İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 63 Hüküm no: 7 Orijinal metin no: [2-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşrada uygulanan evkaf senetlerine bedel miktarının yazılması usulünün Dersaadet’te de uygulanması 148 Taraf-ı Vâlâ-yı Hazret-i Fetvâ-penâhîye Ma‘rûz-ı bende-i dîrîneleridir ki, Dersa‘âdet civârında kâin bi’l-cümle evkāf-ı şerîfe müsakkafât ve müstagallâtının ferâğ ve kasr-ı yedleri vukū‘unda ne kadar bedel ile alınıp verildiği intikālâtında dahi ne mikdâr bedel takdîr olunduğu ihbâr kılınır ise ferâğ ve intikālleri ol sûretle icrâ ve fakat sened ve hâmişlerinde mikdâr-ı bedelât açılmaksızın yalnız keyfiyet ve intikālâtı tahrîr ve inbâ olunmakda ve nizâmnâme-i cedîd hükmünce taşralardan gelen evkāf senedâtıyla bedelâtın mikdârı dahi tasrîh kılınmakda olarak buradaki senedâta bedellerin yazılmamasından dolayı fâriğ ve mefrûğun-leh beynlerinde dâimâ münâza‘a zuhûruyla müşkilât görüldüğünden başka bu sûret harc-ı hazînenin ketm ve tedennîsini dahi müstelzim bulunduğundan tahrîr-i bedel usûlünün taşralarda cârî olduğu üzere Dersa‘âdet’de dahi icrâ-yı kavâ‘idi mûcib olacağına binâen kat‘iyen ferâğ edilen müsakkafât ve müstagallâta dâir da‘vâ zuhûrunda irâe olunacak senedâtdan istiğlâl şâibesi çıkmamak için icrâ-yı iktizâsı Evkāf-ı hümâyûn nezâret-i celîlesinden bâ-takrîr vukū‘ bulan iş‘âr üzerine Meclis-i Vâlâ’da tensîb edilmiş ve bi’l-istîzân irâde-i seniyye-i cenâb-ı pâdişâhî dahi ol merkezde müte‘allik ve şeref-sâdır buyurulup îcâbının îfâsı nezâret-i celîle-i müşârün-ileyhâya havâle olunarak keyfiyet varaka-i mahsûsa ve gazeteler ile neşr ü i‘lân kılınmış olmağın taraf-ı âlî-i Fetvâ-penâhîlerinden dahi mehâkim-i şer‘iyeye ma‘lûmât i‘tâ buyurulması bâbında emr ü irâde hazret-i men-lehu’l-emrindir. Fî 4 Ramazan sene 1281 ve fî 20 Kânûn-ı sânî sene 1280.