İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 367 Hüküm no: 249 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ebubekir Ağa b. İsmail’in yanmış hânın yerine yeni bir hân inşa etmesi ve altına çörekci fırını açması Derûn ve nakl olunan gedik-i mezkûrun mübâya‘a hücceti târihi fî 15 Muharrem sene 1279. Muahharan tesvîdinden kayd olunmuşdur fî 13 Receb sene 1281 İşbu sebt-i hâmiş olunan hüccet derûnunda mezkuru’l-isim sadr-ı vâlâ-yı Anadolu tahtacısı el-Hâc Ebubekir Ağa b. İsmail nâm kimesne meclis-i şer‘-i münîrde takrîr-i kelâm edip Nezâret-i Evkāf-ı hümâyûna mülhak evkāfdan merhûm Ahi Çelebi Vakfı müsakkafâtından mahmiye-i İstanbul hısnı ebvâbından Kapan-ı Dakîk kapısı hâricinde Tekfurdağı İskelesi kurbünde kâin bir tarafdan Tekfurdağı İskelesi meydânı ve etraf-ı selâsesi tarîk-i âm ile mahdûd bir bâb kârgîr hân benim bâ-temessük-i mütevelli bi’l-icâreteyn müstakillen taht-ı tasarrufumda iken mahall-i mezkûrda bundan akdemce vukū‘ bulan harîkde muhterik ve arsası arsa-i sırfe kaldığına binâen hân-ı mezkûrun arsa-i sırfe-i mezkûresi üzerine fevkānî olarak mâlımdan teberru‘an li’l-vakıf mebâliğ-i ma‘lûme sarfıyla kârgîr bir bâb hân inşâ ve tahtına tûlen ve arzen bi-hesâb-ı terbî‘î yüz sekiz zirâ‘ mahalline kârgîr olmak üzere bir bâb çörekci fırını ve mâ‘adâ mahalline dükkân binâ ve ihdâs edip derûn-ı hüccet-i mezkûrede muharrer medîne-i Eyüb’de Câmi‘-i Kebîr mahallesinde kâin bir bâb muhterik çörekçi fırınından müstahlas ve mevcûd çörekçi esnâfının şurût ve nizâmlarında dâhil-i beyne’l-esnâf çörekçi gediği ta‘bîr olunur mâlikleri tarafından şirâen mâlik olduğum bâ-defter-i müfredât âlât-ı lâzime-i ma‘lûmeyi fırın-ı mezkûr derûnuna nakil ve vaz‘ murâdımdır dedikde âlât-ı gedik-i mezkûrun mahall-i mezkûre naklinin bâ-irâde-i seniye evkāf gedikâtına tevfîkan icrâsı muktezâ-i hâlden bulunduğuna binâen husûs-ı mezkûr için Bâbıâlî’ye takdîm olunan bir kıt‘a arzuhâl bâlâsına sâdır olan fermân-ı âlîlerine imtisâlen husûs-ı mezkûrun hakīkat-ı hâli Zabtiye müşîri devletlü Abdülkerim Paşa hazretleriyle Ticâret Nezâret-i celîlesi ve Şehremâneti behiyyesinden bâ-fermân-ı âlî lede’l-isti‘lâm âlât-ı gedik-i mezkûrun fırın-ı mezkûre nakil ve vaz‘ında bir gûnâ mahzûr ve mazarrat olmadığı ba‘de’l-keşf hâmiş-i arzuhâle başka başka i‘lâm olundukdan sonra savb-ı şer‘-i şerîfden dahi mezûnen irsâl olunan Kâtib es-Seyyid Hafız Osman Nuri Efendi ümenâ-i şer‘le mahall-i mezkûre varıp hakīkat-ı hâl zeyl-i arzuhâlde mühürleri mestûr olan bâb-ı mezkûr civârında kâin Yavuzer Sinan ve Papazzâde ve Haraccı Kara Mehmed mahalleleri imâm ve muhtaranı ve ahâlisinden meclis-i ma‘kūd-ı mezkûrda hâzır bulunan cerîdede mazbûtü’l-esâmî kesândan dahi lede’l-istihbâr fi’l-vâki‘ fırın-ı mezkûr kârgîr olmak üzere binâ ve inşâ olunmuş ve etrâf-ı erba‘ası ber-mûceb-i harîta tarîk-i âm olup âhar gedikden ârî olarak mezbûr Ebubekir Ağa’nın uhdesinde bulunmuş olup ber mûceb-i hüccet-i şer‘iyye şirâen mâlik olduğu müstahlas çörekçi gediği âlât-ı lâzime-i ma‘lûmesinin fırın-ı mezkûre nakil ve vaz‘ında kezâlik etrâf-ı erba‘asında bulunan kesânın dekâkîn ve sâiresine mazarratı olmayıp mahall-i mezkûre dahi bir bâb çörekçi fırınının lüzûmu olduğunu her biri bi’l-ittifâk ihbâr eylediklerini kâtib-i mûmâ-ileyh mahallinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ vukū‘ihi ba‘de’l-inhâ ve’t-takrîr arzuhâl-ı mezkûr ve esnâf-ı merkūme kethüdâsı tarafından verilen bir kıt‘a memhûr ilmühaber meclis-i şer‘de hıfz olunmuş ve cânib-i şer‘-i şerîfde bulunan gedikât defteri tashîh kılınmış olmağla mâ-hüve’l-vâkı‘ bi’t-taleb ketb olundu. Fî Gurre-i Cumâdelâhire sene 1279 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), Çukadâr Ahmed Ağa b. ( ), ve gayruhum