b. ( ), Muhzır el-Hâc Salih Ağa b. ( ), Muhzır el-Hâc Yusuf Ağa b. ( ), Muhzır Feyzullah Ağa b. ( ), ve gayruhum