İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 190 Hüküm no: 113 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Said Beyefendi’nin Sarraf Oseb Yanovic’in eşi Droni bt. Andon’dan aldığı borç karşılığında mülk evini rehin vermesi İdâne 74000 guruş Mahmiye-i İstanbul’da Sultan Ahmed Hân aleyhi-rahmetü ve’l-gufrân hazretleri Câmi‘-i şerîfi kurbünde Kabasakal mahallesinde sâkin sâbıkâ Meclis-i Muhâsebe-i Mâliye a‘zâsından ve rütbe-i ûlâ sınıf-ı sânîsi ashâbından sa‘âdetlü Mehmed Said Beyefendi b. Abdülnâfi Efendi meclis-i şer‘-i şerîf-i lâzımü’t-teşrîfde medîne-i Üsküdar’a muzâfe Kadı karyesinde sâkine teba‘a-i Devlet-i aliyye’nin Katolik milleti nisvânından Sarraf Oseb Yanovic zevcesi işbu bâ‘isetü’l-vesîka Droni bt. Andon v. Adam tarafından husûs-ı âti’l-beyânda tasdîka vekîl-i şer‘îsi tüccârdan Beyrutlu İbrahim Efendi b. Mehmed Edib muvâcehesinde teba‘a-i Devlet-i aliyye’nin Ermeni milletinden ve sarrâf dellâllarından Artin v. İstefan hâzır olduğu hâlde ikrâr-ı tâm ve takrîr-i kelâm edip müvekkile-i merkūme Droni bana mâlından yetmiş dört bin guruş idâne ve teslîm eylediğinde ben dahi yedinden istidâne ve kabz ve umûruma sarfla istihlâk edip meblağ-ı mezkûr yetmiş dört bin guruş müvekkile-i merkūmeye zimmetimde vâcibü’l-edâ ve lâzimü’l-kazâ sahîhân deynim olup mukābelesinde sâlifü’l-beyân Kabasakal mahallesinde vâki‘ bir tarafdan Mühürdâr Necib Efendi menzili ve bir tarafdan Eyüb Ağa menzili ve bir tarafdan Teberdâr Ali menzili ve bir tarafdan tarîk-i âm ile mahdûd vâlidem müteveffât Suada Hanım bt. el-Hâc Mehmed Paşa’dan bâ-hüccet-i şer‘iyye irsen mâlik olduğum ma‘lûmü’l-müştemilât bir bâb mülk menzili rehin vaz‘ ve müvekkile-i mezbûreye teslîm eylediğimde ol dahi irtihân ve tesellüm ve kabz u kabûl ve li-ecli’l-isti‘mâl yine bana i‘âre ve teslîm eylediğinde ben dahi isti‘âre ve tesellüm ve kabz u kabûl etmemle eğer ben deynim olan meblağ-ı mezkûru işbu târih-i kitâbdan bir buçuk sene tamâmına değin edâ ve menzil-i mezkûru rehniyetden fek ve tahlîs edemez isem menzil-i mezkûru lede’l-müzâyede semen-i misliyle âhara bey‘e ve kabz-ı semene ve makbûzundan deyn-i mezkûru dâyinem merkūmeye edâya ve fazla kalır ise fazla-i merkūmeyi bana teslîme ve husûs-ı mezkûr mütevakkıf olduğu umûrun küllisine küllemâ azeltüke fe-ente vekîli mefhûmu üzere azl ve in‘izâlden masûne ve akd-i rehinde meşrûta vekâlet-i devriye-i sahîha-i şer‘iyye ile tarafımdan hâzır-ı merkūm Artin’i vekîl nasb ve ta‘yîn eylediğimde ol dahi vekâlet-i mezkûreyi kabûl ve hizmet-i lâzimesini vaktinde edâya ta‘ahhüd eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 16 Rebî‘ülevvel sene 1279 Şuhûdü’l-hâl: Muhzır Mustafa Ağa b. ( ), Muhzır el-Hâc Yusuf Ağa b. ( ), Muhzır Süleyman Ağa b. ( ), Muhzır Salih Ağa b. ( ), ve gayruhum