İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 251 Hüküm no: 157 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avrupa tüccârından Haci Togofilos v. Haci Todori’nin kârgîr tütüncü dükkânı hisselerinin yarısını Ralo bt. İstefan’a satması Tütüncü mübâya‘ası 10000 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri [tarafından] da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen teba‘a-i Devlet-i aliyye’nin Rum milletinden ve Avrupa tüccârından Haci Togofilos v. Haci Todori meclis-i şer‘-i şerîf-i hatîrde mahrûse-i Galata’ya muzâfe Ortaköy’de sâkine teba‘a-i Devlet-i aliyye’nin Rum milleti nisvânından olduğu bâ-ilmühaber mütehakkık olan bâ‘isetü’r-rakīm Ralo bt. İstefan’ın zevci ve tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’nin Rum milletinden ve Avrupa tüccârından Keşişoğlu İstavri v. Todori muvâcehesinde tütüncü esnâfının kethüdâsı es-Seyyid el-Hâc Mehmed Latif Efendi b. es-Seyyid İsmail ile duhân tüccârından on nefer müslim ve beş nefer hıristiyan lonca ihtiyârları taraflarından mürsel vekîlleri yiğitbaşısı Receb Ağa b. Mehmed hâzır olduğu hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından Bâb-ı Caferî hâricinde Taşçılar içinde Taşçı Ahmed Ağa ve Taşçı el-Hâc Mehmed Said Ağa dükkânları beynlerinde vâki‘ Mîrahur-ı evvel Ali Ağa Vakfı müsakkafâtından benim bâ-temessük-i mütevelli bi’l-icâreteyn taht-ı tasarrufumda olan şehriye yedi guruş kirâ-yı kâdimeli fevkinde bir bâb odayı müştemil bir bâb kârgîr tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yedimde olup bin iki yüz altmış beş senesi Cumâdelâhire’si gurresi târihiyle müverraha ve ol târihde Dârü’l-hilâfeti’l-aliyye kādısı olan Yahya Beyzâde İbrahim İsmet Beyefendi merhûmun imzâ ve hatemini hâviye işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca akd-i âti’z-zikrin sudûruna değin müstakillen yedimde mülk ve hakkım olmağla ben ber-minvâl-i muharrer mâlik olduğum âlât-ı lâzime-i ma‘lûmenin nısf hisse-i şâyi‘asını yedimde bi’l-ibkā mâ‘adâ âhar nısf hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i merkūme Ralo’ya on bin guruşa bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik mezkûrun âhar nısf hisse-i şâyi‘a-i mezkûresinde benim aslâ ve kat‘â alâka ve medhalim kalmayıp müvekkile-i merkūme Ralo’nun mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi 13 Cumâdelûlâ sene 1279 Şuhûdü’l-hâl: Muhzır Mustafa b. ( ), Muhzır Ahmed Ağa b. ( ), Muhzır Şakir Ağa b. ( ), Muhzır Süleyman Ağa b. ( ), Muhzır Salih Ağa b. ( ), ve gayruhum