İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 264 Hüküm no: 167 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlya v. Kanarya Yorgi’nin vefâtından sonra kız ve erkek kardeşlerine miras kalan şerbethâne hisselerinin mirasçılardan Todori’ye satılması Üsküdar’da şerbethâne gediği Kezâlik medîne-i Üsküdar’da Yeni mahallede sâkin iken bin iki yüz yetmiş beş senesi hilâlinde fevt olan teba‘a-i Devlet-i aliyye’nin Rum milletinden şerbethâneci İlya v. Kanarya Yorgi v. Adam’ın verâseti her biri teba‘a-i Devlet-i aliyye’den li-ebeveyn er karındaşları şerbethâneci Todori ve Taşçı Nikola ve li-ebeveyn kız karındaşları Arsti ve Eleniko ve Timiçe’ye münhasıra ve tashîh-i mesele-i mirâsları yedi sehimden olup sihâm-ı merkūmeden ikişer sehimden cem‘an dört sehmi merkūmân Todori ve Nikola’ya ve birer sehimden cem‘an üç sehmi dahi merkūmât Arsti ve Eleniko ve Timiçe’ye isâbeti lede’ş-şer‘i’l-enver zâhir ve mütehakkık oldukdan sonra verese-i merkūmûndan merkūm Nikola ve şahısları mu‘arrefeler merkūmât Arsti ve Elelniko ve Timiçe’den her biri meclis-i şer‘-i hatîr-i lâzımü’t-tevkīrde merkūm Todori muvâcehesinde şerbethâneci esnâfı[nın] Samatya kolu ustabaşısı Haci Delot v. Andon ve esnâf-ı merkūme çavuşu Bodos v. Kostandi ve terzi esnâfından mahalle-i merkūmede sâkin Polinçerona v. Yorgi hâzır oldukları hâlde ikrâr-ı tâm ve takrîr-i kelâm edip mahalle-i merkūmede Uzun cadde yolunda Karakolhâne civârında bakkal dükkânı ittisâlinde kâin Kanarya Yorgaki şerbethânesi demekle arîf bir tarafdan Bakkal Polinçeron’un bakkal dükkânı ve bir tarafdan Haci Agop’un kahve dükkânı ve bir tarafdan manav dükkânı ve bir tarafdan tarîk-i âm ile mahdûd şehriye yirmi guruş kirâlı bir bâb vakıf şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla yüz altı sehm hissesi âharların ve mâ‘adâ on dört sehm hisse-i şâyi‘ası dahi mûrisimiz karındaşımız müteveffâ-yı merkūmun hayâtında ile’l-fevt bâ-sûret ve bâ-ilmühaber-i Zecriye yedinde mülkü ve ba‘de fevtihî mesele-i mirâsımız vechile ber tashîh-i merkūm bize mevrûs olmağla biz âlât-ı gedik-i mezkûrun on sehm hisse-i şâyi‘a-i merkūmesinden ber tashîh-i merkūm irsen mâlik olduğumuz cem‘an beş sehm hisse-i şâyi‘amızı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile karındaşımız merkūm Todori’ye bâ-izn-i şerîk üç bin guruşa bey‘ ve temlîk ve teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz u kabûl edip semeni olan meblağ-ı mezkûr üç bin guruşu bize def‘ u teslîm eylediğinde biz dahi yedinden bi’t-tamâm ve’l-kemâl ahz u kabz ve bi-kadri’l-hısas beynimizde iktisâm edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun on dört sehm hisse-i şâyi‘asının ber tashîh-i merkūm beş sehm hisse-i şâyi‘asında bizim aslâ ve kat‘â alâka ve medhalimiz kalmayıp on dört sehm hisse-i şâyi‘a-i mezkûrenin iki sehm hisse-i şâyi‘ası mukaddemâ irsen ve beş sehm hisse-i şâyi‘ası bu def‘a şirâen ki on dört sehm hisse-i şâyi‘a-i âlât-ı gedik-i mezkûrun mecmû‘u merkūm Todori’nin mülk-i mahz ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 17 Cumâdelûlâ sene 1279 Şuhûdü’l-hâl: Muhzır Ahmed Ağa b. ( ), Muhzır Şakir Ağa b. ( ), Muhzır Süleyman Ağa b. ( ), Muhzır Mustafa Ağa b. ( ), ve gayruhum