İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 184 Hüküm no: 109 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Baba Yiğitoğlu İbrahim Ağa b. İsmail’e ait kalafatçı dükkânının borçlarını ödemek üzere müzâyede yoluyla satılması Kalafatçı mübâya‘ası 6200 guruş Kezâlik mahrûse-i Galata’da el-Hâc A‘ma mahallesinde sâkin iken bin iki yüz altmış beş senesi Zilhicceti’ş-şerîfesinin yirmi dördüncü günü vefât eden kalafatçı esnâfından Baba Yiğitoğlu İbrahim Ağa b. İsmail bin Abdullah’ın verâseti zevce-i menkûha-i metrûkesi Habibe Hatun bt. Abdullah ile sulbî kebîr oğlu esnâf-ı merkūmeden Ahmed Nazif Efendi ve sulbiye kebîre kızı Fâtımatü’z-zehra Hanım’a münhasıra olduğu lede’ş-şer‘i’l-enver zâhir ve mütehakkık oldukdan sonra müteveffâ-yı mezbûrun düyûn-ı müsbetesi terekesinden ezyed olduğuna binâen verese-i merkūmûn tereke-i müteveffâ-yı mezbûrdan keff-i yed etmeleriyle müteveffâ-yı mezbûrun tereke-i kāsırasını kabz ve düyûn-ı müsbetesini edâya kıbel-i şer‘den vasiyy-i mansûbu olan mezbûr Ahmed Nazif Efendi meclis-i şer‘-i münîrde Mehmed Hurşid Ağa b. Abdullah mahzarında esnâf-ı merkūme kethüdâsı Mustafa Ağa b. İdris ve esnâfından Mehmed Efendi b. Ali ve Hasan Ağa b. Hüseyin hâzır oldukları hâlde bi’l-vesâye ikrâr-ı tâm ve takrîr-i kelâm edip mahrûse-i Galata hâricinde Kalafatyeri nâm mahalde vâki‘ bir tarafdan mukaddemâ Acemoğlu ve hâlâ Mirasyedioğlu Bedros’un çivici dükkânı ve bir tarafdan diğer Mirasyedioğlu Barot’un çivici dükkânı ve bir tarafdan mukaddemâ Demirci Mehmed Emin Ağa ve hâlâ Demirci Ömer Ağa dükkânı ve taraf-ı râbi‘i tarîk-i âm ile mahdûd Rûznâmeci İbrahim Efendi Vakfı müsakkafâtından pederim müteveffâ-yı mezbûrun fevtiyle intikālinden benimle kız karındaşım merkūme Fâtımatü’z-zehra Hanım’ın bi’l-icâreteyn taht-ı tasarrufumuzda olan şehriye doksan para kirâlı bir bâb kalafatçı dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme pederim müteveffâ-yı mezbûr İbrahim Ağa’nın hayâtında ile’l-vefât bin iki yüz otuz dokuz senesi şehr-i Rebî‘ülevveli’nin yirmi üçüncü günü tarihiyle müverraha ve ol târihde mahrûse-i [Galata] kādısı olan Şerif Paşazâde Şerif Ahmed Said Efendi merhûmun imzâ ve hatemini hâviye işbu bir kıt‘a mübâya‘a hücceti ve kethüdâ-yı hâzır-ı mûmâ-ileyhin takdîm eylediği bir kıt‘a ilmühaber mantûklarınca yedinde müstakillen mülkü ve ba‘de vefâtihî benimle mezbûretan Habibe Hatun ve Fâtımatü’z-zehra Hanım’a mevrûs olmağla lakin müteveffâ-yı mezbûrun düyûn-ı müsbetesi terekesinden ezyed olduğuna binâen ben ve mezbûretân Habibe Hatun ve Fâtımatü’z-zehra Hanım tereke-i müteveffâ-yı mezbûrdan keff-i yed edip ben müteveffâ-yı mezbûrun tereke-i kāsırasını kabz ve düyûn-ı müsbetesini edâya kıbel-i şer‘den vasî nasb oldu[ğu]ma mebni âlât-ı gedik-i mezkûru işbu sene-i mübâreke Muharremü’l-haramı gurresi târihiyle müverrah hâlâ evkāf müfettişi İstanbul pâye-i refî‘asıyla mübâhî Abid Efendizâde fazîletlü Ahmed Raşid Efendi hazretlerinin hatemiyle mahtûm işbu bir kıt‘a ilmühaber mantûkunca guremâ ashâbı ma‘rifetiyle münâdî yediyle sûk-ı sultânî ve mecma‘-ı nâs olan mahallerde lede’l-müzâyede ve gıbbe inkıtâ‘ı’r-rağbe el-yevm semen-i misli idüğü hâzırun-ı mezbûrun ile sâir cerîdede mazbûtü’l-esâmî müslimînin alâ tarîki’ş-şehâde ihbârlarıyla zâhir ve mütehakkık olan altı bin iki yüz guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Mehmed Hurşid Ağa’ya bi’l-vesâye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm altı bin [23a] guruşu tamâmen bana def‘ u teslîm ben dahi yedinden bi’l-vesâye tamâmen ahz u kabz ve müteveffâ-yı mezbûrun defter-i kassâmına idhâl eyledim dedikde gıbbe’t-tasdîk mezbûr Mehmed Hurşid Ağa meclis-i şer‘de bâ‘isü’l-kitâb mezbûr Ahmed Nazif Efendi mahzarında ikrâr-ı tâm ve takrîr-i kelâm edip ben dahi ânifen şirâen mâlik olduğum âlât-ı gedik-i mezkûru tarafeynden bi’l-îcâb ve’l-kabûl bâtten ve sahîhan bi-safkatin vâhidetin mezbûr Ahmed Nazif Efendi’ye kezâlik altı bin iki yüz guruş semen-i makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl edip fîmâ-ba’d âlât-ı gedik-i mezkûr mezbûr Ahmed Nazif Efendi’nin mülk-i müşterâsı ve hakk-ı sırfı olup benim aslâ ve kat‘â alâka ve medhalim kalmamışdır dedikde gıbbe. Fî 29 Safer sene 1279 Şuhûdü’l-hâl: Muhzır Mustafa Ağa b. ( ), Muhzır Mehmed Ağa b. ( ), Muhzır Ahmed Ağa b. ( ), Muhzır el-Hâc Salih Ağa b. ( ), ve gayruhum