İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 322 Hüküm no: 214 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayabaloğlu Ebubekir Ağa’nın çörekçi ve gözlemeci dükkânını Hayriye tüccârından Hasan Ağa b. Hacı Mustafa ve Trabzonî Mehmed Temel Efendi’ye satması Çörekçi gediği nakli Kezâlik vilâyet-i Anadolu’da Kürretünnühâs kazâsında nefs-i Küre kasabası mahallâtından Eşref mahallesinde sâkin Kayabaloğlu Ebubekir Ağa b. Hüseyin b. Abdullah tarafından husûs-ı âti’l-beyânda işbu şehr-i hâlin ikinci günü târihiyle müverraha ve ol târihde kazâ-i mezkûre nâibi olan es-Seyyid Mehmed Emin Efendi’nin mührü mutâbık ve meâli vekâleti beyândan ibâret idüğü cânib-i fetvâhâne-i celîleden hâmişine tahrîr ve temhîr kılınan işbu bir kıt‘a hüccet-i şer‘iyye mantûkunca vekîl olduğu Helvâcı Arapoğlu Salih Ağa b. Salih ve Börekçi Molla Ahmedoğlu İbrahim Ağa b. Hasan şehâdetleriyle ber-nehc -i şer‘î sâbit olan kasaba-i mezkûreye tâbi‘ Arslanlı karyesi ahâlisinden Çörekci Hatipoğlu Hüseyin Ağa b. Abdurrahman meclis-i şer‘-i şerîf-i enverde Hayriye tüccârından bâ‘iseyi’l-kitâb Hasan Ağa b. el-Hâc Mustafa ve Trabzonî Mehmed Temel Efendi b. diğer el-Hâc Mustafa mahzarlarında çörekci vesimidçi ve gözlemeci esnâfının kethüdâsı rif‘âtlü Ömer Celaleddin Ağa b. Hüseyin ve nizâm ustalarından Yakub Ağa b. Mehmed Arif ve el-Hâc Salih Ağa b. Ali ve yiğitbaşıları Halil Efendi b. Ömer ve Rüstem Ağa b. Abdullah hâzır oldukları hâlde bi’l-vekâle ikrâr-ı tâm ve takrîr-i kelâm edip mahmiye-i İstanbul’da Cağalazâde Sarayı karşısında şekerci ve manav dükkânları beynlerinde kâin arsası bundan mukaddem bâ-irâde-i seniyye Karakolhâne’ye ilâve olunan bir bâb çörekçi ve gözlemeci dükkânı derûnundan müstahlas ve mevcûd beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla akd-i âti’z-zikrin sudûruna değin müvekkilim merkūm Ebubekir Ağa’nın bin iki yüz on sekiz senesi Muharremü’l-harâmının yedinci günü ve bin iki yüz otuz üç senesi Şevvali’l-mükerreminin altıncı günü târihleriyle müverrahalar İstanbul Mahkemesi’nden muhrece iki kıt‘a kayd-ı hüccet [44b] ve bin iki yüz otuz dokuz senesi Şevvali’l-mükerreminin on yedinci günü târihiyle müverraha ve ol târihde Dârü’l-hilâfeti’l-aliyye kādısı olan Raşid Efendizâde es-Seyyid el-Hâc Cafer Fevzi Beyefendi merhûmun imzâ ve hatemiyle mahtûme işbu diğer bir kıt‘a hüccet-işer‘iyye ve kethüdâ-yı hâzır-ı mûmâ-ileyhin takdîm eylediği bir kıt‘a ilmühaber nâtıklar olduğu üzere irsen ve şirâen yedinde müstakillen mülkü olmağla ben müvekkilim mezbûr Ebubekir Ağa’nın ber-minvâl-i muharrer mâlik olduğu âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûrân Hasan Ağa ve Mehmed Temel Efendi’ye altı bin beş yüz guruşa bi’l-vekâle bey‘ ve temlîk ve teslîm eylediğimde onlar dahi ber-vech-i muharrer münâsefeten iştirâ ve temellük ve tesellüm ve mahall-i âhara nakle ta‘ahhüd eylediklerinden sonra semeni olan meblağ-ı merkūm altı bin beş yüz guruşu tamâmen bana def‘ u teslîm ben dahi yedlerinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan mezbûrân Hasan Ağa ve Mehmed Temel Efendi’nin zimmetlerini ibrâ-yı sahîh-i şer‘î ile müvekkilim mezbûr Ebubekir Ağa’ya izâfetle bi’l-vekâle ibrâ vü ıskāt eylediğimde onlar dahi kezâlik mebî‘-i mezkûrun tağrîr ve gabnine müte‘allika da‘vâdan müvekkilim mezbûr Ebubekir Ağa’nın zimmetini ibrâ-yı sahîh-i şer‘î ile ibrâ vü ıskāt ve tarafeynden her birimiz ber-minvâl-i muharrer âharın ibrâsını asâleten ve vekâleten kabûl eyledik, ba‘de’l-yevm âlât-ı gedik-i mezkûrda müvekkilim mezbûr Ebubekir Ağa’nın aslâ ve kat‘â alâka ve medhali kalmayıp mezbûrân Hasan Ağa ve Mehmed Temel Efendi’nin ale’l-iştirâki’s-seviy mülk-i müşterâları ve hakk-ı sırfları olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 24 Cumâdelûlâ sene 1279 Şuhûdü’l-hâl: Muhzır Süleyman Ağa b. ( ), Muhzır Şakir Ağa b. ( ), Muhzır Mustafa Ağa b. ( ), Muhzır Ahmed Ağa b. ( ), ve gayruhum