İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 317 Hüküm no: 210 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun b. Abdüsselam’ın vefât eden kocasından miras kalan tütüncü dükkânındaki hisselerini diğer mirasçılardan Hacı Mehmed Ağa’ya satması Tütüncü mübâya‘ası Kezâlik mahmiye-i İstanbul’da Aksaray kurbünde Gureba Hüseyin Ağa mahallesinde sâkin iken bundan mukaddem vefât eden duhân tüccârından el-Hâc Ebubekir Ağa b. Ali bin Molla Osman’ın verâseti zevce-i menkûha-i metrûkeleri Âişe Hatun bt. Abdüsselam ve Emine Hürmüz Hatun bt. Abdullah ile mezbûre Emine Hürmüz Hatun’dan mütevellidler sulbî kebîr oğulları tütüncü esnâfından el-Hâc Mehmed Ağa ve Ahmed Emin Ağa’ya münhasıra ve tashîh-i mesele-i mirâsları on altı sehimden olup sihâm-ı mezkûreden birer sehimden iki sehmi zevcetân-ı mezbûretân Âişe Hatun ve Emine Hürmüz Hatun’a ve yedişer sehimden on dört sehmi dahi mezbûrân el-Hâc Mehmed Ağa ve Ahmed Emin Ağa’ya isâbeti lede’ş-şer‘î’l-enver zâhir ve mütehakkık oldukdan sonra zâtı ta‘rîf-i şer‘î ile mu‘arrefe olan mezbûre Âişe Hatun meclis-i şer‘-i şerîf-i enverde bâ‘isü’l-kitâb mezbûr el-Hâc Mehmed Ağa mahzarında tütüncü esnâfının kethüdâsı es-Seyyid el-Hâc Mehmed Latif Efendi b. İsmail ile mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel kethüdâ vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip zikr olunan Gureba Hüseyin Ağa mahallesinde vâki‘ mukaddemâ manav ve ipekçi ve el-yevm bir tarafdan Ali Ağa’nın aşçı dükkânı ve bir tarafdan yine mezbûr Ali Ağa’nın mezkûr aşçı dükkânı ve ba‘zen südçü kârhânesi ve yine bir tarafdan mezkûr südçü kârhânesi ve ba‘zen haffâf dükkânı ve taraf-ı râbi‘i tarîk-i âm ile mahdûd merhûm-ı mûmâ-ileyh Gureba Hüseyin Ağa Vakfı müsakkafâtından zevcim müteveffây-ı mezbûr el-Hâc Ebubekir Ağa’dan müntakil oğulları mezbûrân el-Hâc Mehmed Ağa ve Ahmed Emin Ağa’nın bâ-temessük-i mütevelli bi’l-icâreteyn taht-ı tasarruflarında olan şehriye beş guruş kirâlı mukaddemâ derûnunda demir kapılı bir kârgîr mahzen ve bir bodrumu müştemil ve hâlâ terbî‘an elli iki zirâ‘ dokuz parmak arsa üzerinde mebnâ fevkinde dört bâb oda ve tahtında ve bir bodrumu müştemil bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme zevcim müteveffâ-yı mezbûr el-Hâc Ebubekir Ağa’nın hayâtında ile’l-vefât bin iki yüz otuz altı senesi Recebi’l-ferdinin yirmi ikinci günü târihiyle müverraha ve ol târihde mahmiye-i mezkûrede vâki‘ Davudpaşa Mahkemesi nâibi olan Mustafa Efendi’nin imzâ ve hatemini hâviye işbu bir kıt‘a hüccet-i şer‘iyye ve bin iki yüz elli dört senesi Saferi’l-hayrının sekizinci günü târihiyle müverrah bir kıt‘a sûret ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca müstakillen yedinde mülkü ve ba‘de vefatihî ber tashîh-i mezkûr benimle mezbûrûn Emine Hürmüz Hatun ve el-Hâc Mehmed Ağa ve Ahmed Emin Ağa’ya mevrûs olmağla ben âlât-ı gedik-i mezkûrdan ber tashîh-i mezkûr mâlike olduğum bir sehm hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î bi safkatin vâhidetin şerîkan-ı mezbûrân Emine Hürmüz Hatun ve Ahmed Emin Ağa’nın izniyle üç bin guruşa mezbûr el-Hâc Mehmed Ağa’ya bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm üç bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun ber tashîh-i merkūm bir sehm hisse-i şâyi‘a-i mezkûresinde benim aslâ ve kat‘â alâka ve medhalim kalmayıp yedi sehm hisse-i şâyi‘ası mukaddemâ irsen ve bir sehm hisse-i şâyi‘ası hâlâ şirâen ki cem‘an sekiz sehm hisse-i şâyi‘ası merkūm el-Hâc Mehmed Ağa’nın mülk-i mahzı ve hakk-ı sırfı olmuşdur dedikde gıbbe. Fî Gurre-i Şa‘bân sene 1279 Şuhûdü’l-hâl: Muhzır Ahmed Ağa b. ( ), Muhzır Şakir Ağa b. ( ), Muhzır Süleyman Ağa b. ( ), Muhzır Mustafa Ağa b. ( ), ve gayruhum