İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 169 Hüküm no: 98 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım bt. Mustafa’nın attâr dükkânını Salih Efendi b. Hacı Ali’ye satması Attâr mübâya‘ası 13500 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden ma‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahrûse-i Galata’ya muzâfe Kasımpaşa’da Kulaksız Ahmed Kapudan mahallesinde sâkine zâtı ta‘rîf-i şer‘î ile mu‘arrefe olan Âişe Hanım bt. Mustafa meclis-i şer‘-i şerîf-i hatîrde mahrûse-i merkūmede Yolcuzâde mahallesinde sâkin teba‘adan bâ‘isü’l-kitâb Salih Efendi b. el-Hâc Ali mahzarında attâr esnâfı kethüdâsı el-Hâc İbrahim Edhem Efendi b. Salih tarafından mürsel vekîli esnâf-ı merkūme yiğitbaşısı es-Seyyid Ahmed Efendi b. el-Hâc Mustafa ve zikr olunan Kulaksız Ahmed Kapudan mahallesinde sâkin berber esnâfından es-Seyyid el-Hâc Mehmed Ağa b. İbrahim Edhem ve sâlifü’l-beyân Yolcuzâde mahallesinde sâkin Serenci el-Hâc Hasan Ağa b. el-Hâc Hüseyin hâzır oldukları hâlde ikrâr-ı tâm ve takrîr-i kelâm edip mahrûse-i merkūme hâricinde Kalafatyeri nâm mahalde vâki‘ bir tarafdan kalafatçı esnâfına mahsûs arsa-i hâliye ve bir tarafdan Abdurrahman Ağa’nın tütüncü dükkânı ve bir tarafdan Marangoz Hasan Ağa’nın marangoz dükkânı ve taraf-ı râbi‘i tarîk-i âm ile mahdûd merhûm Nişâncı Cedîd Mehmed Paşa Vakfı müsakkafâtından hâriciye teşrîfatcısı sa‘âdetlü Kamil Beyefendi hazretlerinin vâlideleri Hadice Hanım’ın bi’l-icâreteyn taht-ı tasarrufunda olan şehriye on beş guruş kirâlı bir bâb attâr dükkânı derûnunda mevcûde beyne’l-esnâf gedik ta‘bîr olunur yedimde olup bin iki yüz altmış dokuz senesi Zilhicceti’ş-şerîfesi gurresi tarihiyle müverrah ve ol târihde mahrûse-i merkūme kādısı olan Yesârîzâde zâdesi Mehmed Rıfat Efendi merhûmun mührüyle memhûr işbu bir kıt‘a i‘lâm-ı şer‘î ve kethüdâ-yı mezbûrun takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedimde müstakilleten mülk ve hakkım olan âlât-ı lâzime-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile on üç bin beş yüz guruşa mezbûr Salih Efendi’ye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on üç bin beş yüz guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp mezbûr Salih Efendi’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 15 Safer sene 1279 Şuhûdü’l-hâl: Muhzır İsmail Ağa b. ( ), Muhzır Süleyman Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), ve gayruhum