Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 535 Hüküm no: 647 Orijinal metin no: [113a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Derviş’in oturduğu icâreteynli vakıf menzili Hüseyin b. Mehmed’e devretmesi Menzil-i vakf ferâğ hüccetidir. Mahmiye-i İstanbul’da Molla Ahaveyn mahallesinde vâki‘ olup kalemiyye ve tevliyyeti merhûm attâr Ahmed’in mahalle-i mezbûrede vâki‘ mescid-i şerîfinde imâm olanlara meşrûta vakfı olan lede’l-ahâlî ma‘lûmü’l-hudûd menzile icâre-i mu‘accele ile yirmi beş akçe ücret-i müeccele ile mutasarrıfe olan Ayşe Hâtun bt. Derviş zâtını ma‘rifet-i şer‘iyye ile ârifân sadrî oğlu Osman Efendi b. Ahmed Çavuş ve Mehmed b. Hüseyin ta‘rîfleriyle mu‘arrefe oldukdan sonra meclis-i şer‘-i şerîf-i enverde işbu bâ‘isü’l-kitâb Hüseyin b. Mehmed mahzarında ikrâr-ı tâm ve takrîr-i kelâm edip ber vech-i meşrûh icâreteyn-i ma‘lûmeteyn ile mutasarrıf olduğum menzil-i mezkûru elli guruş bedel mukābelesinde izn-i mütevellî ile mezbûr Hüseyin’e ferâğ ve tefvîz ol dahi tefevvüz ve kabûl edip bedel-i mezkûr elli guruşu bana def‘ ve teslîm ben dahi bi’t-tamâm kabz ve tesellüm eyledim ba‘de’l-yevm menzil-i mezbûr merkūm Hüseyin’in dâhil-i havza-i tasarrufu olup kat‘â alâka ve medhalim kalmamışdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Ramazâni’l-mübârek li sene seb‘a ve tis‘în ve elf. Şuhûdü’l-hâl: Yakub b. Mustafa, Ömer b. İsa, İbrahim b. Osman, Osman b. Ali, Mehmed b. Hüseyin.