Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 527 Hüküm no: 634 Orijinal metin no: [110b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kemel v. Yako’nun Abraham v. Yako’da alacağı olduğu Tâife-i yahudun İşdip? cemâ‘atinden olup mahmiye-i İstanbul’da Balatkapısı dâhilinde el-Hâc İsâ mahallesinde sâkin işbu bâ‘isü’l-vesîka Kemel v. Yako meclis-i şer‘-i şerîf-i enverde zikr olunan Balatkapısı hâricinde sâkin Abraham v. Yako muvâcehesinde üzerine da‘vâ ve takrîr-i kelâm edip mezbûr Abraham’a bundan akdem yüz yetmiş esedî guruş ikrâz ve teslîm ol dahi iktirâz ve kabz ve tesellüm etmişidi hâlâ taleb eylediğimde edâdan imtinâ‘ eder suâl olunup meblağ-ı mezbûrun merkūm Abraham’dan alıverilmesi murâdımdır dedikde gıbbe’s-suâl ve akībe’l-inkâr, müdde‘î-i mezbûr Kemel’den sıdk-ı makāline beyyine taleb olundukda mahmiye-i mezbûrede Sultanhamamı kurbunda olup Küçük İstanbul cemâ‘atinden diğer Kemel v. Abraham ve İlya v. Sinar nâm yahudiler li ecli’ş-şehâde meclis-i şer‘a hâzırân olup isre’l-istişhâdi’ş-şer‘î fi’l-vâki‘ müdde‘î-i mezbûr Kemel bundan esbak mezbûr Abraham’a bizim huzûrumuzda [yüz yetmiş esedî guruş] ikrâz ve teslîm ol dahi iktirâz ve kabz ve tesellüm etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükmi’ş-şer‘î meblağ-ı mezbûr yüz yetmiş guruşa müdde‘î-i mezbûr Kemel’e edâ ve teslîme merkūm İbrahim’e tenbîh birle mâ vaka‘a bi’t-taleb ketb olundu. Fi’l-hâdî aşer min Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed Çelebi b. İdris, Mustafa b. Ahmed, Mehmed b. Hasan.