İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 265 Hüküm no: 168 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbethâneci esnâfından Anaştaş v. Haci Yorgi’nin şerbethâne hisselerini Avram v. Anaştaş’a satması ve borcunu ödemesi Langa’da karanlık şerbethâne Kezâlik Vilâyet-i Anadolu’da Niğde sancağında Çamardı kazâsına tâbi‘ Fertek karyesinde sâkin teba‘a-i Devlet-i aliyye’nin Rum milletinden ve şerbethâneci esnâfından Açıkbacakoğlu Anaştaş v. Haci Yorgi v. Adam tarafından husûs-ı âti’l-beyânda ikrâra bâ-hüccet-i şer‘iyye vekîl olduğu her biri teba‘a-i Devlet-i aliyye’nin Rum milletinden ve karye-i merkūme ahâlisinden ve esnâf-ı merkūmeden Dimyanos v. Polinharon ve şerbethâneci Anaştaş v. Apostol şehâdetleriyle ber-nehc -i şer‘î sâbit olan mahmiye-i İstanbul’da Mahmudpaşa civârında Çorapçı Hânı şerbethânesinde sâkin teba‘a-i Devlet-i aliyye’den ve millet-i merkūmeden şerbethâneci Karacaoğlu Avraham v. Pretamos meclis-i şer‘-i hatîr-i lâzımü’t-tevkīrde kezâlik teba‘a-i Devlet-i aliyye’den ve millet-i merkūmeden karye-i merkūmede sâkin işbu hâmilü’r-rakīm Tomaoğlu Avram v. Anaştaş tarafından husûs-ı âti’l-beyânda tasdîka vekîl-i şer‘îsi kezâlik teba‘a-i Devlet-i aliyye’den ve millet-i merkūmeden şerbethâneci diğer Avram v. Kiryako muvâcehesinde her biri teba‘a-i Devlet-i aliyye’den ve esnâf-ı merkūme ustabaşılarından Vasil v. Praşkova ve Todori v. Avraham ve Avraham v. Yakof hâzır oldukları hâlde ikrâr-ı tâm ve takrîr-i kelâm edip müvekkilim merkūm Anaştaş İstanbul’da Langa çeşmesi civârında Kâtip Kasım mahallesinde Cadde yolda kâin Karanlık şerbethâne demekle arîf bir tarafdan Haci Ohannes v. Kirkor’un menzil arsası ve bir tarafdan Kadınko bt. Haci Paskal arsası ve ba‘zen Pretamos v. Mihal’in menzil arsası ve bir tarafdan Sima bt. Arakil’in menzil arsası ve bir tarafdan tarîk-i âm ile mahdûd merhûm es-Seyyid Abdulbâki Efendi Vakfı müsakkafâtından şerbethâneci Haci Delot v. Yakof ve Anaştaş v. Yorgi’nin taht-ı tasarruflarında olan şehriye on guruş kirâlı elli iki zirâ‘ arsa üzerine mebnâ bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla doksan sekiz buçuk sehmi âharların ve mâ‘adâ yirmi bir buçuk sehmi dahi rüsûm-i zecriye nâzırı-ı esbak Rüstem Paşa’nın mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi nâtıklar olduğu üzere akd-i âti’z-zikrin sudûruna değin yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum yirmi bir buçuk sehm hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i merkūm Avram’a bâ-izn-i şürekâ on iki bin beş yüz guruşa bey‘ ve temlîk ve teslîm eylediğimde ol dahi iştirâ ve temellük ve tesellüm ve kabz u kabûl edip semeni olan meblağ-ı mezkûr on iki bin beş yüz guruşu benim müvekkilim merkūma cihet-i deyn-i şer‘îden zimmetimde deynim olan on iki bin beş yüz guruşa bi’t-terâzi takās ve mahsûb ve her birimiz mukāssa ve kabûl edip ol vechile semen-i mezkûr on iki bin beş yüz guruşu ben müvekkil-i merkūm Avram’dan ve merkūm Avram dahi deyn-i merkūm on iki bin beş yüz guruşu benden ahz u kabz ve her birimiz istîfâ-yı hakk etmemizle mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrun yirmi bir buçuk sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp müvekkil-i merkūm Avram’ın mülk-i müşterâsı ve hakk-ı sırfı olmuşdur dedikde gıbbe. Fî 13 Rebî‘ülevvel sene 1279 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), Muhzır Ahmed Ağa b. ( ), ve gayruhum