İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 221 Hüküm no: 135 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mızraklı Dimo v. Kosta’dan miras kalan börekçi fırını hisselerine dair mirasçılarının hüccet talebi Börekçi fırını ihbârı Kezâlik mahrûse-i Galata’ya muzâfe Büyükdere karyesinde sâkin iken bundan mukaddem fevt olan teba‘a-i Devlet-i aliyye’nin Rum milletinden ve simidçi esnâfından Mızraklı Dimo v. Kosta v. Giro’nun verâseti her biri teba‘a-i Devlet-i aliyye’den zevce-i metrûkesi Zoyice bt. Hıristo ile sulbî kebîr oğulları Anaştaş ve Vasil ve sulbiye kebîre kızı Vasilike’ye münhasıra ve tashîh-i mesele-i mirâsları kırk sehimden olup sihâm-ı mezkûreden beş sehmi zevce-i merkūme Zoyice’ye ve on dörder sehimden yirmi sekiz sehmi merkūmân Anaştaş ve Vasil’e ve yedi sehmi dahi merkūme Vasilike’ye isâbeti lede’ş-şer‘i’l-enver zâhir ve mütehakkık oldukdan sonra şahsı ta‘rîf-i şer‘î ile mu‘arrefe olan merkūme Zoyice merkūme Vasilike tarafından husûs-ı âti’l-beyânda vekîl-i şer‘îsi teba‘a-i Devlet-i aliyye’nin Rum milletinden ve esnâf-ı merkūmeden Yani v. Todori ile merkūmân Anaştaş ve Vasil hâzır oldukları hâlde meclis-i şer‘-i şerîf-i hatîrde mahrûse-i Galata ve tevâbi‘inde vâki‘ çörekçi ve börekçi esnâfının kethüdâsı el-Hâc Mustafa Ağa bin Hasan ve yiğitbaşısı Mustafa Efendi b. Osman ve esnâfından Mustafa Ağa b. Mehmed ile her biri teba‘a-i Devlet-i aliyye’nin Rum milletinden ve esnâf-ı merkūmeden Yeni mahalleli Yorgi v. İstrati ve Üsküdarlı Yani v. Kosta ve Çengel karyeli Hıristo v. Oyanos ve Rumeli Fenerli Kosti v. Yani hâzır oldukları hâlde takrîr-i kelâm ve ta‘bîr ani’l-merâm edip nâhiye-i mezkûreye tâbi‘ Tarabya karyesinde vâki‘ bir tarafdan Karakolhâne ve bir tarafdan Berber Yanko’nun berber dükkânı ve bir tarafdan leb-i deryâ ve taraf-ı râbi‘i tarîk-i âm ile mahdûd cennet-mekân merhûm ve mağfiret-nişân Sultan Bayezid-i Velî Hân tâbe serâhu hazretlerinin evkāf-ı celîleleri müsakkafâtından nısf hisse-i şâyi‘ası şerbethâneci Yorgi v. Zaharya’nın ve rub‘ hissesi hâzırân-ı merkūmân ile merkūme Vasilike’nin babaları müteveffâ-yı merkūmdan müntakil ve âhar rub‘ hissesi Todori’nin bi’l-icâreteyn taht-ı tasarruflarında olan şehriye on iki guruş kirâlı bir bâb börekçi fırını derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla altmış sehm hisse-i şâyi‘ası nefs-i Harameyn-i muhteremeyn Evkāfı müstegallâtından olarak otuz sehm hisse-i şâyi‘ası hâzırân-ı merkūmân ile müvekkile-imerkūmenin babaları müteveffâ-yı merkūmdan müntakil ve âhar otuz sehm hisse-i şâyi‘ası merkūm Todori’nin bâ-temessük-i mütevelli bi’l-icâreteyn [28b] taht-ı tasarruflarında olup mâ‘adâ altmış sehm hisse-i şâyi‘ası dahi yedimizde olup bin iki yüz kırk iki senesi Zilhicceti’ş-şerîfesinin yirminci günü târihiyle müverraha ve ol târihde mahrûse-i mezkûre kādısı olan Nidâyî Mahmud Efendi merhûmun imzâ ve hatemini hâviye işbu hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca müteveffâ-yı merkūm Dimo’nun hayâtında ile’l-fevt yedinde mülkü ve ba‘de fevtihî benimle hâzırân-ı merkūmân ile müvekkile-i merkūmeye ber tashîh-i merkūm mevrûs olup lakin intikāli hâvî yedimizde sened-i şer‘î olmamağla hakīkat-i hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile altmış sehm hisse-i şâyi‘a-i âlât-ı gedik-i mezkûr benimle hâzırân-ı merkūmân Anaştaş ve Vasil ve müvekkile-i merkūme Vasilike’nin irsen mülkümüz olduğunu nâtıka kıbel-i şer‘den intikāli hâvî yedimizde bir kıt‘a hüccet-i şer‘iyye i‘tâ buyurulmak murâdımızdır deyu hâzırûn-ı asîl ve vekîl-i merkūmdan Anaştaş ve Vasil ve Yani ile ma‘an bi’l-asâle ve bi’l-vekâle istid‘â ettiklerinde hâl asîl ve vekîl-i merkūmûnun bâlâda bast ve beyân eyledikleri minvâl üzere olduğunu husûs-ı mezkûra vukūf-ı tâmları olan esnâf-ı hâzırûn-ı merkūmûndan her biri alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb olundu. Fî 20 Rebî‘ülevvel sene 1279 Şuhûdü’l-hâl: Muhzır Mehmed Ağa b. ( ), Muhzır İsmail Ağa b. ( ), Muhzır el-Hâc Yusuf Ağa b. ( ), Muhzır Feyzullah Ağa b. ( ), Tahtacı el-Hâc Salih Ağa