İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 62 Hüküm no: 5 Orijinal metin no: [1-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ev ve arazi davalarında ebniye meclislerinin mühürü olmayan haritalara itibar edilmemesi Huzûr-ı âlî-i Meşîhat-penâhîye Ma‘rûz-ı bende-i dîrîneleridir ki, Dersa‘âdet’de menâzil ve arâzî münâza‘âtıyla vukū‘ bulan müsted‘iyât üzerine mehâkim-i şer‘iyeden ve ebniye mecâlisinden me’mûrlar ta‘yîniyle münâza‘un-fîh olan mahâllin keşf ü mu‘âyenesi icrâ ve harîtası tanzîm olundukdan sonra tarafeynin hîn-i mürâfa‘a ve muhâkemesinde resmini mansûb olduğu mahkeme-i şer‘iyeye mühendis getirip irâe eylemekde ise de bu makūle mevâddın tesviyesi husûsunda ma‘mûriyetince matlûb olan mazbûtiyet hâsıl olmayıp bir takım müşkilâtı dâ‘î olduğuna mebnî bu uygunsuzluğun önü alınmak üzere bu misillü de‘âvî nizâ‘ına dâir yapılan harîtaların meclis-i mezkûrun mührüyle temhîr olundukdan sonra lüzûmunda mehâkim-i şer‘iyeye isrâ ve irâe olunmasının husûl ittihâzıyla ba‘demâ bilâ-mühür o makūle harîta görüldüğü hâlde mehâkim-i şer‘iyeden sahîh nazar ile bakılmayıp i‘âde kılınması münâsib-i tezekkür ve mütâla‘a kılındığı meclis-i mezkûrda bâ-müzekkere beyân ve ifâde kılınmış ve sûret-i hâl îcâb eden mahâl-i hâliyeye bâ-tezkire-i âcizî beyân ve iş‘âr olunmuş olmasıyla taraf-ı eşref-i cenâb-ı Meşîhat-penâhîlerinden dahi keyfiyetin iktizâ eden mahallere emr ü tenbîh buyurulması husûsuna müsâ‘ade-i aliyye-i semîhâneleri erzân buyurulmak bâbında ve her hâlde emr ü fermân hazret-i veliyyü’l-emrindir. Fî 2 Receb sene 1281, fî 18 Teşrîn-i sânî sene [12]80. Edhem An-cânib-i nezâret-i Nâfi‘a.