Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 535 Hüküm no: 646 Orijinal metin no: [113a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Serkis v. Agop üzerine çocukları için nafaka takdir edilmesi Mahmiye-i İstanbul’da İnebey mahallesi sâkinelerinden işbu bâ‘isetü’l-vesîka Sanya bt. Safer nâm nasrâniye meclis-i şer‘-i şerîf-i enverde zevc-i muhâlı‘ı Serkis v. Agop nâm zimmî muvâcehesinde takrîr-i kelâm ve bast-ı merâm edip mezbûr Serkis’in firâşından hâsıl ve benden mütevellid sadrî oğullarım Elmas ve İvan ve sadriye kızlarım Maryem ve Safomone nâm sagīrin nafaka ve kisve-bahâ ve sâir levâzım-ı mühimmeleri için babası mezbûr Serkis üzerine kıbel-i şer‘den kadr-i ma‘rûf nafaka farz ve takdîr olunmak matlûbumdur dedikde hâkim-i muvakki‘-i sadr-ı kitâb -tûbâ-lehû ve hüsnü me’âb- hazretleri dahi sagīrîn-i mezbûrûnun nafaka ve kisve-bahâ ve sâir levâzım-ı mühimmeleri için babası mezbûr Serkis’in üzerine her birine ikişer buçuk akçe olmak üzre târih-i kitâbdan külle yevm onar akçe nafaka bi’t-terâzî farz ve takdîr edip meblağ-ı mefrûz-ı mezbûru sagīrîn-i mezbûrûna harc ve sarfa ve lede’z-zarûre istidâneye ve inde’z-zafer babası mezbûr Serkis üzerine rücû‘a mezbûre Sanya’ya izin verilmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, el-Hâc Mustafa b. Tevekkül, Mustafa Çelebi b. Ahmed, Mehmed b. İdris, Ali b. Bâli, Ahmed b. Mehmed.