İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 188 Hüküm no: 112 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbethâneci esnâfından Maher v. Yasef’in mirasçıları ile Tuhafçı Menahim v. Yasef’e ait şerbethânenin Ekserci Nesim v. Yasef’e satılması Şerbethâne mübâya‘ası Kezâlik mahmiye-i İstanbul hısnı ebvâbından Balat kapısı dâhilinde el-Hâc İsa mahallesinde sâkin iken bundan mukaddem fevt olan teba‘a-i Devlet-i aliyye’nin Yahud milletinden ve şerbethâneci esnâfından Maher v. Yasef v. Menahim’in sulbî kebîr oğulları ve hasren vârisleri olup teba‘a-i Devlet-i aliyye’den oldukları Hahambaşı tarafından vürûd eden bir kıt‘a ilmühaber me’âliyle Enserci Yuda v. Davit ve Enserci Salomon v. Siton haberleriyle dahi zâhir ve mütehakkık olan Eskici Yasef ve Azar teba‘a-i Devlet-i aliyye’nin Yahud milletinden Tuhafçı Menahim v. Yasef hâzır olduğu hâlde meclis-i şer‘-i hatîrde teba‘a-i Devlet-i aliyye’nin Yahud milletinden olduğu bâ-ilmühaber mütehakkık olan bâ‘isü’r-rakīm Ekserci Nesim v. Yasef muvâcehesinde esnâf-ı merkūmenin Beyoğlu kolu ustabaşısı Andon v. Ohannes hâzır olduğu hâlde her biri ikrâr-ı tâm ve takrîr-i kelâm edip bâb-ı mezkûr dâhilinde Yanbolu Sinavisi? karşısında vâki‘ bir tarafdan Tenekeci Menahim menzili ve bir tarafdan Tenekeci Markado menzili ve bir tarafdan Tenekeci Avram menzili ve taraf-ı râbi‘i tarîk-i âm ile mahdûd merhûm Sultan Bayezid-i Velî Hân hazretlerinin evkāf-ı celîleleri müsakkafâtından babam merkūm Maher’in fevtiyle intikālinden bizimle hâzır-ı merkūm Menahim’in taht-ı tasarrufumuzda olan senevî yüz guruş kirâlı Haci Yasef koltuğu demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla altmış sehm hisse-i şâyi‘ası bin iki yüz kırk altı senesi Zilka‘deti’ş-şerîfesinin beşinci günü târihiyle müverrah ve ol târihde Mukata‘a-i Rusûm-i zecriye muhassılı olan Mehmed Nuri Beyefendi’nin mührüyle memhûr bir kıt‘a sûret mantûkunca hâzır-ı merkūm Menahim’in yedinde mülkü olup mâ‘adâ altmış sehm hisse-i şâyi‘ası dahi babamız müteveffâ-yı merkūm Maher’in hayâtında ile’l-fevt yedinde olup târih-i mezkûr ile müverrah mîr-i mûmâ-ileyhin mührüyle memhûr işbu bir kıt‘a sûret mantûkunca yedinde mülkü ve ba‘de fevtihî altmış sehm hisse-i şâyi‘a-i âlât-ı gedik-i mezkûr bize mevrûs olmağla biz âlât-ı gedik-i mezkûrdan akd-i âti’z-zikrin sudûruna değin ber-minvâl-i muharrer mâlik olduğumuz altmış sehm hisse-i şâyi‘a-i mezkûreyi bi-safkatin vâhidetin beş bin guruşa ve hâzır-ı merkūm Menahim dahi âlât-ı gedik-i mezkûrdan akd-i âti’z-zikrin sudûruna değin ber-vech-i meşrûh mâlik olduğu altmış sehm hisse-i şâyi‘a-i mezkûreyi kezâlik bi-safkatin vâhidetin beşbin guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bâ-ilmühaber merkūm Nesim’e bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semenleri olan cem‘an on bin guruşu bize tamâmen def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrların tağrîr ve gabnlarına müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrdea bizimle hâzır-ı merkūm Menahim’in aslâ ve kat‘â alâka ve medhalimiz kalmayıp merkūm Nesim’in mülk-i müşterâsı ve hakk-ı sırfı olmuşdur dediklerinde gıbbe’t-tasadîki’ş-şer‘î mâ-vaka‘a bi’t-taleb ketb olundu. Fî Gurre-i Rebî‘ülevvel sene 1279 Şuhûdü’l-hâl: Muhzır Süleyman Ağa b. ( ), Muhzır İsmail Ağa b. ( ), Muhzır Şakir Ağa b. ( ), Muhzır Feyzi Ağa b. ( ), ve gayruhum