Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 533 Hüküm no: 644 Orijinal metin no: [112b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nâime bt. İsmail’in nafaka davasında eski kocası Mehmed b. Osman’la sulh olduğu Mahmiye-i İstanbul’da Derviş Ali mahallesinde sâkine olup zâtı ma‘rifet-i şer‘iyye ile ârifân olan İslâm Efendi b. İbrahim ve Mehmed Çelebi b. Abdullah nâm kimesneler ta‘rîfleriyle mu‘arrefe olan Nâime bt. İsmail nâm hâtun meclis-i şer‘-i şerîf-i enverde bâ‘isü’l-kitâb Mehmed Efendi b. Osman mahzarında bi tav‘ihâ ikrâr ve takrîr-i kelâm edip mezbûr Mehmed mukaddemâ zevcim olup beni tatlîk etmekle zimmetinde mütekarrir ve ma‘kūdun-aleyh olan üç bin akçe mehr-i müeccelim ile mezbûr Mehmed Efendi’nin firâşından hâsıla işbu sadriye kızımız Afîfe nâm sagīrenin bin doksan senesi Zilka‘desi’nden işbu yedimde olan hüccet-i şer‘iyye nâtıka olduğu üzre yevmî dörder akçe nafaka-i mefrûzasından târih-i kitâba gelince ba‘de küllî hesâb müctemi‘ olan dokuz bin beş yüz kırk akçe ki min haysi’l-mecmû‘ on iki bin beş yüz kırk akçeyi mezbûr Mehmed Efendi’den taleb ve da‘vâ eylediğimde beynimizde nizâ‘-ı küllî vâki‘ olmuşdu el-hâletü hâzihî muslihûn tavassut ile mezbûr Mehmed Efendi’yi da‘vâ-yı mezkûrumdan yirmi beş guruş üzerine benimle müsâlaha olup ben dahi ber vech-i muharrer sulh-i mezbûru kabûl ve bedel-i sulh olan meblağ-ı mezbûru yedinden tamâmen ahz u kabz edip husûs-ı mezbûra müte‘allika âmme-i da‘vâdan mezbûr Mehmed Efendi’nin zimmetini ibrâ ve iskāt eylediğimden sonra ba‘de’l-yevm ben mezbûr Mehmed Efendi’den nafaka taleb etmeyip ol dahi mezbûre Afîfe’yi benden taleb ve ahz etmemek üzre her birimiz ta‘ahhüd eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min Ramazâni’l-mübârek li sene seb‘a ve tis‘în ve elf. Şuhûdü’l-hâl: Ahmed Çelebi b. Ali, Mustafa b. Mehmed, el-Hâc Osman b. Mehmed, Mehmed Çelebi b. Ali, Mehmed Çelebi b. Abdullah, Mahmud Çelebi b. Osman.