İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 174 Hüküm no: 102 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülbendçi Sakaoğlu Kigork v. Karabet’in şerbethâne hisselerini Alyanak Haçador v. Avanis’e satması Şerbethâne Ortaköy’de 20000 guruş Kezâlik mahrûse-i Galata’ya muzâfe Ortaköy’de sâkin teba‘a-i Devlet-i aliyye’nin Ermeni milletinden Dülbendçi Sakaoğlu Kigork v. Karabet v. Adam tarafından husûs-ı âti’l-beyânda ikrâra vekîl olduğu her biri teba‘a-i Devlet-i aliyye’den karye-i mezkûre Rum milleti muhbiri Nikoli v. Yorgi ve şerbethâneci esnâfının Beyoğlu kolu ustabaşısı Andon v. Ohannes şehâdetleriyle ber-nehc -i şer‘î sâbit olan esnâf-ı merkūmenin karye-i merkūme kolu ustabaşısı teba‘a-i Devlet-i aliyye’den Avanis v. Mıgırdıç meclis-i şer‘-i şerîf-i hatîrde teba‘a-i Devlet-i aliyye’nin Ermeni milletinden ve ekmekçi esnâfı ustabaşılarından bâ‘isü’r-rakīm Alyanak Haçador v. Avanis muvâcehesinde merkūm Andon hâzır olduğu hâlde bi’l-vekâle ikrâr-ı tâm ve takrîr-i kelâm edip müvekkilim mezbûr Kigork ben zikr olunan Ortaköy’de Balık Pazarı kurbünde kârgîr Çarhişi şerbethânesi civârında bakkal dükkânı karşısında vâki‘ bir tarafdan Tütüncü Vasilaki tütüncü dükkânı ve bir tarafdan Çarhişi şerbethânesi ve bir tarafdan Topik şerbethânesi ve taraf-ı râbi‘i tarîk-i âm ile mahdûd merhûm Ali Paşa Vakfı müsakkafâtından merkūm Haçador’un bi’l-icâreteyn taht-ı tasarrufunda olan şehriye elli guruş kirâlı Azarya koltuğu demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla altmış sehm hisse-i şâyi‘ası âharın yedinde mülkü olup mâ‘adâ altmış sehm hisse-i şâyi‘ası dahi akd-i âti’z-zikrin sudûruna değin yedimde olan bin iki yüz yetmiş üç senesi Saferi’l-hayrının üçüncü günü târihiyle müverrah ve ol târihde rüsûm-i zecriye muhassılı olan sa‘âdetlü Rüstem Paşa’nın mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum altmış sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk yirmi bin guruşa merkūm Haçador’a bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yirmi bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, ba‘de’l-yevm altmış sehm hisse-i şâyi‘a-i âlât-ı gedik-i mezkûrde benim aslâ ve kat‘â alâka ve medhalim kalmayıp merkūm Haçador’un mülk-i müşterâsı ve hakk-ı sırfı olmuşdur dedi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 17 Muharrem sene 1279 Şuhûdü’l-hâl: Eş-şahidune’s-sabıkūn