İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 319 Hüküm no: 211 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütün tüccârından Parnek v. Varteres’in tütüncü dükkânını Fırça boyacısı Kapamacıoğlu Avadis v. Karabet’e satması Tütüncü mübâya‘ası Kezâlik teba‘a-i Devlet-i aliyye’nin Ermeni milletinden ve duhân tüccârından Parnek v. Varteres meclis-i şer‘-i şerîf-i hatîrde teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan bâ‘isü’r-rakīm fırça boyacısı Kapamacıoğlu Avadis v. Karabet muvacehesinde tütüncü esnâfının kethüdâsı el-Hâc Mehmed Abdüllatif Efendi b. İsmail ile tüccâr-ı mezkûreden mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel kethüdâ vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip mahmiye-i İstanbul Kumkapı dâhilinde Çadırcı Ahmed Çelebi mahallesinde Karakolhâne civârında mukaddemâ bakkal ve el-yevm çeşme karşısında köşe başında menzil tahtında vâki‘ iki tarafdan merkūm Avadis’in menzili ve tarafeyni tarîk-i âm ile mahdûd merhûm el-Hâc Ebubekir Ağa Vakfı müsakkafâtından merkūm Avadis’in bi’l-icâreteyn taht-ı tasarrufunda olan terbî‘an on zirâ‘ arsalı bir bâb kadîm tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme bin iki yüz altmış yedi senesi Şa‘bânü’l-mu‘azzamının beşinci günü târihiyle müverraha ve ol târihde Dârü’l-hilâfeti’l-aliyye kādısı olan Meşrebzâde Ali Raik Efendi merhûmun imzâ ve hateminihâviye işbu bir kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedimde müstakillen mülk ve hakkım olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile dört bin beş yüz guruşa merkūm Avadis’e bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm dört bin beş yüz guruşu tamâmen bana def‘ u teslîm ben dahi yedinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrda benim aslâ ve kat‘â alâka ve medhalim kalmayıp merkūm Avadis’in mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî Selh-i Şa‘bân sene 1279 Şuhûdü’l-hâl: Muhzır Süleyman Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), Muhzır Mustafa Ağa b. ( ), ve gayruhum