İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 66 Hüküm no: 13 Orijinal metin no: [6-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerkez muhacirlerin aralarındaki hür ve kölelik davalarına Anadolu ve Rumeli kazaskerleri ile İstanbul kadısının bakması Taraf-ı vâlâ-yı Meşîhat-penâhîye Ma‘lûm-ı âlî-i Fetvâ-penâhîleri buyrulacağı üzere muhâcirîn-i Çerâkise beyninde mütevâliyen zuhûr etmekde olan hürriyet maddelerinin yalnız huzûr mürâfa‘ası eyyâm-ı mahsûsasına münhasır tutulması işin uzamasını intâc etmekde olan ve Muhâcirîn Komisyonu Heyeti’ne dahi te‘addî lâzım gelmesine binâen ba‘zan bu misillü da‘vâların eyyâm-ı mahsûsasına münhasır tutulmayarak semâhatlü sadreyn ve fazîletlü İstanbul kādısı efendiler hazerâtı dâire-i me’mûrelerinde dahi sür‘at[le] rü’yet edilerek az müddet içinde ikmâl-i husûsâta himmet-i mahsûsa-i cenâb-ı Fetvâ-penâhîleri buyurulmakla mu‘âmelât icrâsının De‘âvî Nezâret-i behiyesine havâlesi husûsuna irâde-i seniyye-i hazret-i pâdişâhî müte‘allik ve şeref-sudûr buyurulmuş ve keyfiyet nezâret-i müşârün-ileyhâya bildirilmiş olmağla icrâ-i iktizâsına taraf-ı sâmî-i Fetvâ-penâhîden dahi lâzım gelenlere tenbîhe himmet-i aliyyeleri derkâr buyurulmak bâbında emr ü fermân hazret-i men-lehu’l-emrindir. Fî 14 Receb sene 1282.