İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 368 Hüküm no: 250 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Mustafa ve akrabalarına miras kalan abacı terzisi dükkânının müzâyede yoluyla satılması Abacı terzisi gediği. Muahharan kayd olunmuşdur Kezâlik mahrûse-i Galata’da Okçu Musa mahallesinde sâkine kendinden asıl ve sadrî sagīr oğlu Mehmed’in tesviye-i emrine kıbel-i şer‘den bâ-hüccet vasiyy-i mansûbesi olup zâtı ta‘rîf-i şer‘î ile mu‘arrefe olan Fâtıma Hatun bt. Mustafa [ve] diğer sadrî kebîr oğlu İsmail Ağa hâzır olduğu hâlde meclis-i şer‘-i şerîf-i enverde işbu bâ‘isü’l-kitâb Feyzullah Ağa b. Musa mahzarında mahrûse-i merkūme ve tevâbi‘inde vâki‘ abacı terzisi esnâfı kethüdâsı İbrahim Ağa b. Osman ve Serrâc Hüseyin Ağa b. Ömer hâzır oldukları hâlde bi’l-asâle ve bi’l-vesâye ikrâr-ı tâm ve takrîr-i kelâm edip mahrûse-i merkūme hısnı ebvâbından Eski Yağ Kapanı kapısı hâricinde Maktûl İbrahim Paşa Câmi‘-i şerîfi tahtında kâin bir tarafdan Berber Manas’ın berber dükkânı ve bir tarafdan Trabzonî İsmail Paşa’nın abacı dükkânı ve bir tarafdan bakkal dükkânı ve taraf-ı râbi‘i tarîk-i âm ile mahdûd sâlifü’z-zikr Maktûl İbrahim Paşa Vakfı müsakkafâtından gāibe ani’l-meclis Elmas Hatun bt. Abdullah’ın bâ-temessük-i mütevelli bi’l-icâreteyn müstakilleten taht-ı tasarrufunda bulunan bir bâb abacı terzisi dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzime-i ma‘lûme yedimde olup bin iki yüz otuz [52b] dört senesi Cumâdelûlâsının on altıncı günü târihiyle müverraha mahrûse-i merkūme mahkemesi sicillinden muhrece işbu bir kıt‘a hüccet-i şer‘iyye kaydı nâtıka olduğu üzere zevc-i evvelim olan el-Hâc Mustafa Ağa b. Hasan b. Abdullah’ın müstakillen yedinde malı ve mülkü iken vefât edip âlât-ı gedik-i mezkûr benimle sulbiye sagīre kızı Ümmügülsüm ve sulbî kebîr oğlu hâzır-ı mezbûr İsmail Ağa ve zevce-i uhrâsı Havva Hatun bt. Abdullah’dan mütevellid diğer sulbî kebîr oğlu gāib ani’l-meclis Hâfız Hasan Efendi’ye mesele-i mirâsımız vechile mevrûs oldukdan sonra gāib-i mezbûr Hâfız Hasan Efendi âlât-ı gedik-i mezkûrdan ber-vech-i muharrer irsen mâlik olduğu hisse-i şâyi‘a-i ma‘lûmesini yine yedimde olup bin iki yüz altmış bir senesi Saferi’l-hayrının altıncı günü târihiyle müverrah ve ol târihde mahrûse-i merkūme kādısı bulunan fazîletlü Pîr Ali Haydar Efendi’nin hatemini hâvî işbu bir kıt‘a i‘lâm-ı şer‘î mantûkunca muahharan nefsimi tezvîc etmiş olduğum esnâf-ı merkūmeden Mustafa İzzet Ağa b. Mehmed’e semen-i ma‘lûm ve makbûza bâtten ve sahîhan bâ-izn-i şürekâ bey‘ ve temlîk ve vech-i lâyıkı üzere teslîm eylediğinde ol dahi ber-vech-i muharrer iştirâ ve temellük ve tesellüm ve kabz u kabûl edip ba‘dehû sagīre-i mezbûre Ümmügülsüm dahi vefât edip âlât-ı gedik-i mezkûrdan irsen mâlike olduğu hisse-i şâyi‘a-i ma‘lûmesi benimle li-ebeveyn er