İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 219 Hüküm no: 134 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden ekmekçi esnâfı kethüdâsı Hüseyin Hüsnü Efendi’ye ait ekmek fırını ve değirmenin müzâyede yoluyla satılması ve Zahîre Hazinesi’ne olan borçlarının ödenmesi Değirmen ve ekmekçi mübâya‘ası Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahmiye-i İstanbul’da Hoca Paşa mahallesinde sâkin iken bundan mukaddem vefât eden mukaddemâ ekmekçi esnâfı kethüdâsı Hüseyin Hüsnü Efendi b. el-Hâc Mehmed Tahir b. zu‘amâdan Ömer Ağa’nın verâseti zevce-i menkûha-i metrûkesi Fâtıma Dilber Hanım bt. Abdullah ile sulbî sagīr oğlu Hasan Tahsin Bey ve sulbiye kebîre kızı Emine Nefise Perver Hanım ve sulbiye sagīre kızı Fâtımatü’z-zehrâ’ya münhasıra olduğu lede’ş-şer‘i’l-enver zâhir ve mütehakkık oldukdan sonra sagīrân-ı mezbûrânın tesviye-i emirlerine kıbel-i şer‘den bâ-hüccet-i şer‘iyye vasiyy-i mansûbları el-Hâc Mehmed Efendi b. Ahmed zevce-i mezbûre Fâtıma Dilber Hanım tarafından husûs-ı âti’l-beyânda vekîl-i müseccel-i şer‘îsi es-Seyyid Abdülhalim Ağa b. Süleyman ile zâtı ta‘rîf-i şer‘î ile mu‘arrefe olan bint-i mûmâ-ileyhâ Emine Nefise Perver Hanım hâzır oldukları hâlde meclis-i şer‘-i şerîf-i enverde teba‘a-i Devlet-i aliyye’nin Ermeni milletinden ve esnâf-ı merkūme ustabaşılarından bâ‘isü’r-rakīm Bogos v. Kigork muvâcehesinde Âsitâne-i aliyye ve bilâd-ı selâsede vâki‘ ekmekçi ve uncu ve françalacı esnâfının kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekîlleri es-Seyyid İsmail Efendi b. es-Seyyid Mehmed Emin hâzır olduğu hâlde bi’l-vesâye ikrâr-ı tâm ve takrîr-i kelâm edip mahmiye-i mezkûrede Davudpaşa iskelesi kurbünde vâki‘ Deniz hamamı fırını demekle meşhûr bir bâb ekmekçi fırını ve ona merbût ittisâlinde vâki‘ beş horoslu bir bâb ekmekçi değirmeni derûnlarında mevcûde beyne’l-esnâf gedik ta‘bîr olunur yirmi re’s bârgir ve onlara tâbi‘ sâir âlât-ı lâzime-i ma‘lûmenin on altı re’s bârgir on iki mıh ve onlara isâbet eden âlât-ı sâiresi âharların yedlerinde mülkleri olup mâ‘adâ üç re’s bârgir on iki mıh ve onlara îcâb eden âlât-ı sâiresi müteveffâ-yı mûmâ-ileyh Hüseyin Hüsnü Efendi’nin hayâtında ile’l-vefât yedinde olup bin iki yüz yetmiş üç senesi şehr-i Rebî‘ülâhiri’nin yirmi üçüncü günü târihiyle müverraha ve ol târihde Dârü’l-hilâfeti’l-aliyye kādısı olan Osman Efendizâde Mehmed Emin Efendi merhûmun imzâ ve hatemini hâviye işbu bir kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedinde mülkü ve ba‘devefâtihîvasileri olduğum sagīrân-ı mezbûrân Hasan Tahsin Bey ve Fâtımatü’z-zehra ve zevcesi müvekkile-i mezbûre Fâtıma Dilber Hanım ve kızı hâzıra-i mûmâ-ileyhâ Emine Nefise Perver Hanım’a mevrûs olmağla ben bi’l-vesâye ve hâzır vekîl-i mezbûr es-Seyyid Abdülhalim Ağa müvekkilesi mezbûre Fâtıma Dilber Hanım’a izâfetle bi’l-vekâle ve hâzıra-i mûmâ-ileyha Emine Nefise Perver Hanım dahi bi’l-asâle sâlifü’l-beyân üç re’s bârgir on iki mıh ve onlara îcâb eden âlât-ı sâiresini münâdî yediyle sûk-ı sultânî ve mecma‘-ı nâs olan mahallerde lede’l-müzâyede ve gıbbe inkıtâ‘ı’r-rağbe el-yevm semen-i misli idüğü cerîdede mazbûtü’l-esâmî kimesnelerin alâ tarîki’ş-şehâde ihbârlarıyla zâhir ve mütehakkık olan yirmi bir bin iki yüz elli guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ merkūm Bogos’a bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra müteveffâ-yı mûmâ-ileyh Hüseyin Hüsnü Efendi’nin hayâtında zimmetinde Zahîre Hazinesi’ne on üç bin dokuz yüz guruş deyni olduğu mütehakkık olmağla semen-i mezkûr yirmi bir bin iki yüz elli iki guruşun on üç bin dokuz yüz guruşunu deyn-i mezkûre mahsûben hazine-i mezkûrede kabza memûre vermek üzere ben bi’l-asâle ve vekîl-i hâzır-ı mezbûr es-Seyyid Abdülhalim Ağa bi’l-vekâle ve hâzıra-i mûmâ-ileyhâ Emine Nefise Perver Hanım dahi bi’l-asâle merkūm Bogos’a emr ve tarafımızdan tevkîl eylediğimizde ol dahi kabûl ve ber-vech-i meşrûh edâ-i deyne ta‘ahhüd edip semen-i merkūmun bâkīsi olan yedi bin üç yüz elli guruşu dahi tamâmen bize def‘ u teslîm biz dahi yedinden bi’l-vesâye ve bi’l-vekâle ve bi’l-asâle ahz u kabz ve müteveffâ-yı mûmâ-ileyhin defter-i kassâmına idhâl eyledik ba‘de’l-yevm sâlifü’l-beyân üç re’s bârgir on iki mıh ve onlara îcâb eden âlât-ı sâirede vasîleri olduğum sagīran-ı mezbûrân Hasan Tahsin Bey ve Fâtımatü’z-zehra ve müvekkile-i mezbûre Fâtıma Dilber Hanım ve hâzıra-i mûmâ-ileyhâ Emine Nefise Perver Hanım’ın aslâ ve kat‘â alâka ve medhalimiz kalmayıp merkūm Bogos’un mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î. Fî 20 Muharrem sene 1279 Şuhûdü’l-hâl: Muhzır Osman Ağa b. ( ), Muhzır Süleyman Ağa b. ( ), Muhzır Feyzullah Ağa b. ( ), ve gayruhum