İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 172 Hüküm no: 100 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasiliko bt. İstefan’ın şerbethâne hisselerinin bir kısmını Kasâb Miçoğlu Kosta v. Yani’ye satması Şerbethâne-i mezbûrun 45 sehim. 15000 guruş Kezâlik medîne-i Üsküdar’da Yeni mahallede sâkine teba‘a-i Devlet-i aliyye’nin Rum milleti nisvânından şahsı ta‘rîf-i şer‘î ile mu‘arrefe olan Vasiliko bt. İstefan meclis-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm Kasâb Miçoğlu Kosta v. Yani muvâcehesinde teba‘a-i Devlet-i aliyye’den ve şerbethâneci esnâfının Arnavud karyesi ustabaşısı Mihalaki v. Dimitri ve merkūme Vasilko’nun zevci Mağazacı Boyacıoğlu Yanko v. Nikola hâzır oldukları hâlde ikrâr-ı tâm ve takrîr-i kelâm edip mahrûse-i Galata’ya muzâfe Arnavud karyesinde Çarşıiçi nâm mahalde Zincirlikapı karşısında Rum bakkalı ittisâlinde vâki‘ bir tarafdan mukaddemâ Rum bakkalı ve el-yevm Yusuf Ağa’nın tütüncü dükkânı ve iki tarafdan Haci Kostandi veresesi menzili ve taraf-ı râbi‘i tarîk-i âm ile mahdûd merkūm Kosta ile işbu hâzır bi’l-meclis Kasâb Cevlioğlu Yani v. Tanaş’ın iki kıt‘a hüccet-i şer‘iyye mantûklarınca yedlerinde mülk ve hakları olan şehriye otuz guruş kirâlı Fucuraki koltuğu demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmesi yüz yirmi sehm i‘tibârıyla akd-i âti’z-zikrin sudûruna değin yedimde olup bin iki yüz altmış sekiz senesi Cumâdelâhiresi’nin yirmi üçüncü günü târihiyle müverrah ve ol târihde rüsûm-i zecriye muhassılı es-Seyyid Yakub Paşa merhûmun mührüyle memhûr bir kıt‘a ve bin iki yüz altmış sekiz senesi Zilka‘deti’ş-şerîfesinin yirmi birinci günü târihiyle müverrah Muhassıllık-ı Rusûm-ı Zecriyenin mührüyle memhûr bir kıt‘a ki cem‘an iki kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca yedimde müstakilleten mülk ve hakkım olmağla ben ber-minvâl-i muharrer mâlike olduğum âlât-ı gedik-i mezkûrun yetmiş beş sehm hisse-i şâyi‘asını hâzır-ı merkūm Yani ile işbu hâzır bi’l-meclis Kasâb Mantooğlu Dimitri v. Tanaş’a iki kıt‘a hüccet-i şer‘iyye mantûklarınca bey‘ ve teslîm etmemle mâ‘adâ kırk beş sehm hisse-i şâyi‘amı dahi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile on beş bin guruşa merkūm Kosta’ya bey‘ ve temlîk ve vech-i [21a] lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on beş bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, fîmâ-ba’d âlât-ı gedik-i mezkûrun kırk beş sehm hisse-i şâyi‘a-i mezkûresinde benim aslâ ve kat‘â alâka ve medhalim kalmayıp merkūm Kosta’nın mülk-i müşterâsı ve hakk-ı sırfı olmuşdur dedikde gıbbe. Fî 25 Muharrem sene 1279 Şuhûdü’l-hâl: Eş-şahidune’s-sabıkūn