İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 223 Hüküm no: 137 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasilike bt. müteveffâ Dimo’nun börekçi fırını hisselerini annesi Zoyice bt. Hıristo’ya satması Börekçi mübâya‘ası Kezâlik vilâyet-i Rumeli’de Avlonya sancağına muzâfe Margaliç ma‘a Filat kazâsına tâbi‘ Bürümlü karyesinde sâkine teba‘a-i Devlet-i aliyye’nin Rum milleti nisvânından Vasilike bt. el-müteveffâ Dimo v. Kosta’nın li-ebeveyn hâli ve tarafından husûs-ı âti’l-beyânda bâ-hüccet-i şer‘iyye vekîl olduğu şahsını bilirler her biri teba‘a-i Devlet-i aliyye’nin Rum milletinden ve karye-i merkūme ahâlisinden françalacı İspiro v. Hıristo ve simidçi esnâfından Nikola v. Soma şehâdetleriyle ber-nehc -i şer‘î sâbit olan teba‘a-i saltanat-ı seniyyenin Rum milletinden ve esnâf-ı merkūmeden Yani v. Todori meclis-i şer‘-i şerîf-i hatîrde müvekkile-i merkūme Vasilike’nin anası teba‘a-i Devlet-i aliyye’nin Rum milleti nisvânından olduğu ba ilmühaber mütehakkık olup şahsı ta‘rîf-i şer‘î ile mu‘arrefe olan bâ‘isetü’r-rakīm Zoyice bt. Hıristo muvâcehesinde mahrûse-i Galata ve tevâbi‘inde vâki‘ çörekçi ve börekçi esnâfının kethüdâsı el-Hâc Mustafa Ağa b. Hasan tarafından mürsel vekîli teba‘a-i Devlet-i aliyye’nin Rum milletinden ve esnâf-ı merkūmeden Hıristo v. Oyanos hâzır olduğu hâlde bi’l-vekâle ikrâr-ı tâm ve takrîr-i kelâm edip mahrûse-i mezkûreye muzâfe İstinye nâhiyesine tâbi‘ Tarabya karyesinde vâki‘ bir tarafdan Karakolhâne ve bir tarafdan Berber Yanko’nun berber dükkânı ve bir tarafdan leb-i deryâ ve taraf-ı râbi‘i tarîk-i âm ile mahdûd cennet-mekân merhûm ve mağfiret-nişân Sultan Bayezid-i Velî Hân tâbe serâhu hazretlerinin evkāf-ı celîleleri müsakkafâtından nısf hisse-i şâyi‘ası şerbethâneci Yorgi v. Zaharya’nın ve rub‘ hisse-i şâyi‘ası müvekkilem merkūme Vasilike ile li-ebeveyn er karındaşları işbu hâzırân bi’l-meclis Anaştaş ve Vasil’in babaları müteveffâ-yı merkūm Dimo’dan müntakil ve âhar rub‘ hisse-i şâyi‘ası dahi Todori’nin bâ-temessük-i mütevelli bi’l-icâreteyn taht-ı tasarruflarında olan şehriye on iki guruş kirâlı bir bâb börekçi fırını derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla altmış sehm hisse-i şâyi‘ası nefs-i Harameyn-i muhteremeyn Evkâf-ı celîlesi müstagallâtından olarak otuz sehm hisse-i şâyi‘ası müvekkilem merkūme ile hâzırân-ı merkūmânın babaları müteveffâ-yı merkūmdan müntakil ve âhar otuz sehm hisse-i şâyi‘ası merkūm Todori’nin bâ-temessük-i mütevelli bi’l-icâreteyn taht-ı tasarruflarında olup mâ‘adâ altmış sehm hisse-i şâyi‘ası dahi kırk sehm i‘tibârıyla beş sehm hisse-i şâyi‘ası merkūme Zoyice’nin ve on dörder sehimden yirmi sekiz sehmi hâzırân-ı merkūmânın ve yedi sehmi dahi müvekkilem merkūme Vasilike’nin işbu şehr-i hâlin yirminci günü târihiyle müverraha İstanbul Mahkemesi’nden verilen işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedlerinde irsen mülkleri olmağla ben altmış sehm hisse-i şâyi‘a-i mezkûreden müvekkilem merkūme Vasilike’nin akd-i âti’z-zikrin sudûruna değin ber-minvâl-i muharrer mâlike olduğu yedi sehm hisse-i şâyi‘a-i mezkûresini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ on bin guruşa merkūme Zoyice’ye bi’l-vekâle bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on bin guruşu bana tamamen def‘ u teslîm ben dahi yedinden bi’l-vekâle tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika da‘vâdan merkūme Zoyice’nin zimmetini ibrâ-yı sahîh-i şer‘î ile müvekkilem merkūme Vasilike’ye izâfetle bi’l-vekâle ibrâ vü ıskāt eylediğimde ol dahi kezâlik mebî‘-i mezkûrun tağrîr ve gabnine müte‘allika da‘vâdan müvekkilem merkūme Vasilike’nin zimmetini ibrâ-yı sahîh-i şer‘î ile bi’l-asâle ibrâ vü ıskāt ve tarafeynden her birimiz ber-minvâl-i muharrer âharın ibrâsını asâleten ve vekâleten kabûl eyledik, ba‘de’l-yevm altmış sehm hisse-i şâyi‘a-i âlât-ı gedik-i mezkûrun [29a] ber i‘tibâr-ı merkūm yedi sehm hisse-i şâyi‘a-i mezkûresinde müvekkilem merkūme Vasilike’nin aslâ ve kat‘â alâka ve medhali kalmayıp ber i‘tibâr-ı merkūm beş sehm hisse-i şâyi‘ası mukaddemâ ve yedi sehm hisse-i şâyi‘ası hâlen şirâen ki cem‘an on iki sehm hisse-i şâyi‘ası merkūme Zoyice’nin mülk-i mahzı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 25 Rebî‘ülevvel sene 1279 Şuhûdü’l-hâl: Muhzır Süleyman Ağa b. ( ), Muhzır Osman Ağa b. ( ), Muhzır el-Hâc Yusuf Ağa b. ( ), Muhzır Feyzullah Ağa b. ( ), Tahtacı el-Hâc Salih Ağab. ( ) ve gayruhum