karındaşı hâzır-ı mezbûr İsmail Ağa’ya mevrûs olup ba‘demâ zevc-i sânîm mezbûr Mustafa İzzet Ağa dahi vefât edip âlât-ı gedik-i mezkûrdan şirâen mâlik olduğu hisse-i şâyi‘a-i ma‘lûmesi verese-i münhasırası olan sulbî sagīr oğlu vasîsi olduğum Mehmed ve sulbiye sagīre kızı Hafize ile bana mevrûs olup ba‘dehû kızım sagīre-i mezbûre Hafize dahi vefât edip âlât-ı gedik-i mezkûrdan ber-vech-i muharrer irsen mâlike olduğu hisse-i şâyi‘a-i ma‘lûmesi benimle li-ebeveyn er karındaşı sagīr-i mezbûr Mehmed ve li-üm er karındaşı hâzır-ı mezbûr İsmail Ağa’ya mevrûs olmağla ol vechile mecmû‘-ı âlât-ı gedik-i mezkûr bi-hükmi’l-münâsahati’ş-şer‘iyye benimle vasîsi olduğum sagīr-i mezbûr Mehmed ve hâzır-ı mezbûr İsmail Ağa’nın şâyi‘an yedimizde mâlımız ve mülkümüz olmuşdu el-hâletü hâzihî ben kendi hakkımda bi’l-asâle ve sagīr-i hâzır-ı mezbûr hissesinde müsevvig-i şer‘iyyeye binâen kıbel-i şer‘den mezûnen bi’l-vesâye ve hâzır-ı mezbûr İsmail Ağa dahi bi’l-asâle mecmû‘u âlât-ı gedik-i mezkûru hâlâ kassâmü’l-askerî Çarşambavîzâde fazîletlü Mehmed Said Efendi hazretlerinin mührüyle memhûr işbu bir kıt‘a ilmühaber mantûkunca sûk-ı sultânî ve mecma‘-ı nâs olan mahallerde lede’l-müzâyede ve gıbbe inkıtâ‘ı’r-rağbe semen-i misli idüğü bî-garez sikāt-ı müslimînin alâ tarîki’ş-şehâde haberleriyle zâhir ve mütehakkık olan yirmi bin guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Feyzullah Ağa’ya bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl edip semeni olan meblağ-ı mezkûr yirmi bin guruşu benimle hâzır-ı mezbûre def‘ u teslîm eylediğinde biz dahi yedinden bi’l-asâle ve bi’l-vesâye tamâmen ahz u kabz ve müteveffâ-yı evvel ve sânî-i mezbûrların defter-i kassâmlarına bi’l-idhâl ber-nehc -i şer‘î üzere iktisâm etmemizle ba‘de’l-yevm mecmû‘-ı âlât-ı gedik-i mezkûr mezbûr Feyzullah Ağa’nın şirâen ve müstakillen mâlı ve mülkü olup benimle vasîsi olduğum sagīr-i mezbûr Mehmed ve hâzır-ı mezbûr İsmail Ağa’nın aslâ ve kat‘â alâka ve medhalimiz kalmamışdır dedikde gıbbe’t-tasdîki’ş-şer‘î mezbûr Feyzullah Ağa meclis-i ma‘kūd-ı mezkûrda işbu bâ‘isü’l-kitâb mezbûre Fâtıma Hanım mahzarında ikrâr-ı tâm ve takrîr-i kelâm edip ben dahi ânifen ve şirâen mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûre FâtımaHanım’a yirmi bin guruşa bey‘ ve temlîk ve teslîm eylediğimde ol dahi iştirâ ve temellük ve tesellüm ve kabz u kabûl edip semeni olan meblağ-ı mezkûr yirmi bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz eyledim ba‘de’l-yevm âlât-ı gedik-i mezkûr mezbûre Fâtıma Hatun’un şirâen ve müstakilleten malı ve mülkü olup benim aslâ ve kat‘â alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 20 Receb sene 1279 Şuhûdü’l-hâl: Muhzır Feyzi Ağa b. ( ), Muhzır Süleyman Ağa b. ( ), Muhzır Mehmed Ağa b. ( ), Muhzır Selim Ağa b. ( ), Muhzır Yusuf Ağa b. ( ), ve gayruhum