Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 527 Hüküm no: 635 Orijinal metin no: [110b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hacı Mahmud’un vârislerinin birbirlerinin zimmetini ibrâ ettikleri Mahmiye-i İstanbul’da Harâccı Muhyiddin mahallesinde sâkin iken bundan [akdem] vefât eden Mehmed b. el-Hâc Mahmud’un verâseti zevce-i metrûkesi Zeyneb Hâtun bt. el-Hâc Mehmed’e ve sulbî kebîr oğlu İbrahim ve Mehmed ve Halil nâm kimesneler ve sulbiye kebîre kızı Emine nâm hâtuna münhasıra ve tashîh-i mes’elesi sekiz sehimden olup sihâm-ı mezbûreden bir sehimi mezbûre Zeyneb’e ve ikişer sehimi mezbûrûn Mehmed ve İbrahim ve Halil’den her birine ve bir sehimi dahi mezbûre Emine’ye isâbet eylediği şer‘an mütehakkik oldukdan sonra mezbûr ( ) meclis-i şer‘de müteveffâ-yı mezbûrun terekesine vâzı‘ü’l-yed olan karındaşı işbu bâ‘isü’l-kitâb mezbûr İbrahim mahzarında ikrâr ve takrîr-i kelâm edip babam müteveffâ-yı mezbûr Mehmed hayâtında karındaşım İbrahim sermâye etmek için yüz guruşunu def‘ ve teslîm ol dahi ahz u kabz ettiğinden mâ‘adâ fevt oldukda demirci âlâtından ve kebîr örs ve sıkma ta‘bîr olunur demirini ve sâir terekesini kabz etmekle hâlâ mezbûr İbrahim meblağ-ı mezbûr yüz guruşdan ve kebîr örs ve sıkma demirine ve sâir müteveffâ-yı mezbûrun terekesinden tashîh-i mezkûr üzre sekiz sehimden iki sehim hissemi bana def‘ ve teslîm ben dahi yedinden ahz u kabz edip babam müteveffâ-yı mezbûrun cemî‘ terekesine müte‘allika âmme-i da‘vâdan karındaşım mezbûr İbrahim’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 10 min Ramazan sene 1097. Şuhûdü’l-hâl: Mehmed b. İbrahim, İbrahim b. Hasan, Hüseyin b. Şaban, Halil b. Mehmed, Mustafa b. Halil.