İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 225 Hüküm no: 138 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Hüseyin Hüsnü Efendi’ye ait ekmek fırını ve değirmeni hisselerinin müzâyede yoluyla satılması Habbâz fırını. İhrâc şüd fî 4 Receb sene 99 Kezâlik mahmiye-i İstanbul’da Hocapaşa mahallesinde sâkin iken bundan mukaddem vefât eden mukaddemâ ekmekçi esnâfı kethüdâsı Hüseyin Hüsnü Efendi b. el-Hâc Mehmed Tahir b. zu‘amâdan Ömer Ağa’nın verâseti zevce-i menkûha-i metrûkesi Fâtıma Dilber Hanım bt. Abdullah ile sulbî sagīr oğlu Hasan Tahsin Bey ve sulbiye kebîre kızı Emine Nefise Perver Hanım ve sulbiye sagīre kızı Fâtımatü’z-zehrâ’ya münhasıra olduğu lede’ş-şer‘i’l-enver zâhir ve mütehakkık oldukdan sonra sagīran-ı mezbûrânın tesviye-i emirlerine kıbel-i şer‘den bâ-hüccet-i şer‘iyye vasiyy-i mansûbları el-Hâc Mehmed Efendi b. Ahmed zevce-i mezbûre Fâtıma Dilber Hanım tarafından husûs-ı âti’l-beyânda vekîl-i müseccel-i şer‘îsi es-Seyyid Abdülhalim Ağa b. Süleyman ile zâtı ta‘rîf-i şer‘î ile mu‘arrefe olan bint-i mûmâ-ileyhâ Emine Nefise Perver Hanım hâzır oldukları hâlde meclis-i şer‘-i şerîf-i enverde her biri teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan esnâf-ı merkūmeden bâ‘isü’r-rakīm Nişan v. Artin ve Artin v. Mardiros ve nefsinden asîl ve li-ebeveyn er karındaşı Haçik v. Abranos tarafından husûs-ı âti’z-zikrde tasdîka vekîl-i şer‘îsi Kirhor muvâcehelerinde Âsitâne-i aliyye ve bilâd-ı selâsede vâki‘ ekmekçi ve uncu ve françalacı esnâfının kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekîlleri esnâf-ı merkūmenin yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde bi’l-vesâye ikrâr-ı tâm ve takrîr-i kelâm edip medîne-i Hazret-i Ebâ Eyüb el-Ensârî radıye anhu Rabbühü’l-bârî civârında Çömlekciler nâm mahalde Cezerî Kasım Paşa mahallesinde vâki‘ bir tarafdan Mustafa Bey bahçesi ve bir tarafdan Sıdıka Hanım menzili ve bahçesi ve bir tarafdan Çaylak el-Hâc İbrahim Ağa hamamı ve taraf-ı râbi‘i tarîk-i âm ile mahdûd merhûm Selami Mehmed Bey Vakfı müsakkafâtından asîl ve vekîl ve müvekkil-i merkūmûn Nişan ve Artin ve Kirhor ve Haçik’in bi’l-icâreteyn taht-ı tasarruflarında olan şehriye otuz guruş kirâlı Çömlekciler fırını demekle arîf bir bâb habbâz fırını ve ona merbût şehriye otuz beş guruş kirâlı altı horosu ekmekçi ve bir horosu uncu ki cem‘an yedi horoslu bir bâb değirmen derûnlarında mevcûde beyne’l-esnâf gedik ta‘bîr olunur yirmi dört re’s bârgir ekmekçi ve dört re’s bârgir uncu ki cem‘an yirmi sekiz re’s bârgir ve onlara tâbi‘ sâir âlât-ı lâzime-i ma‘lûmenin iki re’s bârgir ekmekçi ve dört re’s bârgir uncu ki cem‘an altı re’s bârgir ve onlara isâbet eden âlât-ı sâiresi gāib ani’l-meclis Karabet v. Ohannes’in ve üç re’s bârgir ekmekçi ve onlara îcâb eden âlât-ı sâiresi kezâlik gāib ani’l-meclis Agop v. Nişan’ın ve diğer üç re’s bârgir ve onlara iktizâ eden âlât-ı sâiresi merkūm Nişan’ın ve âhar üç re’s bârgir ve onlara isâbet [eden] âlât-ı sâiresi kezâlik gāib ani’l-meclis Manuk v. Artin’in ve bir re’s bârgir on iki mıh ve ona îcâb eden âlât-ı sâiresi müvekkil-i merkūm Haçik’in ve diğer bir re’s bârgir ve on iki mıh ve ona iktizâ eden âlât-ı sâiresi asîl ve vekîl-i merkūm Kirhor’un yedlerinde mülkleri olup mâ‘adâ on re’s bârgir ekmekçi ve onlara isâbet eden âlât-ı sâiresi müteveffâ-yı mûmâ-ileyh Hüseyin Hüsnü Efendi’nin hayâtında yedinde olup bin iki yüz altmış iki senesi Şa‘bani’l-mu‘azzamının on beşinci ve sene-i merkūme şehr-i Ramazani’l-mübarekinin yirmi birinci günleri târihleriyle müverrahalar ve