İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 272 Hüküm no: 173 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Angeliko bt. Anaştaş’ın kocası şerbethâneci esnâfından Filibos v. Pretamos’tan kendisine miras kalan şerbethâne hisseleri için hüccet talebi Yine gedik-i mezkûrdan hisse ihbârı Kezâlik vilâyet-i Anadolu’da Bereketli nâm-ı diğer Çamardı kazâsına tâbi‘ Fertek karyesinde sâkin iken bundan mukaddem fevt olan teba‘a-i Devlet-i aliyye’nin Rum milletinden ve şerbethâneci esnâfından Filibos v. Pretamos v. Dimyat’ın verâseti her biri teba‘a-i Devlet-i aliyye’den karye-i mezkûrede sâkinler zevce-i metrûkesi Angeliko bt. Anaştaş ile sulbî sagīr oğlu Nikola ve sulbiye kebîre kızları Anaştaşya ve Marya ve Sara ve Eftimye’ye münhasıra ve tashîh-i mesele-i mirâsları kırk sekiz sehimden olup sihâm-ı mezkûreden altı sehmi zevce-i merkūme Angeliko’ya ve on dört sehmi sagīr-i merkūm Nikola’ya ve yedişer sehimden yirmi sekiz sehmi dahi merkūmât Anaştaşya ve Marya ve Sara ve Eftimye’ye isâbeti lede’ş-şer‘i’l-enver zâhir ve mütehakkık oldukdan sonra bâ‘isetü’r-rakīm merkūme Angeliko tarafından husûs-ı âti’l-beyânda vekîl-i şer‘îsi teba‘a-i Devlet-i aliyye’nin Rum milletinden ve şerbethâneci esnâfından Avraham v. Pretamos meclis-i şer‘-i şerîf-i hatîrde her biri teba‘a-i Devlet-i aliyye’den ve esnâf-ı merkūmenin Beyoğlu kolu ustabaşısı Dülbendcioğlu Andon v. Ohannes ve esnâfından Sa‘lebçi Hânı şerbethânesi ustası Yovakim v. İstefan ve Bakla Hânı şerbethânesi ustası Avraham v. Kiryako ve çavuşu Bodos v. Kostandi hâzır oldukları hâlde bi’l-vekâle takrîr-i kelâm ve ta‘bîr ani’l-merâm edip mahmiye-i İstanbul’da Sultan hamamı kurbünde Kazgancılar civârında vâki‘ Kapudan-ı esbak merhûm Piyale Paşa Vakfı müsakkafâtından Çorabçı Hânı demekle arîf bir bâb hân derûnunda süflâ-i zemînde kâin merhûm-ı müşârun-ileyh Piyale Paşa Vakfı müsakkafâtından gāib ani’l-beled Kurdoğlu Bunyad v. Pretamos’un bi’l-icâreteyn taht-ı tasarrufunda olan şehriye on guruş kirâlı peykeyi hâvî bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla beş sehm hisse-i şâyi‘ası müteveffâ-yı merkūm Filibos’un hayâtında ile’l-fevt bin iki yüz elli iki senesi Şevvali’l-mükerreminin on dokuzuncu günü târihiyle müverrah ve ol târihde rüsûm-i zecriye muhassılı es-Seyyid İbrahim Edhem Efendi’nin mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca yedinde mülkü ve ba‘de fevtihî müvekkilem merkūme Angeliko ve sagīr-i merkūm Nikola ve merkūmât Anaştaşya ve Marya ve Sara ve Eftimye’ye ber tashîh-i mezkûr mevrûs olup lakin âlât-ı gedik-i mezkûrun beş sehm hisse-i şâyi‘a-i mezkûresinin ber tashîh-i merkūm altı sehm hisse-i şâyi‘ası ber-minvâl-i muharrer müvekkilem merkūme Angeliko’nun mülkü olduğunu nâtık yedinde sened-i şer‘î olmamağla hakīkat-i hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile beş sehm hisse-i şâyi‘a-i âlât-ı gedik-i mezkûrun ber tashîh-i merkūm altı sehm hisse-i şâyi‘a-i merkūmesi ber-vech-i meşrûh müvekkilem merkūme Angeliko’nun mülkü olduğunu nâtıka kıbel-i şer‘den yedine bir kıt‘a hüccet-i şer‘iyye i‘tâ buyurulmak matlûbumdur deyu bi’l-vekâle istid‘â etdikde hâl vekîl-i merkūm Abraham’ın bâlâda bast ve beyân eylediği minvâl üzere olduğunu husûs-ı mezkûre vukūf-ı tâmları olan esnâf-ı hâzırûn-ı merkūmûndan her biri alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu. Fî 24 Zilhicce sene 1278 Şuhûdü’l-hâl: Eş-şahidune’s-sabıkūn