İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 185 Hüküm no: 110 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Uncu esnâfından Bedros v. Mihail’e ait uncu değirmeninin satılması ve Zahîre Hazinesi’ne olan borcunun ödenmesi
Uncu değirmen mübâya‘ası
Kezâlik vilâyet-i Anadolu’da Kuruçay kazâsına tâbi‘ Armudan-ı kebîr karyesinde sâkin teba‘a-i Devlet-i aliyye’nin Ermeni milletinden ve uncu esnâfından Bedros v. Mihail v. Kigork’un sulbî kebîr oğlu ve tarafından husûs-ı âti’l-beyânda işbu sene-i mübâreke şehr-i Rebî‘ülâhiri’nin yirmi sekizinci günü târihiyle müverraha ve ol târihde medîne-i Harput nâibi olan İbrahim Efendi hafîdi es-Seyyid Mehmed Said Efendi’nin mührü mutâbık ve meâli vekâlet-i mezkûreyi beyândan ibâret idüğü fetvâhâne-i celîleden hâmişine tahrîr ve temhîr kılınan işbu bir kıt‘a vekâlet hücceti mantûkunca vekîl olduğu el-Hâc Mustafa Efendi b. el-Hâc Ahmed ve teba‘adan İsmail Ağa b. Mehmed şehâdetleriyle mahzar-ı hasm-ı câhidde ber-nehc -i şer‘î sâbit ve sübût ve vekâletine hükm-i şer‘î lâhık olan teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan esnâf-ı merkūmeden bâ‘isü’r-rakīm Nazaret v. Kabril muvâcehesinde ekmekçi ve uncu ve françalacı esnâfının kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekîlleri esnâf-ı merkūme yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde bi’l-vekâle ikrâr-ı tam ve takrîr-i kelâm edip mahmiye-i İstanbul hısnı ebvâbından Balat kapısı dâhilinde kâin bir tarafdan Topik değirmeni ve bir tarafdan Haham İsrail menzili bahçesi ve bir tarafdan Kağıdçı Mişon Yahudi menzili ve taraf-ı râbi‘i tarîk-i âm ile mahdûd Rikâb-ı hümâyûn Defterdârı merhûm el-Hâc Sadullah Efendi Vakfı müsakkafâtından Angeli v. Dimitri’nin taht-ı tasarrufunda olan şehriye on guruş kirâlı Kebecioğlu değirmeni demekle arîf iki horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur sekiz re’s bârgir ve onlara tâbi‘ sâir âlât-ı lâzime-i ma‘lûme babam ve müvekkilim merkūm Bedros’un yedinde olup bin iki yüz yetmiş üç senesi Cumâdelâhiresi selhi târihiyle müverraha ve ol târihde Dârü’l-hilâfeti’l-aliyye kādısı olan Osman Efendizâde Mehmed Emin Efendi merhûmun imzâ ve hatemini hâviye işbu bir kıt‘a hâmiş-i hüccet-i şer‘iyye ve sene-i merkūme Zilhicceti’ş-şerîfesinin altıncı günü târihiyle müverraha ve ol târihde dârü’s-saltanati’s-seniye kādısı olan sudûr-ı izâmdan Zeynelabidin Efendizâde semâhatlü es-Seyyid Mehmed İmadüddin Efendi hazretlerinin imzâ ve hatemleriyle mahtûme işbu diğer bir kıt‘a hâmiş-i hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedinde mülk ve hakkı olmağla ben babam ve müvekkilim merkūm Bedros’un ber-minvâl-i muharrer mâlik olduğu sâlifü’l-beyân sekiz re’s bârgir ve onlara îcâb eden âlât-ı sâirenin dört re’s bârgir ve onlara iktizâ eden âlât-ı sâiresini müvekkilim merkūmun yedinde bi’l-ibkā ve iki re’s bârgir ve onlara îcâb eden âlât-ı sâiresini işbu hâzır bi’l-meclis Uncu Avanis veledi Mıgırdiç’e bi’l-vekâle bâ-hüccet-i şer‘iyye bey‘ ve teslîm etmemle mâ‘adâ âhar iki re’s bârgir ve onlara îcâb eden âlât-ı sâiresini dahi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk on dört bin üç yüz doksan beş guruşa merkūm Nazaret’e bi’l-vekâle bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra babam ve müvekkilim merkūm Bedros’un zimmetinde Zahîre Hazinesi’ne altı bin üç yüz doksan beş guruş deyni olmağla semen-i mezkûr on dört bin üç yüz doksan beş guruşun altı bin üç yüz doksan beş guruşunu deyn-i mezkûre mahsûben hazine-i mezkûrede kabza memûre edâ etmek üzere merkūm Nazaret’e bi’l-vekâle emr ve tarafımdan bi’l-vekâle tevkîl eylediğimde ol dahi kabûl ve ber-vech-i meşrûh edâ-i deyne ta‘ahhüd edip semen-i merkūmun mâ‘adâsı olan sekiz bin guruşu dahi bana tamâmen def‘ u teslîm ben dahi yedinden bi’l-vekâle tamâmen ahz u kabz eyledim fîmâ-ba’d sâlifü’l-beyân âhar iki re’s bârgir ve onlara îcâb eden âlât-ı sâirede dahi müvekkilim merkūm Bedros’un aslâ ve kat‘â alâka ve medhali kalmayıp merkūm Nazaret’in mülk-i müşterâsı ve hakk-ı sırfı olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini bi’l-asâle ve bi’l-vekâle ibrâ vü ıskāt ve her birimiz ber-vech-i muharrer âharın ibrâsını kabûl eyledik, dedikde gıbbe.
Fî 19 Zilhicce sene 1278
Şuhûdü’l-hâl: Muhzır Osman Ağa b. ( ), Muhzır Süleyman Ağa b. ( ), Muhzır İsmail Ağa b. ( ), Muhzır Feyzullah Ağa b. ( ), ve gayruhum
|