İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 256 Hüküm no: 161 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedros v. İsteban’ın ekmekçi ve françalacı fırını hisselerinden oluşan mirasının taksimi ve satışı Habbâz fırını mübâya‘a 4000 guruş Kezâlik vilâyet-i Anadolu’da Çemişgezek kazâsına tâbi‘ Tagar karyesinde sâkin iken bundan mukaddem fevt olan teba‘a-i Devlet-i aliyye’nin Ermeni milletinden ve ekmekçi esnâfından Bedros v. İsteban v. Adam’ın verâseti her biri teba‘a-i Devlet-i aliyye’den zevce-i metrûkesi Azakil bt. Karabet ile müteveffât zevcesi Agva bt. Adam’dan mütevellidler sulbî kebîr oğulları Bedros ve Kirkor’a münhasıra ba‘dehû merkūm Bedros dahi fevt olup verâseti zevce-i metrûkesi Hacer bt. Filibos ile anası merkūme Azakil ve li-ebeveyn er karındaşı merkūm Kirkor’a münhasıra ba‘de merkūm Kirkor dahi fevt olup verâseti zevcesi Kefise bt. Artin ile anası merkūme Azakil’e münhasıra ba‘demerkūme Azakil dahi fevt olup verâseti müteveffâ zevci Agop v. Adam’ın firâşından hâsıla sadriye kebîre kızı Maryam’a ba‘de’l-inhisâr merkūmât Hacer ve Kefise ve Maryam taraflarından husûs-ı âti’l-beyânda ikrâra vekîlleri olduğu şahslarını bilürler her biri teba‘a-i Devlet-i aliyye’nin Ermeni milletinden Tahtakale fırını ustabaşısı Agop v. Karabet ve Deniz hamamı fırını ustası Artin v. Ohannes şehâdetleriyle ber-nehc -i şer‘î sâbit olan teba‘a-i Devlet-i aliyye’nin Ermeni milletinden ve esnâf-ı mezkûreden Aranos v. Hazer meclis-i şer‘-i şerîf-i hatîrde her biri teba‘a-i Devlet-i aliyye’den olduğu ba-ilmühaber mütehakkık olan bâ‘iseyi’r-rakīm nefsinden asîl ve li-ebeveyn er karındaşı Sâğır Bedros v. Avanis tarafından husûs-ı âti’l-beyânda tasdîka vekîl-i şer‘îsi Makos muvâcehesinde esnâf-ı merkūme kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekîlleri Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde bi’l-vekâle ikrâr-ı tâm ve takrîr-i kelâm edip müvekkilelerim merkūmât Hacer ve Kefise ve Maryam mahrûse-i Galata’ya muzâfe İstinye nâhiyesine tâbi‘ Büyükdere karyesinde vâki‘ bir tarafdan Hançerli Bey sahilhânesi ve bir tarafdan leb-i deryâ ve bir tarafdan Kasâb Anaştaş v. İstefan’ın kasâb dükkânı ve taraf-ı râbi‘i tarîk-i âm ile mahdûd şehriye otuz guruş kirâlı bir bâb ekmekçi fırını ve yine karye-i mezkûrede vâki‘ iki tarafdan Sotri şerbethânesi ve bağı ve bir tarafdan Tavukçuoğlu şerbethânesi ve taraf-ı râbi‘i tarîk-i âm ile mahdûd şehriye otuz guruş kirâlı bir bâb françalacı fırını derûnlarında mevcûde beyne’l-esnâf gedik ta‘bîr olunur âlât-ı lâzime-i ma‘lûmelerin otuz altı sehm i‘tibârıyla yirmi sekiz sehm hisse-i şâyi‘ası âharların yedlerinde mülkleri olup mâ‘adâ sekiz sehm hisse-i şâyi‘ası dahi müteveffâ-yı evvel merkūm Bedros’un hayâtında ile’l-fevt bin iki yüz on yedi senesi Saferi’l-hayrının on yedinci günü târihiyle müverrah bir kıt‘a ve bin iki yüz otuz senesi Zilka‘deti’ş-şerîfesinin dokuzuncu günü târihiyle müverrah bir kıt‘a ki cem‘an iki kıt‘a sûret ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedinde mülkü ve ba‘de fevtihî bize bi tarîki’l-münâsaha mevrûs olmağla biz âlât-ı gedik-i mezkûrlardan ber-minvâl-i muharrer mâlike olduğumuz sekiz sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ dört bin guruşa asîl ve vekîl ve müvekkil-i merkūmân Sâğır Bedros ve Makos’a bey‘ ve temlîk ve vech-i lâyıkıyla teslîm eylediğimizde onlar dahi ber-vech-i muharrer seviyyen iştirâ ve temellük ve tesellüm ve kabz u kabûl eylediklerinden sonra semeni olan meblağ-ı merkūm dört bin guruşu tamâmen bize def‘ u teslîm biz dahi yedlerinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü iskāt [34b] ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrların sekiz sehm hisse-i şâyi‘a-i mezkûresinde bizim aslâ ve kat‘â alâka ve medhalimiz kalmayıp asîl ve vekîl ve müvekkil-i merkūmân Sâğır Bedros ve Makos’un ale’l-iştirâki’s-seviy mülk-i müşterâları ve hakk-ı sırfları olmuşdur dedi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 10 Cumâdelulâ sene 1279 Şuhûdü’l-hâl: Muhzır Mustafa Ağa b. ( ), Muhzır Ahmed Ağa b. ( ), Muhzır Süleyman Ağa b. ( ), Muhzır Şakir Ağa b. ( ), ve gayruhum