İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 320 Hüküm no: 213 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kabril v. Agop’un mirasının paylaşılması ve mirasçılardan Agop’un kendisine miras kalan uncu değirmenindeki hisselerini ekmekçi esnâfından Mardiros v. Karabet’e satması Uncu değirmeni. Kaydı ihrâc şüd fî 12 Receb sene 1294. Kaydı ihrâc şüd fî 4 Şa‘bân sene 1328 Âsitâne-i sa‘âdet âşiyâne ve bilâd-ı selâse mahkemelerine mine’l-kadîm bâ-fermân-ı âlî merbût olan tütüncü gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda olan her nev‘ gediklerin mübâya‘a ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı İstanbul mahkemesinde icrâ ve iktizâ eden i‘lâm ve hüccet-i şer‘iyyeleri mahkeme-i merkūme tarafından i‘tâ olunmak ve gedikât ashâbının rızâ ve muvâfakatları olmadıkça mülk kirâları tezyîd olunmamak ve senedât-ı sahîha ve mu‘tebere ile tasarruf olunmakda olan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı kirâm taraflarından istimâ‘ olunmaması bâlâsı tuğrâ-i hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahrûse-i Galata hısnı ebvâbından Kireç kapısı dâhilinde kâin zikr-i âtî bir bâb uncu değirmenininde sâkin iken bundan akdem fevt olan teba‘a-i Devlet-i aliyye’nin Ermeni milletinden ve uncu esnâfından Kabril v. Agop v. Adam’ın verâseti her biri teba‘a-i Devlet-i aliyye’den ve esnâf-ı merkūmeden sulbî kebîr oğulları Agop ve Nişan’a münhasıra ve ba‘dehû merkūm Nişan dahi fevt olup verâseti her biri teba‘a-i Devlet-i aliyye’den zevce-i metrûkesi Maryem bt. Karabet ile sulbî kebîr oğulları Mıgırdıç ve Karabet ve Parsih ve sulbiye kebîre kızları Margarit ve Handan’a münhasıra ve tashîh-i mesele-i mirâsları yüz yirmi sekiz sehimden olup sihâm-ı mezkûreden altmış dört sehmi merkūm Agop’a ve sekiz sehmi merkūme Maryem’e ve on dörder sehimden kırk iki sehmi merkūmûn Mıgırdıç ve Karabet ve Parsih’e ve yedişer sehimden on dört sehmi dahi merkūmetân Margarit ve Handan’a isâbeti lede’ş-şer‘i’l-enver zâhir ve mütehakkık oldukdan sonra merkūm Agop meclis-i şer‘-i hatîrde teba‘a-i Devlet-i aliyye’den ve ekmekçi esnâfından bâ‘isü’r-rakīm Mardiros v. Karabet muvâcehesinde esnâf-ı merkūme kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde bi’l-verâse ikrâr-ı tâm ve takrîr-i kelâm edip bâb-ı mezkûr dâhilide kapu karşısında kâin bir tarafdan Abacı karısı Kadınko menzili ve bir tarafdan Mardiros değirmeni ve bir tarafdan Mustafa Ağa menzili ve taraf-ı râbi‘itarîk-i âm ile mahdûd merhûm Yahya Kethüdâ ve Şah Hûbân ve el-Hâc Abdullah Ağa vakıfları müsakkafâtından benimle merkūmûn Mıgırdıç ve Karabet ve Parsih ve Margarit ve Handan’ın bi’l-icâreteyn taht-ı tasarrufumuzda olan şehriye on guruş kirâlı iki horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur sekiz re’s bârgir ve onlara tâbi‘ sâir âlât-ı lâzime-i ma‘lûme babam müteveffâ-yı merkūm Kabril’in hayâtında ile’l-fevt bin iki yüz yirmi sekiz senesi Şevvalü’l-mükerreminin on üçüncü günü târihiyle müverrah ve ol târihde mahrûse-i mezkûre kādısı olan es-Seyyid Mehmed Zeki Efendi’nin hatemini hâvî işbu bir kıt‘a i‘lâm-ı şer‘î ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedinde müstakillen mülkü ve ba‘de fevtihî benimle verese-i sâire-i mezkûresine ber tashîh-i merkūm mevrûs olmağla ben âlât-ı gedik-i mezkûrdan akd-i âti’z-zikrin sudûruna değin ber-minvâl-i muharrer mâlik olduğum altmış dört sehm hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ elli beş bin guruşa merkūm Mardiros’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm elli beş bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz eyledim fîmâ-ba’d âlât-ı gedik-i mezkûrun ber tashîh-i merkūm altmış dört sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp merkūm Mardiros’un mülk-i müşterâsı ve hakk-ı sırfı olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 12 Ramazan sene 1279 Şuhûdü’l-hâl: Muhzır Feyzullah Ağa b. ( ), Muhzır Ahmed Ağa b. ( ), Muhzır el-Hâc Yusuf Ağa b. ( ), Muhzır Mustafa Ağa b. ( ), ve gayruhum