İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 273 Hüküm no: 174 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ebubekir Ağa b. İsmail’in yanmış kârgîr hânın arsası üzerine yeni bir hân inşa etme ve altına çörekçi fırını açma talebi Asl-ı târih fi 1 Muharrem [12]79 İşbu sebt-i hâmiş olunan hüccet derûnunda mezkuru’l-isim sadr-ı vâlâ-yı Anadolu tahtacısı el-Hâc Ebubekir Ağa b. İsmail nâm kimesne meclis-i şer‘-i münîrde takrîr-i kelâm edip Nezâret-i Evkāf-ı hümâyûn’a mülhak evkāfdan merhûm Ahi Çelebi Vakfı müsakkafâtından mahmiye-i İstanbul hısnı ebvâbından Kapan-ı Dakîk kapısı hâricinde Tekfu[r]dağı İskelesi kurbünde kâin bir tarafdan Tekfurdağı iskelesi meydânı ve etraf-ı selâsesi tarîk-i âm ile mahdûd bir bâb kârgîr hân benim bâ-temessük-i mütevelli bi’l-icâreteyn müstakillen taht-ı tasarrufumda iken mahall-i mezkûrde bundan akdemce vukū‘ bulan harîkde muhterik ve arsası arsa-i sırfa kaldığına binâen hân-ı mezkûrun arsa-i sırfa-i mezkûresi üzerine fevkānî olarak mâlımdan teberru‘an li’l-vakf mebâliğ-i ma‘lûme sarfıyla kârgîr bir bâb hân inşâ ve tahtına tûlen ve arzen bi-hesâb-ı terbî‘î yüz sekiz zirâ‘ mahalline kârgîr olmak üzere bir bâb çörekçi fırını ve mâ‘adâ mahalline dükkân binâ ve ihdâs edip derûn-ı hüccet-i mezkûrede muharrer medîne-i Eyüb’de Câmi‘-i Kebîr mahallesinde kâin bir bâb muhterik çörekçi fırınından müstahlas ve mevcûd çörekçi esnâfının şurût ve nizâmlarında dâhil beyne’l-esnâf çörekçi gediği ta‘bîr olunur mâlikleri tarafından şirâen mâlik olduğum bâ-defter-i müfredât âlât-ı lâzime-i ma‘lûmeyi fırın-ı mezkûr derûnuna nakl ve vaz‘ murâdımdır dedikde âlât-ı gedik-i mezkûrun mahall-i mezkûre naklinin bâ-irâde-i seniyye evkāf gedikâtına tevfîkan icrâsı muktezâ-i hâlden bulunduğuna binâen husûs-ı mezkûr için Bâb-ı âlî’ye takdîm olunan bir kıt‘a arzuhâl bâlâsına sâdır olan fermân-ı âlîlerine imtisâlen husûs-ı mezkûrun hakīkat-ı hâli Zabtiye Müşîri devletlü Abdülkerim Paşa hazretleriyle Ticâret Nezâret-i celîlesi ve Şehremâneti behiyyesinden bâ-fermân-ı âlî lede’l-isti‘lâm âlât-ı gedik-i mezkûrun fırın-ı mezkûre nakl ve vaz‘ında bir gûnâ mahzûr ve mazarrat olmadığı ba‘de’l-keşf hâmiş-i arzuhâle başka başka i‘lâm olundukdan sonra savb-ı şer‘-i şerîfden dahi mezûnen irsâl olunan Kâtib es-Seyyid Hafız Osman Nuri Efendi ümenâ-i şer‘le mahall-i mezkûre varıp hakīkat-ı hâl zeyl-i arzuhâlde mühürleri mestûr olan bâb-ı mezkûr civârında kâin Yavuzer Sinan ve Payaszâde ve Haraccı Kara Mehmed mahalleleri imâm ve muhtârânı ve ahâlisinden meclis-i ma‘kūd-ı mezkûrde hâzır bulunan cerîdede mazbûtü’l-esâmî kesândan dahi lede’l-istihbâr fi’l-vâki‘ fırın-ı mezkûr kârgîr olmak üzere binâ ve inşâ olunmuş ve etrâf-ı erba‘ası ber mûceb-i harîta tarîk-i âm olup âhar gedikden ârî olarak mezbûr Ebubekir Ağa’nın uhdesinde bulunmuş olup ber-mûceb-i hüccet-i şer‘iyye şirâen mâlik olduğu müstahlas çörekçi gediği âlât-ı lâzime-i ma‘lûmesinin fırın-ı mezkûre nakl ve vaz‘ında kezâlik etrâf-ı erba‘asında bulunan kesânın dekâkin ve sâiresine mazarratı olmayıp mahall-i mezkûre dahi bir bâb çörekçi fırınının lüzûmu olduğunu her biri bi’l-ittifâk ihbâr eylediklerini kâtib-i mûmâ-ileyh mahallinde ketb ü tahrîr ve ma‘ân meb‘ûs ümenâ-i şer‘le meclis-i şer‘e gelip alâ vukū‘ihi ba‘de’l-inhâ ve’t-takrîr arzuhâl-ı mezkûr ve esnâf-ı merkūme kethüdâsı tarafından verilen bir kıt‘a memhûr ilmühaber meclis-i şer‘de hıfz olunmuş ve cânib-i şer‘-i şerîfde bulunan gedikât [37a] defteri tashîh kılınmış olmağla mâ-hüve’l-vâkı‘ bi’t-taleb ketb olundu. Fî Gurre-i Cumâdelâhire sene 1279 Şuhûdü’l-hâl: Muhzır Süleyman Ağa b. ( ), MuhzırMustafa Ağa b. ( ), Muhzır Feyzullah Ağa b. ( ), Çukadâr Ahmed Ağa b. ( ), ve gayruhum