İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 255 Hüküm no: 160 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakomi v. Hıristo’nun şerbethâne hisselerini Tanaş v. Zaharya’ya satması Şerbethâne mübâya‘ası 53500 guruş Kezâlik teba‘a-i Devlet-i aliyye’nin Rum milletinden ve şerbethâneci esnâfından Yakomi v. Hıristo meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan esnâf-ı mezkûreden bâ‘isü’r-rakīm Tanaş v. Zaharya muvâcehesinde teba‘a-i Devlet-i aliyye’nin Rum milletinden ve esnâf-ı merkūme çavuşu Aspar v. Kiryako hâzır olduğu hâlde ikrâr-ı tâm ve takrîr-i kelâm edip mahrûse-i Galata’da Kemankeş Kara Mustafa Paşa mahallesinde Sandıkçılar başında İsbitalya karşısı nâm mahalde vâki‘ bir tarafdan Canfesçi Kostaki menzili ve bir tarafdan halatcılar kethüdâsı Ali Ağa menzili ve tarafeyni tarîk-i âm ile mahdûd merkūm Kostaki’nin mutasarrıf olduğu şehriye kırk guruş kirâlı Küçük Kafesli şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla altmış sehm hisse-i şâyi‘ası âharın yedinde mülkü olup mâ‘adâ altmış sehm hisse-i şâyi‘ası dahi akd-i âti’z-zikrin sudûruna değin bin iki yüz altmış üç senesi Zilhicceti’ş-şerîfesinin selhi târihiyle müverrah ve ol târihde rüsûm-i zecriye muhassılı olan sa‘âdetlü Rüstem Paşa’nın mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûkunca yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum altmış sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk elli üç bin beş yüz guruşa merkūm Tanaş’a bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm elli üç bin beş yüz guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz eyledim fîmâ-ba’d altmış sehm hisse-i şâyi‘a-i âlât-ı gedik-i mezkûrde benim aslâ ve kat‘â alâka ve medhalim kalmayıp merkūm Tanaş’ın mülk-i müşterâsı ve hakk-ı sırfı olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 29 Cumâdelûlâ sene 1279 Şuhûdü’l-hâl: Muhzır Şakir Ağa b. ( ), Muhzır Ahmed Ağa b. ( ), Muhzır Süleyman Ağa b. ( ), Muhzır el-Hâc Salih Ağa b. ( ), ve gayruhum