ol târihlerde Dârü’l-hilâfeti’l-aliyye kādısı olan sudûr-ı izâmdan Kahvecibaşızâde Mehmed Nurullah Efendi merhûmun imzâ ve hatmleriyle mahtûmeler işbu iki kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca ile’l-vefât yedinde mülkü ve ba‘de vefâtihî vasîleri olduğum sagīran-ı mezbûrân Hasan Tahsin Bey ve Fâtımatü’z-zehra ile zevcesi müvekkile-i merkūme Fâtıma Dilber Hanım ve kızı hâzıra-i mûmâ-ileyhâ Emine Nefise Perver Hanım’a mevrûs olmağla ben bi’l-vesâye vekîl-i mezbûr es-Seyyid Abdülhalim Ağa müvekkilesi mezbûre Fâtıma Dilber Hanım’a izâfetle bi’l-vekâle ve hâzıra-i mûmâ-ileyha Emine Nefise Perver Hanım dahi bi’l-asâle sâlifü’l-beyân on re’s bârgir ekmekçi ve onlara isâbet eden âlât-ı sâireyi münâdî yediyle sûk-ı sultânî ve mecma‘-ı nâs olan mahallerde lede’l-müzâyede ve gıbbe inkıtâ‘ı’r-rağbe sâlifü’l-beyân on re’s bârgir ekmekçi ve onlara isâbet eden âlât-ı sâirenin dört re’s bârgir ve onlara îcâb eden âlât-ı sâiresini bi-safkatin vâhidetin el-yevm semen-i misli idüğü cerîdede mazbûtü’l-esâmî kimesnelerin alâ tarîki’ş-şehâde ihbârlarıyla zâhir ve mütehakkık olan beş bin guruşa merkūm Nişan’a ve üç re’s bârgir ve onlara iktizâ eden âlât-ı sâiresini kezâlik bi-safkatin vâhidetin el-yevm semen-i misli idüğü cerîdede mazbûtü’l-esâmî kimesnelerin alâ tarîki’ş-şehâde ihbârlarıyla mütehakkık olan on bir bin iki yüz elli guruşa merkūm Artin’e ve bir re’s bârgir on iki mıh ve ona isâbet eden âlât-ı sâiresini kezâlik bi-safkatin vâhidetin el-yevm semen-i misli idüğü cerîdede mazbûtü’l-esâmî kimesnelerin alâ tarîki’ş-şehâde ihbârlarıyla zâhir ve mütehakkık olan beş bin altı yüz yirmi beş guruşa müvekkil-i merkūm Haçik’e ve diğer bir re’s bârgir on iki mıh ve ona iktizâ eden âlât-ı sâiresini dahi kezâlik bi-safkatin vâhide el-yevm semen-i misli idüğü cerîdede mazbûtü’l-esâmî kimesnelerin alâ tarîki’ş-şehâde ihbârlarıyla zâhir ve mütehakkık olan beş bin altı yüz yirmi beş guruşa asîl ve vekîl-i merkūm Kirhor’a tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bâ-izn-i şürekâ merkūmûn bey‘ ve temlîk ve vech-i lâyıkı üzere teslîm eylediğimizde onlar dahi ber-vech-i muharrer iştirâ ve temellük ve tesellüm ve kabz u kabûl eylediklerinden sonra semenleri olan cem‘an otuz yedi bin beş yüz guruşu tamâmen bize def‘ u teslîm biz dahi yedlerinden bi’l-vesâye ve bi’l-vekâle ve bi’l-asâle ahz u kabz ve müteveffâ-yı mûmâ-ileyhin defter-i kassâmına idhâl eyledik ba‘de’l-yevm sâlifü’l-beyân on re’s bârgir ekmekçi ve onlara isâbet eden âlât-ı sâirede vasîleri olduğum sagīrân-ı mezbûrân Hasan Tahsin Bey ve Fâtımatü’z-zehra ve müvekkile-i mezbûre Fâtıma Dilber Hanım ve hâzıra-i mûmâ-ileyhâ Emine Nefise Perver Hanım’ın aslâ ve kat‘â alâka ve medhalleri kalmayıp üç re’s bârgir mukaddemâ ve dört re’s bârgir hâlâ şirâen ki cem‘an yedi re’s bârgir ve onlara isâbet eden âlât-ı sâiresi merkūm Nişan’ın ve üç re’s bârgir ve onlara îcâb eden âlât-ı sâiresi merkūm Artin’in ve bir re’s bârgir on iki mıh mukaddemâ ve bir re’s bârgir on iki mıh hâlen şirâen ki cem‘an üç re’s bârgir ve onlara iktizâ eden âlât-ı sâiresi müvekkil-i merkūm Haçik’in ve diğer bir re’s bârgir on iki mıh mukaddemâ ve yine bir re’s bârgir on iki mıh hâlâ şirâen ki cem‘an üç re’s bârgir ve onlara isâbet eden âlât-ı sâiresi dahi asîl ve vekîl-i merkūm Kirhor’un mülk-i mahz ve hakk-ı sırfları olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 20 Muharrem sene 1279 Şuhûdü’l-hâl: Muhzır Osman Ağa b. ( ), Muhzır İsmail Ağa b. ( ), Muhzır Feyzullah Ağa b. ( ), Tahtacıel-Hâc Salih Ağa b. ( ), ve gayruhum