İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 252 Hüküm no: 158 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Trazine bt. Bedros ve kızı Siba bt. Artin’in uncu değirmenindeki hisselerini satmaları Uncu değirmeni 1000 guruş Kezâlik mahrûse-i Galata’ya muzâfe Beşiktaş’da Yeni mahallede sâkine teba‘a-i Devlet-i aliyye’nin Ermeni milleti nisvânından Trazine bt. Bedros v. Adam tarafından husûs-ı âti’l-beyânda ikrâra vekîl olduğu şahsını ârifân ekmekçi esnâfının salıcılarından Hasan Ağa b. Mehmed ve Mehmed Ağa b. Ali şehâdetleriyle ber-nehc -i şer‘î sâbit olan teba‘a-i Devlet-i aliyye’nin Ermeni milletinden ve esnâf-ı merkūmeden Bağdasar v. Ohannes müvekkile-i merkūme Trazine’nin sadriye kebîre kızı teba‘a-i Devlet-i aliyye’nin Ermeni milleti nisvânından şahsı ta‘rîf-i şer‘î ile mu‘arrefe olan Siba bt. Artin hâzıra olduğu meclis-i şer‘-i hatîrde her biri teba‘a-i Devlet-i aliyye’den olduğu bâ-ilmühaber mütehakkık olup nefsinden asîl ve li-ebeveyn er karındaşı esnâf-ı merkūmeden Filibos v. Ohan tarafından husûs-ı âti’l-beyânda tasdîka vekîl-i şer‘îsi esnâf-ı merkūmeden Magdisi Avadis muvâcehesinde esnâf-ı mezkûre kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekilleri Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde bi’l-vekâle ikrâr-ı tâm ve takrîr-i kelâm edip müvekkile-i merkūme Trazine ben medîne-i Üsküdar’da Toptaşı nâm mahalde vâki‘ merhûme Atîk Valide Sultan Evkāfı müsakkafâtından asîl ve vekîl ve müvekkil-i merkūmân Filibos ve Magdisi Avadis’in bâ-temessük-i mütevelli bi’l-icâreteyn taht-ı tasarruflarında olan şehriye on beş guruş kirâlı ma‘lûmu’l-hudûd Toptaşı değirmeni demekle arîf üç horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on iki re’s bârgir ve onlara tâbi‘ sâir âlât-ı lâzime-i ma‘lûmenin on re’s bârgir ve onlara isâbet eden âlât-ı sâiresi âharların yedlerinde mülkleri olup mâ‘adâ iki re’s bârgir ve onlara îcâb eden âlât-ı sâiresi dahi akd-i âti’z-zikrin sudûruna değin bin iki yüz elli beş senesi Cumâdelâhiresi’nin on ikinci günü târihiyle müverraha ve ol târihde Dârü’l-hilâfeti’l-aliyye kādısı olan Reîsü’l-küttâb Arif Efendizâde Mehmed Raif Efendi merhûmun imzâ ve hatemini hâviye işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca benimle kızım hâzıra-i merkūme Siba’nın yedimizde münâsefeten mülkümüz olmağla biz ber-minvâl-i muharrer mâlike olduğumuz sâlifü’l-beyân iki re’s bârgir ve onlara îcâb eden âlât-ı sâiresini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-işer‘î ve safka-i vâhide ile bâ-izn-i şürekâ bin guruşa asîl ve vekîl ve müvekkil-i merkūmân Filibos ve Magdisi Avadis’e bey‘ ve temlîk ve vech-i lâyıkı üzere teslîm eylediğimizde onlar dahi ber-vech-i muharrer münâsafa iştirâ ve temellük ve tesellüm ve kabz u kabûl eylediklerinden sonra semeni olan meblağ-ı merkūm bin guruşu tamâmen bize def‘ u teslîm biz dahi yedlerinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm sâlifü’l-beyân iki re’s bârgir ve onlara îcâb eden âlât-ı sâirede benimle kızım hâzıra-i merkūme Siba’nın aslâ ve kat‘â alâka ve medhalimiz kalmayıp asîl ve vekîl ve müvekkil-i merkūmân Filibos ve Magdisi Avadis’in ale’l-iştirâki’s-seviy mülk-i müşterâları hakk-ı sırfları olmuşdur dedi dedikde gıbbe’t-tasadîki’ş-şer‘î mâ-vaka‘a bi’t-taleb ketb olundu. Fî 20 Safer sene 1279 Şuhûdü’l-hâl: Muhzır Şakir Ağa b. ( ), Muhzır Mustafa Ağa b. ( ), Muhzır Ahmed Ağa b. ( ), ve gayruhum