İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 175 Hüküm no: 103 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asya Hatun ve Ayşe Hatun’un İzmir’de misâfiren sâkin iken vefât eden kardeşleri Tatar Sadullah Ağa’dan miras kalan tütüncü dükkânındaki hisselerini satmaları Tütüncü mübâya‘ası 2000 guruş Kezâlik mahmiye-i İstanbul’da Gedik Paşa kurbünde Divân-ı Âlî mahallesi ahâlisinden olup medîne-i İzmir’de Karanlık mahallesinde misâfiren sâkin iken bin iki yüz yetmiş yedi senesi duhûl eden Nisanı’nın yirmi ikinci günü vefât eden Tatar Sadullah Ağa b. Ahmed b. Abdullah’ın verâseti zevce-i menkûha-i metrûkesi Hadice Hatun bt. Abdullah ile sulbîye kebîre kızı Şerife Zekiye Hanım ve li-ebeveyn kız karındaşları Anadolu’da Kerkük kazasına tâbi‘ Deredolu karyesinde sâkine Asya Hatun ve yine kaza-i mezkûre tâbi‘ Beyken karyesinde sâkine Âişe Hatun’a münhasıra ve tashîh-i mesele-i mirâsları on altı sehimden olup sihâm-ı mezkûreden iki sehmi zevce-i mezbûre Hadice Hatun’a ve sekiz sehmi bint-i mezbûre Şerife Zekiye Hanım’a ve üçer sehimden altı sehmi dahi mezbûretân Asya Hatun ve Âişe Hatun’a isâbeti tahakkukundan sonra mezbûretân Asya Hatun ve Âişe Hatun taraflarından husûs-ı âti’l-beyânda tasdîka vekîlleri olduğu şehr-i sâbık Saferi’l-hayrının ikinci günü târihiyle müverraha ve ol târihde ve hâlâ mahmiye-i mezkûrede vâki‘ Ahi Çelebi mahkemesi nâibi olan Çarşambavî mekremetlü Mehmed Reşad Efendi’nin imzâ ve hatemini hâviye işbu bir kıt‘a hüccet-i şer‘iyye mantûkunca Hatîb es-Seyyid Süleyman Efendi b. Ali ve Köseoğlu Osman bin Yusuf nâm şâhideyn-i mu‘addileyn-i müzekkiyeyn şehâdetleriyle nâib-i mûmâ-ileyh huzûrunda hasm-ı câhid olan Ali Ağa b. Mehmed muvâcehesinde ber-nehc-i şer‘î sâbit ve sübût-ı vekâletine hükm-i şer‘î lâhık [21b] olduğu mahkeme-i mezbûre muhzırânından Ahmed Ağa b. Süleyman ve el-Hâc İbrahim Ağa b. Mehmed şehâdetleriyle ber-nehc -i şer‘î sâbit olan mezbûre Âişe Hatun’un sadrî kebîr oğlu Süleyman Ağa b. Mehmed meclis-i şer‘-i şerîf-i enverde çörekçi esnâfından bâ‘isü’l-kitâb el-Hâcİbrahim Ağa b. Hasan tarafından husûs-ı âti’z-zikrde tasdîka vekîl-i şer‘îsi zikr olunan Divân-ı Âlî mahallesi imâmı Mehmed Salih Efendi b. el-Hâc Süleyman mahzarında tütüncü esnâfının kethüdâsı es-Seyyid el-Hâc Mehmed Latif Efendi b. el-Hâc İsmail ile duhân tüccârından mazbûtü’l-esâmî on nefer müslim ve beş nefer hıristiyan taraflarından mürsel vekîlleri esnâf-ı merkūme yiğitbaşısı Receb Ağa b. Ahmed hâzır olduğu hâlde bi’l-vekâle ikrâr-ı tâm ve takrîr-i kelâm edip sâlifü’l-beyân Divan-ı Âlî mahallesinde Câmi‘-i şerîf karşısında Tatar Ağası Hüseyin Ağa menzili ve horosancı dükkânı beynlerinde vâki‘ merhûm Hayreddin Bey Vakfı müsakkafâtından müvekkil-i mezbûr el-Hâc İbrahim Ağa’nın bi’l-icâreteyn tefevvüzen mutasarrıf olduğu bir bâb menzil tahtında olup şehriye üç guruş kirâlı kadîm bir bâb tütüncü dükkânı derûnunda mevcûde beyne’l-esnâf gedik ta‘bîr olunur Eshâm Muhâsebesi kaleminde müteveffâ-yı mezbûr Sadullah Ağa’nın ismine mukayyed bâ-defter-i müfredât âlât-ı lâzime-i ma‘lûme müteveffâ-yı mezbûrun hayâtında ile’l-vefât yedinde olup bin iki yüz altmış senesi şehr-i Rebî‘ülevveli’nin üçüncü günü târihiyle müverrah kalem-i mezkûrdan i‘tâ buyurulan bir kıt‘a sûret ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedinde müstakillen mülkü ve ba‘de vefâtihî müvekkilelerim merkūmetân Asya Hatun ve Âişe Hatun ile mezbûretân Hadice Hatun ve Şerife Zekiye Hanım’a ber tashîh-i merkūm mevrûs oldukdan sonra mezbûretân Hadice Hatun ve Şerife Zekiye Hanım âlât-ı gedik-i mezkûrdan ber-minvâl-i muharrer mâlike oldukları cem‘an on sehm hisse-i şâyi‘alarını müvekkilelerim merkūmetânın izniyle müvekkil-i mezbûr el-Hâc İbrahim Ağa’ya bâ-hüccet-i şer‘iyye bey‘ ve teslîm etmeleriyle ben dahi müvekkilelerim mezbûretân Asya Hatun ve Âişe Hatun’un âlât-ı gedik-i mezkûrdan akd-i âti’z-zikrin sudûruna değin ber-vech-i meşrûh mâlike oldukları cem‘an altı sehm hisse-i şâyi‘alarını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i mezbûr el-Hâc İbrahim Ağa’ya iki bin guruşa bi’l-vekâle bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm iki bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrun altı sehm hisse-i şâyi‘a-i mezkûresinde dahi müvekkilelerim merkūmetân Asya Hatun ve Âişe Hatun’un aslâ ve kat‘â alâka ve medhalleri kalmayıp mecmû‘-ı âlât-ı gedik-i mezkûr müvekkil-i mezbûr el-Hâc İbrahim Ağa’nın mülk-i mahzı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 5 Rebî‘ülevvel sene 1279 Şuhûdü’l-hâl: Muhzır Osman Ağa b. ( ), Muhzır Ahmed Ağa b. ( ), Muhzır Mustafa Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum