İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 170 Hüküm no: 99 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasiliko bt. İstefan’ın şerbethâne hisselerinin bir kısmını Kasâb Mantooğlu Dimitri v. Tanaş’a satması Şerbethâne mübâya‘ası Arnavud karyesinde 90 sehim. 10000 guruş Kezâlik medîne-i Üsküdar’da Yeni mahallede sâkine teba‘a-i Devlet-i aliyye’nin Rum milleti nisvânından şahsı ta‘rîf-i şer‘î ile mu‘arrefe olan Vasiliko bt. İstefan meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm Kasâb Mantooğlu Dimitri v. Tanaş muvâcehesinde teba‘a-i Devlet-i aliyye’den ve şerbethâneci esnâfının Arnavud karyesi ustabaşısı Mihalaki v. Dimitri ve merkūme Vasiliko’nun zevcesi Mağazacı Boyacıoğlu Yanko v. Nikola hâzır oldukları hâlde ikrâr-ı tâm ve takrîr-i kelâm edip mahrûse-i Galata’ya muzâfe Arnavud karyesinde Çarşıiçi nâm mahalde Zincirlikuyu karşısında Rum bakkalı ittisâlinde vâki‘ bir tarafdan mukaddemâ Rum bakkalı ve el-yevm Yusuf Ağa’nın tütüncü dükkânı ve iki tarafdan Haci Kostandi veresesi menzili ve taraf-ı râbi‘i tarîk-i âm ile mahdûd işbu hâzıran bi’l-meclis Kasâb Cevlioğlu Yani v. diğer Tanaş ve Miçoğlu Kosta v. Yani’nin iki kıt‘a hüccet-i şer‘iyye mantûklarınca yedlerinde mülk ve hakları olan şehriye otuz guruş kirâlı Fucuraki koltuğu demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla akd-i âti’z-zikrin sudûruna değin yedimde olup bin iki yüz altmış beş senesi Cumâdelâhiresi’nin yirmi üçüncü günü târihiyle müverrah ve ol târihde rüsûm-i zecriye muhassılı es-Seyyid Yakub Paşa merhûmun mührüyle memhûr bir kıt‘a ve bin iki yüz altmış sekiz senesi Zilka‘deti’ş-şerîfesinin yirmi birinci günü târihiyle müverrah Muhassıllık-ı Rusûm-ı Zecriyenin mührüyle memhûr bir kıt‘a ki cem‘an iki kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca yedimde müstakilleten mülk ve hakkım olmağla ben ber-minvâl-i muharrer mâlike olduğum âlât-ı gedik-i mezkûrun doksan sehm hisse-i şâyi‘asını hâzırân-ı merkūmân Yani ve Kosta’ya iki kıt‘a hüccet-i şer‘iyye mantûklarınca bey‘ ve teslîm etmemle mâ‘adâ otuz sehm hisse-i şâyi‘amı dahi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile on bin guruşa merkūm Dimitri’ye bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt her birimiz ber-vech-i muharrer âharın ibrâsını kabûl eyledik, fîmâ-ba’d âlât-ı gedik-i mezkûrun otuz sehm hisse-i şâyi‘a-i mezkûresinde benim aslâ ve kat‘â alâka ve medhalim kalmayıp merkūm Dimitri’nin mülk-i müşterâsı ve hakk-ı sırfı olmuşdur dedikde gıbbe. Fî 25 Muharrem sene 1279 Şuhûdü’l-hâl: Muhzır Şakir Ağa b. ( ), Muhzır Mustafa Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum